بۇگىن، 2024 جىلى 29 مامىردا قر پارلامەنتى ءماجىلىسىنىڭ جالپى وتىرىسىندا ءماجىلىس دەپۋتاتى، “اق جول” فراكتسياسى مۇشەسى قازىبەك يسا قر پرەمەر-ءمينيسترى ولجاس بەكتەنوۆكە ۇكىمەتتەن كەلەتىن دەپۋتاتتىق ساۋالدار جاۋاپتارىنىڭ جالعاندىعى مەن جالتارماسى تۋرالى ماسەلە كوتەردى.
قر پرەمەر-ءمينيسترى ولجاس بەكتەنوۆكە
قۇرمەتتى ولجاس ابايۇلى!
پارلامەنت دەپۋتاتتارى حالىقتىڭ زار-مۇڭىمەن تالابى ورىندالۋى ءۇشىن ۇكىمەتكە دەپۋتاتتىق ساۋالدار جولداپ جاتادى. ال ۇكىمەتتەن كەلىپ جاتقان جاۋاپتاردىڭ ساپاسى قانداي؟
كوپتەگەن جاۋاپتار شالا بولىپ، قاتە كەلەدى. «مەن نە دەيمىن، دومبىرام نە دەيدى؟» دەگەندەي، كەيدە مۇلدە بۇرمالانعان جاۋاپتار كەلىپ جاتادى...
ۇكىمەتتەن كەلگەن كەيبىر جاۋاپتاردى وقۋ ءۇشىن الدىن الا قان قىسىمىڭىزدى ولشەپ، قالىپقا تۇسىرەتىن ءدارى-دارمەگىڭىزدى دايىنداپ الماساڭىز، وزىڭىزگە وتە قيىن بولادى...
ءۇش جىل بۇرىن ۇكىمەت باسشىسى "مەملەكەتتىك ورگانداردا مەملەكەتتىك ءتىلدىڭ قولدانىلۋى 93 پايىز" دەپ جازعاندا، باقىتتان باسىمىز اينالىپ، قۇلاپ قالا جازداعانبىز… "پرەمەردىڭ شالا جاۋابىنا تولىق جاۋاپ" دەپ ەكىنشى رەت ساۋال جولداعانبىز.
جاقىندا ءبىز ءماسليحات دەپۋتاتتارىنىڭ مارتەبەسىن ايقىنداۋ تۋرالى ۇكىمەت باسشىسىنا دەپۋتاتتىق ساۋال جاسادىق.
وندا: كونستيتۋتسيادا ءماسليحاتتى اكىمدىككە تاۋەلسىز ەتىپ، بيلىك تارماقتارىنىڭ تەڭدىگىن جاساۋ قاجەت!»-دەپ مالىمدەگەنبىز.
ال ەندى جاۋاپتىڭ سيقىن كورەيىك:
«ءماسليحات دەپۋتاتتارىنا جەرگىلىكتى بيۋدجەتتىك كوميسسيالاردىڭ قۇرامىنا كىرۋ قۇقىعىن بەرۋ ۇسىنىلدى.»-دەيدى ءبارىن بىردەن جارىلقاپ تاستاعان سياقتى...
ال جەرگىلىكتى بيۋدجەتتىك كوميسسيا قۇرۋ ونسىز دا ءماسليحات دەپۋتاتتارىنىڭ قۇزىرەتىندە بولۋى كەرەك، وعان اكىمدەردەن رۇقسات سۇراۋدىڭ قاجەتى جوق.
ءارى قاراي ءتىپتى جارىلقاۋدىڭ كوكەسىنە تاپ بولدىق.
«- ءماسليحات تاراتىلعان جاعدايدا، دەپۋتاتتارعا ءۇش ايدان اسىرماي اي سايىن جاردەماقى تولەۋدى كوزدەيتىن نورما ۇسىنىلادى.- دەگەن جاۋاپ كەلىپتى...
بۇل ۇكىمەتتەن كەلگەن جاۋاپقا “اتام دا اڭ-تاڭ، مەن دە اڭ-تاڭ” دەگەندەي، تۇك تۇسىنبەي جاتىرمىز؟!.
