گرۋزيا پرەزيدەنتى پارلامەنتتىڭ ءۇش وقىلىمدا قابىلداعان «شەتەلدىك ىقپالدىڭ اشىقتىعى تۋرالى» زاڭعا قول قويدى، دەپ حابارلايدى "ادىرنا" ۇلتتىق پورتالى BBC-گە سىلتەپ.
پرەزيدەنت سالومە زۋرابيشۆيلي وسى اپتانىڭ باسىندا ەل پارلامەنتى قابىلداعان «شەتەلدىك ىقپالدىڭ اشىقتىعى تۋرالى» زاڭعا ۆەتو قويدى. بۇل تۋرالى پرەزيدەنت فەيسبۋك پاراقشاسىندا جاريالاعان.
«مەن "رەسەي زاڭىنا" ۆەتو قويدىم. بۇل زاڭ ءوز ءمانى بويىنشا، ءوز رۋحى بويىنشا ءبىزدىڭ كونستيتۋتسياعا جانە بارلىق ەۋروپالىق ستاندارتتارعا قايشى كەلەتىن رەسەيلىك زاڭ بولىپ تابىلادى جانە وسىلايشا ءبىزدىڭ ەۋروپالىق جولىمىزعا كەدەرگى بولىپ تابىلادى»، - دەدى پرەزيدەنت.
پرەزيدەنتتىڭ ايتۋىنشا، ۆەتو 18 مامىر كۇنى پارلامەنتكە جىبەرىلگەن.
«بۇل زاڭ ەشبىر وزگەرتۋگە نەمەسە جاقسارتۋعا جاتپايدى... بۇل زاڭنىڭ كۇشى جويىلۋى كەرەك»، - دەدى پرەزيدەنت.
بيلىكتەگى «گرۋزين ارمانى» پارتياسى ءزۋرابيشۆيليدىڭ ۆەتوسىن جوققا شىعارۋ ءۇشىن پارلامەنتتە جەتكىلىكتى داۋىسقا يە.
ال 14 مامىردا گرۋزيا پارلامەنتى «شەتەلدىك ىقپالدىڭ اشىقتىعى تۋرالى» زاڭ جوباسىن ءۇشىنشى جانە سوڭعى وقىلىمدا قابىلدادى. زاڭ جوباسىن ءۇشىنشى وقىلىمدا 84 دەپۋتات قولدادى. وتىز ادام قارسى داۋىس بەردى.
بۇل زاڭ مىڭداعان نارازىلىق پەن باتىستىق سەرىكتەستەردىڭ گرۋزيا بيلىگىنە قارسى بۇرىن-سوڭدى بولماعان سىنعا الىپ كەلدى.
پارلامەنتتەگى تالقىلاۋ تبيليسي ورتالىعىندا ءجيى شەرۋشىلەر مەن پوليتسيا اراسىنداعى قاقتىعىستارمەن جانە تۇتقىنداۋلارمەن اياقتالاتىن جاپپاي نارازىلىقتار فونىندا ءوتتى.
وپپوزيتسيانىڭ پىكىرىنشە، زاڭ جوباسى «شەتەل اگەنتتەرى» تۋرالى رەسەيلىك زاڭنامانى قايتالايدى، ال زاڭنىڭ قابىلدانۋى رەسەيلىك ستسەناريگە اينالۋ قاۋپى بار — بيلىكتى سىنايتىن تاۋەلسىز ۇيىمدار مەن باق جۇمىسىن ستيگماتيزاتسيالاۋ جانە توقتاتۋ.
سونىمەن قاتار، زاڭعا قارسىلار زاڭ جوباسىن تەك ءسوز بوستاندىعى مەن ازاماتتىق قوعامعا عانا ەمەس، وسىدان جارتى جىل بۇرىن ەو مۇشەلىگىنە ۇمىتكەر مارتەبەسىن العان گرۋزيانىڭ ەۋروينتەگراتسياسىنا قاۋىپ توندىرەدى دەپ سانادى.
ەسكە سالا كەتەيىك، گرۋزيا پرەزيدەنتى سالومە زۋرابيشۆيلي بۇعان دەيىن پارلامەنت زاڭدى سوڭعى وقىلىمدا ماقۇلداسا، وعان ۆەتو قۇقىعى قويىلاتىنىن مالىمدەگەن بولاتىن.
