قىرعىزستان ميليتسياسى ەكس-پرەزيدەنت المازبەك اتامباەۆتى كۇشتەپ قاماۋعا الۋدى جوسپارلاپ وتىر، دەپ مالىمدەدى ونىڭ قوعامدىق باستامالار جونىندەگى كەڭەسشىسى قۇندىز جولدىباەۆا. بۇل تۋرالى ول Facebook-تە جازدى.
«سەنىمدى دەرەككوزدەردەن بەلگىلى بولعانداي، ەكس-پرەزيدەنت المازبەك اتامباەۆتى كۇشپەن تۇتقىنداۋعا بۇيرىق بەرىلدى. وپەراتسيانى ەرتەڭ كۇننىڭ ەكىنشى جارتىسىندا مىڭ جارىم قۇقىق قورعاۋ ورگاندارىنىڭ قىزمەتكەرلەرى جۇزەگە اسىرادى دەپ جوسپارلانىپ وتىر. بيلىك راديكالدى شارالاردىڭ سالدارى اۋىر بولۋى مۇمكىن ەكەنىن ۇمىتىپ كەتسە كەرەك»، - دەپ جازدى ول.
18 شىلدەدە ميليتسيا قىزمەتكەرلەرى اتامباەۆقا ىشكى ىستەر مينيسترلىگىنە تەرگەۋگە شاقىرۋ قاعازىن ءۇشىنشى رەت بەردى. ول 19 شىلدە كۇنى ساعات 10:00-دە قۇزىرلى ورگانعا كەلۋى كەرەك، دەپ حابارلادى Sputnik قىرعىزستان.
ءبىرىنشى رەت كۋاگەر رەتىندە تەرگەۋگە شاقىرتۋ قاعازى 8 شىلدە كۇنى بەرىلگەن. الايدا بۇرىنعى مەملەكەت باسشىسى جۋرناليستەرگە تەرگەۋگە بارمايتىنىن مالىمدەگەن. ونىڭ پىكىرىنشە، «بيلىك زاڭ شەڭبەرىنەن شىعىپ كەتكەن». ەكىنشى رەت تەرگەۋگە شاقىرۋ قاعازى 10 شىلدە كۇنى جىبەرىلگەن. بىراق ول ءىىم-گە بارماعان.
13 شىلدە كۇنى قىرعىزستان پارلامەنتى ارنايى كوميسسيا قۇرىپ، ونىڭ قورىتىندىسى بويىنشا المازبەك اتامباەۆتىڭ 6 قىلمىستىق ىسكە قاتىسى بارى انىقتالعان. 20 ماۋسىمدا جوگوركۋ كەنەش بۇل قورىتىندىنى ماقۇلداپ، باس پروكۋراتۋراعا جىبەرگەن. ال 25 ماۋسىمدا پروكۋراتۋرا التى فاكتىنىڭ بەسەۋىنە قاتىستى قىلمىستىق ءىس قوزعاۋعا بولاتىنىن حابارلاعان.
27 ماۋسىم كۇنى جوگوركۋ كەنەش المازبەك اتامباەۆتى ەكس-پرەزيدەنت مارتەبەسىنەن ايىرعان. بۇل شەشىمدى 103 دەپۋتات قولداپ، 6 دەپۋتات وعان قارسى داۋىس بەرگەن. وسىلايشا، بۇرىنعى مەملەكەت باسشىسى ەشكىمنىڭ تيىسپەۋى جونىندەگى قۇقىعىنان ايىرىلدى.
بۇگىندە المازبەك اتامباەۆقا قوي-تاس اۋىلىندا جەر تەلىمىن زاڭسىز الدى، قىلمىستىق الەمنىڭ سەركەسى ا.باتۋكاەۆتى زاڭسىز بوساتتى، سۋبيحي ءپارحاتيدىڭ «فورۋم» عيماراتىن الاياقتىق جولمەن ساتتى، بىشكەك قالاسىنداعى جەس-ءتى رەكونسترۋكتسيالاۋ مەن وعان كومىر ساتىپ الۋ جۇمىستارى كەزىندە سىبايلاس جەمقورلىققا جول بەردى دەگەن ايىپتار تاعىلىپ وتىر.
"ادىرنا" ۇلتتىق پورتالى
