بۇگىنگى تاڭدا وبلىستا ءتورت حالىقارالىق (سامارا، ورىنبور، تولياتتي، ساراتوۆ), ءبىروبلىسارالىق مارشرۋت جۇمىس ىستەيدى (اتىراۋ). 24 اۋدانارالىق مارشرۋتقا 18 تاسىمالداۋشى قىزمەت كورسەتەدى. بارلىق 12 اۋدان ورتالىعى اۆتوبۋس مارشرۋتتارىمەن قامتىلعان. بۇل تۋرالى بقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باۋىرجان ايتماعامبەتوۆ ايتىپ بەردى.
باۋىرجان ەسقايىرۇلىنىڭ ايتۋىنشا، 2023 جىلى وتكەن كونكۋرستار قورىتىندىسى بويىنشا ورالدان ۇش اۋدانارالىق اۆتوبۋس مارشرۋتى قايتا اشىلدى. قازتالوۆ، جىمپيتى جانە بيىل ءسارىومىر، قامىستى، سايقىن مارشرۋتتارى جاڭادان وينالىپ، قىزمەت كورسەتە باستاعان. بىلتىر الەۋمەتتىك ماڭىزى بار باعىتتاردا 233 743 جولاۋشى تاسىمالدانعان.
– سوڭعى جىلدارى وبلىستىق بيۋدجەتتەن بولىنەتىن سۋبسيديا كولەمى ارتىپ كەلەدى، سونىمەن قاتار سۋبسيديالاناتىن مارشرۋتتار سانى دا وسۋدە. بيىلعى جىلعا 382,8 ملن تەڭگە سۋبسيديا ءبولىندى. بۇگىنگى كۇنگە 13 تاسىمالداۋشى 16 مارشرۋت بويىنشا سۋبسيديا الىپ وتىر. جالپى اۋدان ورتالىقتارىنا قاتىنايتىن الەۋمەتتىك ماڭىزى بار مارشرۋتتاردى سۋبسيديالاۋ تۇرعىنداردىڭ از قامتىلعان بولىگى ءۇشىن قولجەتىمدىلىكتى قامتاماسىز ەتىپ، الەۋمەتتىك ماسەلەلەردى شەشۋگە ىقپال ەتتى، – دەيدى باسقارما باسشىسى.
سۋبسيديا جانە وبلىس اكىمدىگىنىڭ قولداۋى ارقاسىندا اۋدانارالىق مارشرۋتتاردا قىزمەت كورسەتەتىن تاسىمالداۋشىلاردىڭ اۆتوپاركتەرى جاڭارتىلىپ كەلەدى. 2020-2023 جىلدار كەزەڭىندە 15 جاڭا اۆتوبۋس ساتىپ الىندى. بۇل جولاۋشىلارعا قىزمەت كورسەتۋ ساپاسىن جاقسارتۋعا ءوز اسەرىن تيگىزدى. ءبىزدىڭ وبلىس ارقىلى «الماتى-ساراتوۆ» حالىقارالىق پويىزى، «ورال-استانا»، «ورال-الماتى»، «ورال-ماڭعىشلاق» وبلىسارالىق پويىزدارى، «ورال-سەميگلاۆىي مار» جانە «ورال-شىڭعىرلاۋ» اۋدانارالىق پويىزدارى وتەدى. «ورال-سەميگلاۆىي مار» جانە «ورال-شىڭعىرلاۋ» الەۋمەتتىك ماڭىزى بار مارشرۋتتارىن سۋبسيديالاۋ باعدارلاماسى ىسكە اسىرىلۋدا. ۇستىمىزدەگى جىلعا 209,0 ملن تەڭگە سۋبسيديا بولىنگەن. قازىرگى ۋاقىتتا ورال قالاسىنىڭ حالىقارالىق اۋەجايى ارقىلى 7 باعىت بويىنشا جولاۋشىلار رەيستەرى جۇزەگە اسىرىلادى، ونىڭ ىشىندە 5 ىشكى رەسپۋبليكالىق (استانا، الماتى، تۇركىستان، اقتاۋ، اتىراۋ) جانە 2 حالىقارالىق (فرانكفۋرت، انتاليا). ماۋسىم ايىندا شىمكەنت جانە شارم-ەل-شەيحكە ۇشۋلار جانداندىرىلادى. جوبانىڭ جالپى قۇنى 6,6 ملرد تەڭگە بولاتىن اۋەجاي تەرمينالىنىڭ عيماراتىن رەكونسترۋكتسيالاۋدان كەيىن اۋەجايدىڭ جاڭا تەرمينالىنىڭ وتكىزۋ قابىلەتى 400 جولاۋشى/ساع. قۇرايدى.
بۇگىنگى تاڭدا «ورال» حالىقارالىق اۋەجايى» جشس مامانداندىرىلعان جوبالاۋ ۇيىمىن تارتا وتىرىپ، «ا» رۋلدىك جولى مەن پەرروننىڭ جاساندى جابىندارىن رەكونسترۋكتسيالاۋعا جوبالاۋ-سمەتالىق قۇجاتتاما ازىرلەدى. ازىرلەۋدىڭ جالپى قۇنى 71 ملن تەڭگە. جسق مەملەكەتتىك ساراپتامادان وتۋدە، ونى اياقتاۋ 2024 جىلدىڭ 2 توقسانىندا جوسپارلانىپ وتىر. مەملەكەتتىك ساراپتامانىڭ وڭ قورىتىندىسىن العان جاعدايدا مەردىگەر ۇيىمدى ايقىنداۋ بويىنشا كونكۋرس وتكىزىلەتىن بولادى.
