جاڭا وقۋ جىلى قارساڭىندا الماتى وبلىسىندا «كەلەشەك مەكتەپتەرى» جوباسى اياسىندا 4 200 ورىنعا شاقتالعان بەس جاڭا ءبىلىم وشاعى اشىلادى. سونىمەن قاتار رەنوۆاتسيا باعدارلاماسى اياسىندا تاعى 10 مەكتەپ كۇردەلى جوندەۋدەن وتكىزىلىپ، پايدالانۋعا بەرىلمەك. بۇل تۋرالى الماتى وبلىسىنىڭ اكىمى مارات سۇلتانعازيەۆ «كونستيتۋتسيالىق قۇندىلىقتار: كاسىبيلىك، ساپا، ناتيجە» اتتى وبلىستىق تامىز ءماسليحاتىندا مالىمدەدى.
سونىمەن قاتار وبلىستا مەكتەپ تاپشىلىعىن جويۋ ماقساتىندا جاڭا جوبالار دا ازىرلەنۋدە. ماسەلەن، الماتى اكىمدىگىمەن بىرلەسىپ، بىرنەشە جاڭا مەكتەپ سالۋ جوسپارلانۋدا. وبلىس اكىمدىگى جەر ۋچاسكەلەرىن انىقتاپ قويعان، قازىرگى تاڭدا تاراپتار كەلىسسوزدەر جۇرگىزۋدە.
«الماتى اگلومەراتسياسىن دامىتۋ اياسىندا قالا ماڭىنداعى اۋماقتاردا جاڭا ءبىلىم بەرۋ نىساندارىن سالۋ جونىندە كەلىسىمدەرگە قول جەتكىزىلدى. ءبىزدىڭ تاراپىمىزدان جەر ۋچاسكەلەرىن ۇسىنامىز. بۇگىندە ولار انىقتالدى، بارلىق قاجەتتى اقپارات الماتىنىڭ جوبالىق كەڭسەسىنە جولداندى. بولجام بويىنشا قۇنى 41,8 ملرد تەڭگەنى قۇرايتىن بەس جاڭا مەكتەپ سالۋ مۇمكىندىگى قاراستىرىلۋدا. بۇل جوبالار جۇزەگە اسسا، بالالاردى تۇرعىلىقتى جەرى بويىنشا مەكتەپ ورىندارىمەن قامتاماسىز ەتۋگە جانە الماتىعا كۇندەلىكتى قاتىناۋدى ازايتۋعا مۇمكىندىك بەرەدى. بۇگىندە وبلىستا تۇراتىن 16 مىڭعا جۋىق وقۋشى قالا مەكتەپتەرىندە ءبىلىم الۋدا»، - دەدى الماتى وبلىسىنىڭ اكىمى مارات سۇلتانعازيەۆ.
جوسپارعا سايكەس، ارقايسىسى 900 ورىندىق ەكى مەكتەپ الاتاۋ قالاسىنىڭ جاڭا ءداۋىر شاعىن اۋدانىندا جانە ىلە اۋدانىنداعى ەكپىندى اۋىلىندا سالىنباقشى. قاراساي اۋدانىنداعى كوكساي جانە قىرعاۋىلدى اۋىلدارىندا ارقايسىسى 1 200 ورىنعا ارنالعان تاعى ەكى مەكتەپ بوي كوتەرەدى. تالعار اۋدانىنىڭ تۇزدىباستاۋ اۋىلىندا 900 ورىندىق ءبىلىم وشاعىن سالۋ جوسپارلانعان. وسىلايشا، بەس مەكتەپتىڭ جالپى جوبالىق قۋاتى 5 100 وقۋشى ورنىن قۇرايدى.
