مەملەكەتتىك رامىزدەر كۇنى ورال قالاسىنداعى تۇڭعىش پرەزيدەنت الاڭىندا سالتاناتتى تۇردە اتالىپ ءوتتى. بيىل رامىزدەرىمىزدىڭ قابىلدانعانىنا 32 جىل تولدى. ەسكە سالا كەتسەك، ەلىمىزدىڭ تۇڭعىش رامىزدەرى – تۋ مەن ەلتاڭبا 1992 جىلدىڭ 4 ماۋسىمىندا قابىلدانعان ەدى.
سالتاناتتى شارادا ءسوز العان وبلىس اكىمىنىڭ ورىنباسارى باقىتجان نارىمبەتوۆ بارشانى باتىس قازاقستان وبلىسى ناريمان تورەعاليەۆتىڭ اتىنان قاسيەتتى مەرەكەمەن قۇتتىقتادى.
– قازاقستان رەسپۋبليكاسىنىڭ رامىزدەرى – مەملەكەتتىك تۋ، مەملەكەتتىك ەلتاڭبا جانە مەملەكەتتىك گيمنى ءبىزدىڭ مەملەكەتتىڭ ەگەمەندىگى مەن بىرتۇتاستىعىن بەينەلەيتىن، اجىراعىسىز اتريبۋتتارىنىڭ ءبىرى. بيىل مەملەكەتتىك رامىزدەردىڭ تاريحىنداعى وقيعالار جەتكىلىكتى – مەملەكەتتىك تۋدىڭ اۆتورى شاكەن نيازبەكوۆتىڭ 80 جىلدىعى جانە تالعات مۇساباەۆتىڭ تۇڭعىش رەت مەملەكەتتىك تۋدى عارىشقا الىپ شىعۋىنا 30 جىل تولىپ وتىر.
پرەزيدەنتىمىز قاسىم-جومارت كەمەلۇلى توقاەۆ مەملەكەتتىك رامىزدەردىڭ رولىنە ايرىقشا ءمان بەرىپ كەلەدى. بۇگىندە بايراعىمىز بىرىككەن ۇلتتار ۇيىمىنىڭ تورىندە تۇر. ونى عارىشكەرلەرىمىز كوك جۇزىنە كوتەردى. الپينيستەرىمىز الەمنىڭ ەڭ بيىك شىڭدارىنا ورناتتى. سپورتشىلار جەڭىس تۇعىرىنان جەلبىرەتىپ، گيمنىمىزدى شىرقاتتى. كۇللى الەم قازاق ەلىن كوك بايراعىنا قاراپ تانيتىن بولدى. ءبىز – وسىنداي ساتتەردە قۋانامىز، رۋحىمىز كوتەرىلىپ، ەلىمىزدىڭ ەرتەڭىنە سەنەمىز! «بىرلىك بار جەردە تىرلىك بار!» دەگەن قازاقتىڭ دانا ءسوزى وسىندايدا ايتىلسا كەرەك. كەشەگى، 100 جىلدا ءبىر قايتالاناتىن، سۋ تاسقىنىمەن كۇرەسۋدە قازاقستاننىڭ تۇپكىر-تۇپكىرىنەن اۆتوكولىكتەرمەن ازاماتتار ءوز ەرىكتەرىمەن كەلىپ، ۇلەستەرىن قوستى. حالقىمىزدىڭ ەرەن ەڭبەگى مەن بىرلىگىنىڭ ارقاسىندا 84 ەلدىمەكەن سۋ اپاتىنان امان قالدى. قۇتقارۋشىلار، ۆولونتەرلەر، مەملەكەتتىك قىزمەتشىلەر، ساربازدار، ءتارتىپ ساقشىلارى، قوعام بەلسەندىلەرى، بيزنەس وكىلدەرى جانە جاستار – ءبارى بىرگە ءجۇردى. ورتاق ىستەن ەشكىم شەت قالعان جوق. وتانداستارىمىز زارداپ شەككەن جاندارعا جاپپاي قول ۇشىن سوزدى. ءبىر-بىرىنە شىنايى جاڭاشىر بولدى. ءبىز ۇلت رەتىندە سىن-ساعاتتا، قيىن قىستاۋدا اتا-بابامىزدان قالعان ءبىر تۋدىڭ استىندا بىرىگۋ قاسيەتىمىزدى جوعالتپاعانىمىزدىڭ دالەلى، – دەگەن باقىتجان قابەرۇلى توتەنشە جاعدايمەن كۇرەسۋگە زور ۇلەس قوسقان ناعىز وتانشىل ازاماتتارعا ريزاشىلىق ءبىلدىرىپ، العىس حاتتار تابىستادى. ولاردىڭ قاتارىندا جوعارى وقۋ ورنىنىڭ رەكتورلارى مەن ەرىكتى جاستار بار.
سولاردىڭ ءبىرى – جاس كاسىپكەر باۋىرجان باقتىعاليەۆ. بۇدان بۇرىن «Village park»، «A-frame» دەمالىس ورىندارىنىڭ نەگىزىن قالاۋشى، «Bal bala» باكشاسىنىن ينۆەستورى رەتىندە تانىمال جاس، بيىلدان باستاپ ەرىكتىلەر ساپىنا قوسىلدى. – ەل باسىنا قاۋىپ تونگەندە بەيجاي قاراي المادىم. «ورال جاستارى» چاتىندا سان سالادا جۇرگەن جاستار باس قوسىپ، وي بولىستىك. بارىمىزشا ەل ءۇشىن ەڭبەك ەتۋگە تىرىستىق. الەۋمەتتىك جەلىنىڭ الەۋەتىن ءتيىمدى پايدالانىپ، حالىققا دەر كەزىندە اقپارات جەتكىزىپ وتىردىق. ەڭبەگىمىزدى ەلەپ جاتقان جاندارعا العىسىم شەكسىز، – دەيدى 32 جاسار بەلسەندى.
مەرەكەلىك شارادا جاستاردىڭ رۋحىن وياتىپ، جىگەرىن جانيتىن پاتريوتتىق اندەر شىرقالىپ، جۇرتشىلىق ەرەكشە كوڭىل-كۇيمەن تارقاستى.
