باتىس قازاقستان وبلىسىندا رەسپۋبليكالىق ماڭىزى بار جول بويىندا 1 ملرد تەڭگەنىڭ ينۆەستيتسيالىق جوباسى ىسكە قوسىلدى. سىرىم اۋدانىنىڭ جىمپيتى اۋىلىندا اۆتوگاز تولتىرۋ كومپرەسسورلىق ستانتسياسى بار سەرۆيستىك قىزمەت كورسەتۋ كەشەنى اشىلدى.
سالتاناتتى راسىمگە جينالعاندارعا وبلىس اكىمى ناريمان تورەعاليەۆتىڭ قۇتتىقتاۋىن جەتكىزگەن ونىڭ ورىنباسارى ميراس مۇلكاي توعىز جولدىڭ تورابىندا سەرۆيستىك ينفراقۇرىلىمدى دامىتۋ ءارى ەكولوگيالىق تازا وتىن ءتۇرىن قولدانۋعا باعىتتالعان ستراتەگيالىق جوبانىڭ ماڭىزىنا توقتالدى. 
- مۇنداي ستانتسيا وڭىردەگى رەسپۋبليكالىق ماڭىزى بار اۆتوكولىك جولىنىڭ بويىندا العاش رەت ىسكە قوسىلدى. مەتاندى پايدالانۋ قورشاعان ورتاعا زياندى ازايتىپ، جاسىل ەكونوميكانى دامىتۋعا وڭ اسەرىن تيگىزەدى. ايماق باسشىسى ناريمان تورەعاليەۆتىڭ تىكەلەي تاپسىرماسىمەن بيىل نەگىزگى كاپيتالعا تارتىلاتىن ينۆەستيتسيا كولەمىن 1 ترلن 51,2 ملرد تەڭگەگە جەتكىزۋ مىندەتى جۇكتەلدى. بارلىق باعىت بويىنشا كەشەندى جۇمىستار جۇرگىزىلۋدە، - دەدى ميراس مۇلكاي.
جوبانى «الاش مەتان» جشس جۇزەگە اسىردى. سىعىلعان تابيعي گازدى قولدانىسقا بەرەتىن ستانتسيانىڭ جىلدىق قۋاتى 21 ملن تەكشە مەترگە دەيىن جەتەدى. كەشەندە بۇدان بولەك جول بويى قىزمەت كورسەتۋ پۋنكتى، دۇكەن، سانيتارلىق-تۇرمىستىق بولمەلەر، جەڭىل جانە جۇك كولىكتەرىنە ارنالعان اۆتوتۇراق قاراستىرىلعان. كاسىپورىندا 14 جەرگىلىكتى تۇرعىن جۇمىسپەن قامتىلدى.
ايتا كەتەيىك، سىرىم اۋدانىندا بيىل نەگىزگى كاپيتالعا 10 ملرد تەڭگە ينۆەستيتسيا تارتۋ كوزدەلگەن. قازىرگى تاڭدا جوسپاردىڭ جارتىسى ورىندالدى.
