ورال قالاسىندا باتىس قازاقستان وبلىسىنىڭ پروكۋراتۋراسى ۇيىمداستىرعان «زاڭ مەن ءتارتىپ: ءدىننىڭ ءرولى» تاقىرىبىنداعى دوڭگەلەك ۇستەل ءوتتى. جيىنعا وبلىس باسشىلىعى، مەملەكەتتىك جانە قۇقىق قورعاۋ ورگاندارىنىڭ وكىلدەرى، ءداستۇرلى ءدىني بىرلەستىكتەر مەن بيزنەس قاۋىمداستىعى قاتىستى.
وبلىس پروكۋرورى نۇربەك ۇلاسبەكۇلى قوعامدىق قاۋىپسىزدىكتى قامتاماسىز ەتۋ مەملەكەت، قوعام جانە بيزنەستىڭ بىرلەسكەن جۇمىسىنا بايلانىستى ەكەنىن ايتتى. ول مىسال رەتىندە «قاۋىپسىز ءوڭىر» جوباسىنىڭ ناتيجەلەرىن كەلتىردى. جوبا اياسىندا 12 اۋلا اباتتاندىرىلىپ، 300 بەينەباقىلاۋ كامەراسى ورناتىلدى، 17 كوشە مەن التى مەكتەپكە كىرەبەرىس جول جارىقتاندىرىلدى. سونىڭ ناتيجەسىندە قىلمىس دەڭگەيى 18 پايىزعا تومەندەگەن.
وبلىس اكىمىنىڭ ورىنباسارى قايىرجان مەڭدىعاليەۆ قوعامداعى زاڭ ۇستەمدىگىن نىعايتۋدا ءداستۇرلى دىندەردىڭ ورنى ەرەكشە ەكەنىن اتاپ ءوتتى. ونىڭ ايتۋىنشا، جاستاردىڭ قۇقىقتىق جانە ءدىني ساۋاتتىلىعىن ارتتىرۋ ماڭىزدى مىندەتتەردىڭ ءبىرى. بۇل باعىتتا ورالداعى «YNTYMAQ» كونفەسسياارالىق كەلىسىم ورتالىعى تەولوگيالىق جانە قۇقىقتىق كەڭەس بەرىپ، اقپاراتتىق-ءتۇسىندىرۋ جۇمىستارىن جۇرگىزۋدە.
قازىر وبلىستا سەگىز كونفەسسيانى بىرىكتىرەتىن 96 ءدىني بىرلەستىك جۇمىس ىستەيدى. ولارعا 300 مىڭنان استام ادام قاتىسادى. بۇل الەۋەت قۇقىق بۇزۋشىلىقتىڭ الدىن الۋ، قوعامدىق كەلىسىمدى نىعايتۋ جانە «زاڭ مەن ءتارتىپ» قاعيداتتارىن ناسيحاتتاۋ باعىتىندا پايدالانىلماق.
دوڭگەلەك ۇستەل قورىتىندىسىندا ءداستۇرلى ءدىني بىرلەستىكتەردىڭ «قاۋىپسىز ءوڭىر» جوباسىنا قاتىسۋىن كەڭەيتۋ جونىندەگى باستاما قولداۋ تاپتى.