ءبىز وزدەرىنىڭ كوبىسى جۇرتقا جالاقى بەرىپ جۇرەتىن كاسىپورىنداردى باسقاراتىن ءماسليحات دەپۋتاتتارىنا ء“ماسليحات تاراي قالسا، ءۇش ايلىق جالاقى تولەڭدەر» دەپ قاشان، قايدا سۇراپ ەدىك دەپ، ايران-اسىر بولىپ وتىرمىز...
ال ءبىزدىڭ ساۋالىمىزداعى: «كونستيتۋتسيادا ءماسليحاتتى اكىمدىككە تاۋەلسىز ەتىپ، بيلىك تارماقتارىنىڭ تەڭدىگىن جاساۋ قاجەت!»-دەگەن ەڭ باستى سۇراعىمىزعا ەشقانداي ناقتى جاۋاپ جوق.
بۇرىن «وسى ۇكىمەت، مينيسترلەر وزدەرى جازعان جاۋاپتى وقي ما دەيتىن ەدىك... قازىر «وسى مينيسترلەر دەپۋتاتتار جولداعان ساۋالدى وقي ما ءوزى؟» دەيتىن جاعدايعا جەتتىك…
«اعىمداعى جىل» ەمەس، ۇكىمەت جازاتىنداي، بيىل 13 ناۋرىزدا دەنساۋلىق مينيسترىنە جولداعان ساۋالىمىزدا مەديتسينالىق ساقتاندىرۋ قورىنىڭ تەتىكتەرىنىڭ ادىلەتسىزدىگىن ايتىپ، جاقىندا جاريالانعان تولەمدەردى 5 ەسە كوتەرۋگە قارسى شىقتىق. ەرتەڭىندە، دەنساۋلىق ءمينيسترىنىڭ الدىنا ءتۇسىپ الىپ شاپقان ۆيتسە-ءمينيسترى ت.سۇلتانعازيەۆ، جۋرناليستەرگە ءبىزدىڭ ساۋالدىڭ ناقتى ءمانىن بۇرمالاپ، ءوز ءسوزىن دالەلدەۋ ءۇشىن، وتىرىكتى سوعىپ جىبەردى...
ونىڭ بۇرمالاۋى بويىنشا، ءبىزدى «تولەمدەردى كوتەرۋدى ۇسىندى» دەپ تۇسىنۋگە بولادى. ال ءبىز، كەرىسىنشە، قورعا تولەنەتىن تولەمدەردى كوتەرۋگە قارسى شىققان ەدىك...
ۆيتسە-ءمينيستردىڭ «مىندەتتى ساقتاندىرۋداعى جەكە شوتتار تەك سينگاپۋر ەلىندە عانا بار» دەپ، جالعان اقپارات تاراتۋى قوعامدا جالعان پىكىر تۋعىزدى. ال شىن مانىندە، نارىقتىق، ياعني دەربەس مەديتسينالىق ساقتاندىرۋدى بارشا دامىعان مەملەكەتتەر پايدالانۋدا.
ۇكىمەت باسشىسىنا جاسالعان ەنەرگەتيكالىق ماشينە جاساۋ جايلى ساۋالىمىزعا دا شالا جاۋاپ كەلدى.
ۇكىمەتتەن كەلگەن كەيبىر جاۋاپتار قالاي جازىلاتىنىن قايدام، جاريالاۋعا ءبىز ۇيالامىز...
سوندىقتان دا، ۇسىنىستارىمىز:
1.ۇكىمەت دەپۋتاتتار ساۋالىندا كوتەرىلگەن ناقتى ماسەلەلەردى شەشۋى، ۇلتتىق مۇددەمىزدى قورعايتىن، ەلدىڭ جاعدايىن جاقسارتاتىن، حالىقتىڭ ماسەلەسىن شەشەتىن ناتيجەلى شارالار جاساۋى ءتيىس!
2. دەپۋتاتتىق ساۋالدارعا جالتارماي، بۇرمالاماي، ناقتى، تۋرا جانە تولىق جاۋاپ بەرۋدى تالاپ ەتەمىز.
قۇرمەتپەن، «اق جول» فراكتسياسى مۇشەلەرى
