1 ماۋسىم – ورال قالاسى ءبىلىم بەرۋ ۇيىمدارى جانىنداعى جازعى لاگەرلەر سالتاناتتى تۇردە اشىلدى. جازعى ماۋسىمدا قالانىڭ 47 مەكتەبىندە تاماقتانۋى ۇيىمداستىرىلعان لاگەرلەردە 6500 بالا، 50 مەكتەپتەگى جانە 2 قوسىمشا ءبىلىم بەرۋ ۇيىمىنداعى (مەكتەپتەن تىس جۇمىس ورتالىعى، وقۋشىلار سارايى) تاماقتانۋ ۇيىمداستىرىلماعان لاگەردە 45 050 بالا دەمالىسىن وتكىزەدى دەپ كۇتىلۋدە.
ورال قالالىق ءبىلىم بەرۋ ءبولىمىنىڭ باسشىسى اقجارقىن تەمىرحانوۆانىڭ ايتۋىنشا، قر وقۋ-اعارتۋ مينيسترلىگى ۇسىنعان جازعى دەمالىستى ۇيىمداستىرۋ بويىنشا نۇسقاۋلىعى، بقو ءبىلىم باسقارماسىنىڭ 2024-2026 جىلدارعا ارنالعان بالالاردىڭ جازعى كانيكۋل كەزىندە دەمالىسىن، بوس ۋاقىتىن جانە جۇمىسپەن قامتىلۋىن ۇيىمداستىرۋ بويىنشا ءىس-شارالار جوسپارلارىنا سايكەس مەكتەپ جانىنداعى تاماقتانۋى ۇيىمداستىرىلعان جانە تاماقتانۋى ۇيىمداستىرىلماعان لاگەرلەردە قالا مەكتەپتەرىنىڭ 1-10 سىنىپ وقۋشىلارىنىڭ 94 پايىزى دەمالىسىن وتكىزەدى دەپ كۇتىلۋدە. وسى ماقساتتا ماۋسىمنىڭ ءبىرى كۇنى «اتامەكەن» قبجتجەو بازاسىندا «التىن بالالىق شاق» ونكۇندىگىنىڭ اشىلۋ سالتاناتى ءوتتى. شاراعا قالا مەكتەپتەرىنەن 400 وقۋشى قاتىسىپ، الاڭداردا تاجىريبەلەرمەن تانىسىپ، كونتسەرتتىك باعدارلامانى تاماشالادى. مەرەكە اياسىندا بالالارعا تاتتىلەر ۇلەستىرىلدى. ونكۇندىك شەڭبەرىندە بالالاردىڭ ماسەلەلەرىن شەشۋ جانە ولاردىڭ قۇقىقتارىن قورعاۋ ماقساتىندا «وتباسى اياسىندا»، «تالانتتار شەرۋى»، «دەنساۋلىق ليگاسى»، «بىرلىك – تىرلىك تىرەگى»، «قاۋىپسىزدىك پەن مەيىرىمدىلىك الەمىندە»، «Garmonia»، «دوسىڭا قۋانىش سىيلا»، «Zhaz online»، «اتادان بالاعا مۇرا» تاقىرىپتارىندا تاعىلىمدى شارالار، ەكسكۋرسيالار، قىزىقتى ويىندار وتكىزۋ جوسپارلانىپ وتىر.
ءبىلىم بەرۋ بولىمىنە قاراستى «اتامەكەن» قالالىق بالالار-جاسوسپىرىمدەر ءتۋريزمى جانە ەكولوگيا ورتالىعىندا ءۇش ايدا 3430 وقۋشى دەمالادى دەپ كۇتىلۋدە. ونىڭ ىشىندە الەۋمەتتىك جاعىنان از قورعالعان، جەتىم، اتا-اناسىنىڭ قامقورلىعىنسىز قالعان بالالار 400 بالا قامتىلعان.
– دەمالىستى ۇيىمداستىرۋداعى باسىم باعىتتاردىڭ ءبىرى – دارىندى وقۋشىلاردى 50% اتا-انالارى ەسەبىنەن دەمالىسپەن قامتۋ ەسەپتەلەدى. 230 وسى ساناتتىعى وقۋشى «اتامەكەن» لاگەرىندە دەمالىسىن وتكىزەدى. قالانىڭ 47 مەكتەبىندە تاماقتانۋى ۇيىمداستىرىلعان لاگەرلەردە 6500 بالا، 50 مەكتەپتەگى جانە 2 قوسىمشا ءبىلىم بەرۋ ۇيىمىندا (مەكتەپتەن تىس جۇمىس ورتالىعى، وقۋشىلار سارايى) تاماقتانۋ ۇيىمداستىرىلماعان لاگەردە 45 050 بالا دەمالىسىن وتكىزەدى دەپ كۇتىلۋدە. سونىمەن قاتار بوروۆوە كۋرورتتىق اۋماعىنداعى لاگەرلەردە جەكەلەنگەن ساناتتاعى وتباسىلاردان 150 بالانىڭ دەمالىسى جانە استانا قالاسىنا وسى ساناتتاعى 50 وقۋشى، شىمكەنت قالاسىنا 50 وقۋشى، تۇركىستان قالاسىنا 50 وقۋشىنىڭ ەكسكۋرسياسى قاراستىرىلدى، – دەيدى اقجارقىن مۇتيعوللاقىزى.
