الماتى وبلىسىندا قازاقستان رەسپۋبليكاسىنىڭ مەملەكەتتىك رامىزدەرى كۇنىنە ارنالعان «تۇعىرلى تۋىم» جانە «پاتريوتتىق فورۋم» اتتى قوس شارا ءوتتى. اتالمىش شارالار وبلىستىق ىشكى ساياسات باسقارماسىمەن جانە «قوعامدىق كەلىسىم جانە دامۋ ورتالعى» كمم-ءنىڭ ۇيىتقى بولۋىمەن ىسكە استى.
«تۇعىرلى تۋىم» اتتى جيىن ىلە اۋدانى، وتەگەن باتىر كەنتىندەگى تۋ تۇعىردىڭ ماڭىندا ءوتتى. شارا ءانۇراننىڭ شىرقالۋى مەن مەملەكەتتىك تۋدىڭ سالتاناتتى تۇردە كوتەرىلۋى مەن وبلىس اكىمى مارات سۇلتانعازيەۆتىڭ اقجارما تىلەگىمەن باستالدى.
«قازاقستان رەسپۋبليكاسىنىڭ رامىزدەرى ءبىزدىڭ تاريحىمىزدى، مادەنيەتىمىزدى جانە ۇلتتىق قادىر-قاسيەتىمىزدى ەسكە سالادى. مەملەكەتتىك رامىزدەرىمىزدە بۇكىل قازاقستان حالقىن بىرىكتىرەتىن، جالپىۇلتتىق بىرەگەيلىگىمىزدى نىعايتاتىن قۇدىرەتتى كۇش بار. ولار ارقاشان جاڭا جەتىستىكتەرگە جەتۋ جولىندا بىزگە شابىت بەرىپ، كۇش-قۋاتىمىزدىڭ قاينار كوزى بولىپ قالا بەرەدى»، - دەپ قۇتتىقتادى ءوڭىر باسشىسى.
جيىن «قۇلانساز» فولكلورلىق-ەتنوگرافيالىق ءانسامبلىنىڭ «كوك تۋدىڭ جەلبىرەگەنى» اتتى پاتريوتتىق ءاندى ورىنداۋىمەن جالعاستى. ءان جينالعانداردىڭ جۇرەگىن تەبىرەنتىپ جانە وتانعا دەگەن ماقتانىش سەزىمىن وياتتى. سونىمەن قاتار، 30 بايكەردەن تۇراتىن موتوتسيكلشىلەر شەرۋى ءوتتى. ولار ەل بىرلىگى مەن كۇش-قۋاتىن بىلدىرەتىن مەملەكەتتىك تۋدى ىلە اۋدانىنان باستاپ قوناەۆ قالاسىنىڭ ورتالىق الاڭىنا دەيىن جەلبىرەتىپ جەتكىزدى.
ءىس-شارا قوناەۆ قالاسىنىڭ كىرەبەرىسىنەن ورتالىق الاڭعا دەيىنگى رەترو كولىكتەردىڭ سالتاناتتى شەرۋىنە ۇلاستى. قوناەۆ قالاسىنداعى رەترو كولىك سالونىنىڭ جەتەكشىسى ،مەتسەنات مۇرات سىرگەباەۆ تا شەرۋگە قاتىستى. تۇسكى ساعات 12:00-دە 10 مىڭنان استام وبلىس تۇرعىندارى ءبىراۋىزدان قازاقستان رەسپۋبليكاسىنىڭ ءانۇرانىن شىرقاپ، ەلجاندىلىق پەن ەرەكشە كۇيگە بولەندى. وسىلايشا، «پاتريوتتار فورۋمى» دەپ اتالعان شارا ءوز شىمىلدىعىن ءتۇردى.
ارتىنشا، قارعىن سۋمەن كۇرەستە الدىڭعى شەپتە ءجۇرىپ، وتانداستارىمىزعا قولداۋ بىلدىرگەنىڭىزگە وبلىستىق توتەنشە جاعدايلار قىزمەتكەرلەرىمەن، ەلدىڭ بايراعىن الەمدىك ارەنادا جەلبىرەتىپ جۇرگەن بىرقاتار ساڭلاق سپورتشىلار وبلىس باسشىسىنىڭ ارنايى العىس حاتىمەن ماراپاتتالدى.
شارانىڭ كوركىن پرەزيدەنتتىك وركەستردىڭ «ABYROY» توبىنىڭ ورىنداۋىنداعى «رۋح» ءانى كىرگىزە ءتۇستى. سونىمەن قاتار، جەرگىلىكتى ونەرپازداردا ءان مەن بيدەن شاشۋ شاشىپ، تۇرعىندارعا مەرەكەلىك كوڭىل-كۇي سىيلادى.
ايتا كەتەيىك، شارا بارىسىندا قالا تۇرعىندارى مەن قوناقتارى پاراشيۋتشىلەردىڭ كوك تۋمەن كورسەتكەن ونەرىنە دە كۋا بولدى. جالپى، مەرەكە كۇنى وبلىس كولەمىندە 300-دەن استام مەرەكەلىك ءىس-شارا ءوتىپ، 23.000-نان استام قاتىسۋشى جينالدى. وبلىستىڭ ءار اۋدانىندا تۋ كوتەرىلىپ، ءانۇران شىرقالدى.
