26 ماۋسىمدا VIII شاقىرىلىمداعى قازاقستاننىڭ پارلامەنتى ءماجىلىسىنىڭ ءتورتىنشى سەسسياسىنىڭ قورىتىندى جالپى وتىرىسى ءوتتى، دەپ حابارلايدى "ادىرنا" ۇلتتىق پورتالى.
وتىرىس بارىسىندا ءماجىلىس توراعاسى ەرلان قوشانوۆ قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىن شاقىرۋ تۋرالى وكىمگە قول قويعانىن حابارلادى.
وكىمگە سايكەس، قازاقستان رەسپۋبليكاسى كونستيتۋتسياسىنىڭ 58-بابى 4-تارماعىنىڭ 2) تارماقشاسىنا ساي پارلامەنت پالاتالارىنىڭ بىرلەسكەن وتىرىسى 2026 جىلعى 30 ماۋسىم كۇنى ساعات 11:00-دە استانا قالاسىندا وتەدى.
قورىتىندى وتىرىستا دەپۋتاتتار بۇعان دەيىن ءماجىلىس قابىلداعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكولوگيا جانە ەكونوميكانىڭ جەكەلەگەن سالالارىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا سەنات ەنگىزگەن تۇزەتۋلەردى قاراپ، ولارمەن كەلىستى.
سونىمەن قاتار ماجىلىسمەندەر «2006 جىلعى 4 قىركۇيەكتەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى قازاقستان–وزبەكستان مەملەكەتتىك شەكاراسى ارقىلى وتكىزۋ پۋنكتتەرى تۋرالى كەلىسىمگە وزگەرىستەر مەن تولىقتىرۋلار ەنگىزۋ جونىندەگى حاتتامانى راتيفيكاتسيالاۋ تۋرالى» زاڭدى قابىلداپ، ونى قاراۋ ءۇشىن سەناتقا جولدادى.
وسىلايشا، ءماجىلىستىڭ ءتورتىنشى سەسسياسىنىڭ قورىتىندى وتىرىسىندا زاڭ شىعارۋ جۇمىستارىنىڭ بىرقاتار ماڭىزدى ماسەلەلەرى قارالىپ، الداعى پارلامەنت پالاتالارىنىڭ بىرلەسكەن وتىرىسىنىڭ كۇنى رەسمي تۇردە بەلگىلەندى.