قالا مەكتەپتەرىنىڭ 1-10 سىنىپ وقۋشىلارىن جازعى دەمالىسپەن 100 پايىز قامتۋ كوزدەلىپ وتىر. وسى ماقساتقا اعىمداعى جىلى مەملەكەت قازىناسىنان 37 684 مىڭ تەڭگە قارجى بولىنگەن.
قالاداعى №50 ورتا مەكتەپ جانىنان اشىلعان «اق جەلكەن» جازعى لاگەرىندە قازىر 160 وقۋشى دەمالۋدا.
– №50 ورتا مەكتەپ – قالانىڭ شەتىندە ورنالاسقان مەكتەپ. بۇل مەكتەپتە بۇگىندە 1300 وقۋشى بار. قازىر ءبىرىنشى اۋىسىمدا لاگەردە 160 بالا دەمالىپ جاتىر. ونىڭ 30-ى – جەكەلەگەن ساناتتاعىلار، ولار بيۋدجەت قارجىسى ەسەبىنەن قامتىلعان. ال قالعان بالالار ەلۋ پايىز بيۋدجەت، ەلۋ پايىز اتا-انالاردىڭ قولداۋىمەن قارجىلاندىرىلدى. ولار ءبىر مەزگىل تاماقتانادى، تاڭعى 8.30-دان تۇسكى 13.30-عا دەيىن لاگەردە ويناپ، دەمالىپ، قوسىمشا ءبىلىم الادى، ءتۇرلى ۇيىرمەلەرگە قاتىسادى. جالپى بيىل ءۇش اۋىسىمدا 300 بالانى قامتۋدى جوسپارلاپ وتىرمىز. ونىڭ ىشىندە 30 بالا قالا سىرتىنداعى لاگەرگە جىبەرىلەدى، – دەيدى №50 ورتا مەكتەپ ديرەكتورى ءمولدىر جۇماعازيەۆا.
بىلىم ۇياسى بىرنەشە جىلدان بەرى قالا اۋماعىندا مەكتەپ وقۋشىلارىن جايلى لاگەرمەن قامتۋدا ءبىرىنشى ورىندا تۇر. قازىر لاگەردە مەكتەپتىڭ جاس ماماندارى تاربيەشى بولىپ قىزمەت ەتىپ ءجۇر.
– العاشقى ماۋسىمنىڭ اشىلۋ سالتاناتىندا بالالارعا بالمۇزداق تاراتىلدى، ءارتۇرلى انيماتورلار قوناققا كەلىپ، وقۋشىلارعا ەرەكشە كوڭىل كۇي سىيلادى. لاگەر كەزىندە ءتۇرلى ساۋىقتىرۋ باعىتىنداعى ءىس-شارالار ۇيىمداستىرىلىپ، بالالارعا ەستەن كەتپەستەي كوڭىل كۇي سىيلاۋعا تاربيەشىلەر شىنايى ىقىلاسىن سالۋدا. لاگەرگە مەكتەپ وقۋشىلارى ەرەكشە قۇلشىنىسپەن كەلىپ، وزدەرىنىڭ جازعى دەمالىسىن وسىلايشا كوڭىلدى باستادى. قازىرگى تاڭدا العاشقى اۋىسىمدا التى توپتا 160 وقۋشى دەمالىپ، ۋاقىتتارىن ءتيىمدى، كوڭىلدى وتكىزىپ جاتىر. بۇعان اتا-انالار دا، مەكتەپ ۇجىمى دا ەرەكشە قۋانىپ جاتىر. ءبىز ءۇشىن بالالاردىڭ قۋانىشىنان ارتىق ەشتەڭە جوق، – دەيدى مەكتەپ باسشىسى.
ايتا كەتۋ كەرەك، ءبىلىم بەرۋ ۇيىمدارىندا وتكەن جينالىستاردا بالالاردىڭ قاۋىپسىزدىگى، اتا-انالاردىڭ جاۋاپكەرشىلىگى تۋرالى ماسەلە بىرنەشە رەت كوتەرىلدى. بالالاردىڭ وزەن-سۋلارعا ەرەسەكتەردىڭ قاراۋىنسىز بارماۋى، سونداي-اق قوعامدىق ورىندارداعى ءوزىن-ءوزى ۇستاۋ ەرەجەلەرى ءتۇسىندىرىلدى. بالالاردى ساۋىقتىرۋ، بوس ۋاقىتتارىن ۇيىمداستىرۋ ورىندارىندا ورتكە قارسى قاۋىپسىزدىك شارالارى، سانيتاريالىق-ەپيدەميولوگيالىق تالاپتاردى ساقتاۋ قاتاڭ قاداعالاناتىن بولادى.
