اقىن، فيلولوگيا عىلىمدارىنىڭ دوكتورى وتەگەن كۇمىسباەۆتىڭ تۋعانىنا 85 جىل تولدى، دەپ حابارلايدى “ادىرنا” ۇلتتىق پورتالى.
وتەگەن كۇمىسباەۆ (1939 – 2016) 20 مامىردا قىزىلوردا وبلىسى جالاعاش اۋدانىندا تۋعان.
قىزىلوردا قالاسىنداعى ع.مۇراتباەۆ اتىنداعى ورتا مەكتەپتى بىتىرگەننەن كەيىن، اۋداندىق گازەتتە ادەبي قىزمەتكەر بولىپ ىستەگەن. 1963 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن بىتىرگەن. «سوتسياليستىك قازاقستان» (قازىرگى «ەگەمەن قازاقستان»), «قازاق ادەبيەتى» گازەتتەرىندە ادەبي قىزمەتكەر، ءبولىم مەڭگەرۋشىسى بولىپ ىستەدى.
1969-74 جج. ماسكەۋدەگى كسرو عا-نىڭ شىعىستانۋ ينستيتۋتىندا وقىپ، وسى ينستيتۋتتىڭ اسپيرانتۋراسىنا تۇسكەن. 1974 جىلى «تۇرماعامبەت ىزتىلەۋوۆ جانە ونىڭ «رۇستەم-داستانى» دەگەن تاقىرىپتا كانديداتتىق ديسسەرتاتسيا قورعادى.
كوپ جىل بويى ءال-فارابي اتىنداعى قازۇۋ-دا ۇستاز بولدى. فيلولوگيا عىلىمدارىنىڭ دوكتورى. وننان استام ولەڭ، اڭگىمە، پوۆەست، عىلىمي كىتاپتاردىڭ اۆتورى. ولەڭدەرى ورىس تىلىنە اۋدارىلىپ، «سوليدارنوست»، «ليتەراتۋرا ي تى»، «مى – مولودىە» سەكىلدى ماسكەۋدە شىققان جيناقتاردا باسىلعان، شەت ەلدەر تىلىنە اۋدارىلعان. پارسى-ءۇندى كلاسسيگى ءامىر حۇسراۋ دەحلەۆيدىڭ «جۇماقتىڭ سەگىز باعى» داستانىن تۇپنۇسقاسىنان، سونداي-اق م.رىلسكيدىڭ «راۋشان مەن ءجۇزىم» ولەڭ-پوەمالار كىتابىن (1987) ءتارجىمالادى. ر.عامزاتوۆ، ۆس.روجدەستۆەنسكي، ياۆۋحۋلان جىرلارىن قازاقشالاعان. پولياك رەۆوليۋتسيونەرى يانۋشكەۆيچ جونىندە رومان جازعان.
شىعىس ادەبيەتى مەن قازاق ادەبيەتىنىڭ ءوزارا بايلانىسىن زەرتتەۋگە ارنالعان «تەرەڭ تامىرلار»، «اباي جانە شىعىس» (1995), «مۇحتار اۋەزوۆ جانە ادەبيەت الەمى» (1997) مونوگرافيالارى بار.
سونداي-اق، جۇرت اۋەندەتىپ ءالى كۇنگە دەيىن ايتىپ جۇرگەن “تامشىلار” ءانىنىڭ ءسوزىن جازعان.