سونىمەن قاتار قىركۇيەك ايىندا وبلىستا «كەلەشەك مەكتەپتەرى» جوباسى اياسىندا سالىنعان تاعى بەس جاڭا مەكتەپ وقۋشىلار ءۇشىن ەسىگىن ايقارا اشادى. ولار الاتاۋ قالاسىنىڭ قويانقۇس اۋىلىندا، ىلە اۋدانىنىڭ تىلەنديەۆ اۋىلىندا، قاراساي اۋدانىنىڭ بۇلاقتى اۋىلىندا، سونداي-اق ەڭبەكشىقازاق اۋدانىنىڭ ساتاي جانە اششىساي اۋىلدارىندا ورنالاسقان. وسىلايشا اتالعان ەلدى-مەكەندەردەگى ءۇش اۋىسىمدى مەكتەپ ماسەلەسى تولىق شەشىلىپ، تاعى ەكى مەكتەپتەگى وقۋشى ورىندارىنىڭ تاپشىلىعى جويىلادى دەپ كۇتىلۋدە.
وڭىردەگى جوعارى دەموگرافيالىق ءوسىم جاعدايىندا جاڭا نىسانداردىڭ قۇرىلىسى ءبىلىم بەرۋ جۇيەسىندەگى ينفراقۇرىلىم تاپشىلىعىن ازايتۋ ءۇشىن اسا ماڭىزدى.
2026 - 2027 وقۋ جىلىندا الماتى وبلىسىنىڭ 502 جالپى ءبىلىم بەرەتىن مەكتەبىندە شامامەن 385 مىڭ بالا ءبىلىم الادى. ونىڭ 35 مىڭنان استامى بيىل العاش رەت مەكتەپ تابالدىرىعىن اتتايتىن ءبىرىنشى سىنىپ وقۋشىلارى.
«الماتى وبلىسى - دەموگرافيالىق ءوسىمى جوعارى جانە جاستاردىڭ ۇلەسى باسىم وڭىرلەردىڭ ءبىرى. وسىعان بايلانىستى ينفراقۇرىلىم تاپشىلىعىن جويۋ ماسەلەسى باستى نازاردا. سوڭعى ءتورت جىلدا وبلىستا 75 جاڭا مەكتەپ اشىلىپ، التى قوسىمشا عيمارات پايدالانۋعا بەرىلدى. ناتيجەسىندە ءۇش اۋىسىمدى مەكتەپتەردىڭ سانى 52-دەن 23-كە دەيىن قىسقاردى، شالعاي ەلدى مەكەندەردەن 5 821 وقۋشىنى تاسىمالداۋ ماسەلەسى شەشىلدى»، - دەدى وبلىس اكىمى.
جاڭا مەكتەپتەر سالۋمەن قاتار، قولدانىستاعى ءبىلىم بەرۋ نىساندارىنىڭ ينفراقۇرىلىمى دا جاڭارتىلۋدا. وڭىردە كۇردەلى جوندەۋدى قاجەت ەتەتىن 91 ءبىلىم بەرۋ نىسانى انىقتالعان. بيىل وبلىستاعى 11 مەكتەپتە كۇردەلى جوندەۋ جۇمىستارى جۇرگىزىلۋدە. ونىڭ 10-ى جاڭا وقۋ جىلىندا پايدالانۋعا بەرىلەدى.
سونداي-اق حالىق تىعىز ورنالاسقان اۋىلداردا مەكتەپ سالۋ ماسەلەسى دە باستى نازاردا. 2026–2030 جىلدارى EPC+F مەحانيزمى ارقىلى ىلە اۋدانىنداعى وتەگەن باتىر، جايناق، بايسەركە جانە ا. توقپانوۆ اۋىلدارىندا، سونداي-اق ەڭبەكشىقازاق اۋدانىنداعى بايتەرەك اۋىلىندا جالپى سىيىمدىلىعى 4 200 ورىن بولاتىن بەس مەكتەپ سالۋ جوسپارلانۋدا.
بۇل جوبالار ىسكە اسىرىلسا ءۇش اۋىسىمدا وقىپ جۇرگەن جەتى مىڭنان استام وقۋشىنىڭ ماسەلەسى تولىق شەشىلىپ، شالعاي ەلدى مەكەندەردەن تاسىمالداناتىن تاعى 2 871 بالا ءوز اۋىلىندا ءبىلىم الاتىن بولادى.
