ورال قالاسىنداعى №481 سايلاۋ ۋچاسكەسىندە سايلاۋشىلار تاريحقا دەيىنگى ەرەكشە ءساتتىڭ كۋاسى بولدى. يۋرا داۋىرىنەن كەلگەن قوناقتار ەجەلگى كەسىرتكەلەرگە ءتان دىبىستار شىعارىپ، سايلاۋ ۋچاسكەسىنە كىرىپ، بيۋللەتەن الىپ، ءوز تاڭداۋلارىن جاسادى.
الايدا جۇرتشىلىقتىڭ زور ىقىلاسىنا بولەنگەن ولار ۋچاسكەدەن بىردەن شىعىپ كەتە المادى. ەستەلىككە سۋرەتكە تۇسكىسى كەلگەندەردىڭ قاراسى كوپ بولدى.
№481 سايلاۋ ۋچاسكەسى قالانىڭ قارقىندى دامىپ كەلە جاتقان اۋدانىندا ورنالاسقان. مۇندا كىشكەنتاي بالالارى بار وتباسىلار كوپ تۇرادى. سايلاۋ كۇنى ولار دا ۇيلەرىندە قالماي، اتا-انالارىمەن بىرگە داۋىس بەرۋگە كەلدى. سوندىقتان انيماتورلاردىڭ بۇل كرەاتيۆتى يدەياسى كوپشىلىك كوڭىلىنەن شىقتى.
«بالالارعا سايلاۋعا كەلگەن قىزىق بولادى دەپ ويلاعانبىز. بىراق ولارعا سونشالىقتى ۇنايدى دەپ كۇتپەدىك»، — دەيدى بالالارىمەن بىرگە داۋىس بەرۋگە كەلگەن قالا تۇرعىنى.
كوستيۋمدىك قويىلىمدى ۇيىمداستىرعان جاستاردىڭ ايتۋىنشا، ولار سايلاۋ ۋچاسكەسىندەگى رەسمي ءارى بايىپتى اتموسفەرانى ازداپ كوڭىلدى كورىنىسپەن ارلەۋدى عانا قالاعان.
«داۋىس بەرۋگە تەك ەرەسەكتەر قاتىسا الادى. ال بالالار قايتپەك؟ ولارعا دا قىزىقتى بولۋى كەرەك»، — دەدى دينوزاۆرلاردىڭ ءبىرى.
