Memlekettik rámizder kúni Oral qalasyndaǵy Tuńǵysh Prezıdent alańynda saltanatty túrde atalyp ótti. Bıyl rámizderimizdiń qabyldanǵanyna 32 jyl toldy. Eske sala ketsek, elimizdiń tuńǵysh rámizderi – Tý men Eltańba 1992 jyldyń 4 maýsymynda qabyldanǵan edi.
Saltanatty sharada sóz alǵan oblys ákiminiń orynbasary Baqytjan Narymbetov barshany Batys Qazaqstan oblysy Narıman Tóreǵalıevtiń atynan qasıetti merekemen quttyqtady.
– Qazaqstan Respýblıkasynyń rámizderi – Memlekettik Tý, Memlekettik Eltańba jáne Memlekettik Gımni bizdiń memlekettiń egemendigi men birtutastyǵyn beıneleıtin, ajyraǵysyz atrıbýttarynyń biri. Bıyl memlekettik rámizderdiń tarıhyndaǵy oqıǵalar jetkilikti – Memlekettik Týdyń avtory Sháken Nııazbekovtyń 80 jyldyǵy jáne Talǵat Musabaevtyń tuńǵysh ret Memlekettik Týdy ǵaryshqa alyp shyǵýyna 30 jyl tolyp otyr.
Prezıdentimiz Qasym-Jomart Kemeluly Toqaev memlekettik rámizderdiń róline aıryqsha mán berip keledi. Búginde baıraǵymyz Birikken Ulttar Uıymynyń tórinde tur. Ony ǵaryshkerlerimiz kók júzine kóterdi. Alpınısterimiz álemniń eń bıik shyńdaryna ornatty. Sportshylar jeńis tuǵyrynan jelbiretip, Gımnimizdi shyrqatty. Kúlli álem qazaq elin kók baıraǵyna qarap tanıtyn boldy. Biz – osyndaı sátterde qýanamyz, rýhymyz kóterilip, elimizdiń erteńine senemiz! «Birlik bar jerde tirlik bar!» degen qazaqtyń dana sózi osyndaıda aıtylsa kerek. Keshegi, 100 jylda bir qaıtalanatyn, sý tasqynymen kúresýde Qazaqstannyń túpkir-túpkirinen avtokóliktermen azamattar óz erikterimen kelip, úlesterin qosty. Halqymyzdyń eren eńbegi men birliginiń arqasynda 84 eldimeken sý apatynan aman qaldy. Qutqarýshylar, volonterler, memlekettik qyzmetshiler, sarbazdar, tártip saqshylary, qoǵam belsendileri, bıznes ókilderi jáne jastar – bári birge júrdi. Ortaq isten eshkim shet qalǵan joq. Otandastarymyz zardap shekken jandarǵa jappaı qol ushyn sozdy. Bir-birine shynaıy jańashyr boldy. Biz ult retinde syn-saǵatta, qıyn qystaýda ata-babamyzdan qalǵan bir Týdyń astynda birigý qasıetimizdi joǵaltpaǵanymyzdyń dáleli, – degen Baqytjan Qaberuly tótenshe jaǵdaımen kúresýge zor úles qosqan naǵyz otanshyl azamattarǵa rızashylyq bildirip, Alǵys hattar tabystady. Olardyń qatarynda joǵary oqý ornynyń rektorlary men erikti jastar bar.
Solardyń biri – jas kásipker Baýyrjan Baqtyǵalıev. Budan buryn «Village park», «A-frame» demalys oryndarynyń negizin qalaýshy, «Bal bala» bakshasynyn ınvestory retinde tanymal jas, bıyldan bastap eriktiler sapyna qosyldy. – El basyna qaýip tóngende beıjaı qaraı almadym. «Oral jastary» chatynda san salada júrgen jastar bas qosyp, oı bólistik. Barymyzsha el úshin eńbek etýge tyrystyq. Áleýmettik jeliniń áleýetin tıimdi paıdalanyp, halyqqa der kezinde aqparat jetkizip otyrdyq. Eńbegimizdi elep jatqan jandarǵa alǵysym sheksiz, – deıdi 32 jasar belsendi.
Merekelik sharada jastardyń rýhyn oıatyp, jigerin janıtyn patrıottyq ánder shyrqalyp, jurtshylyq erekshe kóńil-kúımen tarqasty.
