اقتوبەدە ەكس-ايەلىن قىلقىندىرىپ ءولتىرگەن ەر ادام 11 جىلعا باس بوستاندىعىنان ايىرىلدى. بۇل تۋرالى اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى
ايىپتالۋشى ح. قىلمىستىق كودەكستىڭ 99-بابى 1-بولىگىمەن كىنالى دەپ تانىلىپ، 11 جىلعا سوتتالدى. سوت جابىرلەنۋشى تاراپتىڭ 25 ملن تەڭگە ءوندىرىپ الۋ تۋرالى تالاپ ارىزىن ءىشىنارا قاناعاتتاندىردى.
«ح.-دان س.-نىڭ پايداسىنا 318 062 تەڭگە ماتەريالدىق شىعىن، زاڭگەردىڭ كومەگىنە 500 مىڭ تەڭگە ءوندىرىلسىن. ح.-دان س.-نىڭ پايداسىنا 20 ملن تەڭگە مورالدىق زيان جانە مەملەكەت پايداسىنا ءوندىرىلسىن»،— دەدى سۋديا التىنبەك سابىروۆ.
جابىرلەنۋشى تاراپ سوت ۇكىمىنە نارازىلىق ءبىلدىردى. ولار اپەللياتسيالىق شاعىم تۇسىرەتىنىن ايتتى.
ەسكە سالايىق، قايعىلى وقيعا 2024 جىلدىڭ 31 قاڭتارىنان 1 اقپانعا قاراعان ءتۇنى تەمىر اۋدانىنىڭ شۇبارشي اۋىلىندا بولعان.
ەر ادام اقتوبە قالاسىنان 350 شاقىرىم قاشىقتاعى اۋىلعا بۇرىنعى ايەلىمەن قوسىلۋ ءۇشىن تاكسيمەن ىزدەپ بارعان. مارقۇممەن اڭگىمەلەسۋ بارىسىندا كەلىسپەۋشىلىك تۋىنداعان. سوتتالۋشى تالاپتارىنا كونبەگەن بۇرىنعى ايەلىنىڭ سوزىنە ىزىلانىپ، ونى ەكى مينۋت بويى تۇنشىقتىرعان. سوت-مەديتسينا ساراپتاما قورىتىندىسىنا سايكەس كەلىنشەكتىڭ قايتىس بولۋى سەبەبى مەحانيكالىق اسفەكسيا دەپ تانىلدى.