گرۋزيانىڭ بۇرىنعى پرەزيدەنتى ميحايل سااكاشۆيلي تبيليسيدەگى كلينيكادان شىعارىلىپ، جازاسىن وتەۋ ءۇشىن تۇرمەگە قايتارىلدى، دەپ حابارلايدى «ادىرنا» ءتىلشىسى.
ادىلەت مينيسترلىگىنە قاراستى پەنيتەنتسيارلىق قىزمەت سااكاشۆيليدىڭ دەنساۋلىق جاعدايىن «قاناعاتتانارلىق» دەپ باعالاپ، ونىڭ ەندى ستاتسيونارلىق ەمدەۋدى قاجەت ەتپەيتىنىن ايتتى.
«سوتتالعان ميحايل سااكاشۆيليدىڭ دەنساۋلىعى قاناعاتتانارلىق دەڭگەيدە بولعاندىقتان جانە ول ەندى ستاتسيونارلىق ەم قابىلداۋدى قاجەت ەتپەيتىندىكتەن، ازاماتتىق سەكتورداعى كلينيكادان شىعارىلىپ، جازاسىن جالپى تارتىپپەن جالعاستىرۋ ءۇشىن №12 پەنيتەنتسيارلىق مەكەمەگە قايتا ورنالاستىرىلدى»،–دەلىنگەن حابارلامادا.
ايتا كەتەيىك، ول كلينيكاعا 2022 جىلدىڭ مامىرىندا تۇرمەدە جۇرگىزگەن اشتىق اكتسياسىنان كەيىن اۋىستىرىلعان بولاتىن.
2021 جىلدىڭ 1 قازانىندا ۇستالعان ەكس-پرەزيدەنت بىردەن بەس قىلمىستىق ءىس بويىنشا ايىپتالىپ وتىر. سونىڭ ىشىندە ەكى ءىس بويىنشا ول التى جىلعا سوتتالعان. بيىل ناۋرىزدا سوت وعان مەملەكەتتىك قاراجاتتى ىسىراپ ەتۋ ءىسى بويىنشا تاعى توعىز جىل قوستى، ال كەيىنىرەك شەكارانى زاڭسىز كەسىپ وتۋگە بايلانىستى تاعى ءتورت جىل تاعايىندادى. وسىلايشا سااكاشۆيلي كەمىندە 2034 جىلعا دەيىن تۇرمەدە وتىرۋى ءتيىس.
قاراشا ايىندا گرۋزيا پروكۋراتۋراسى وعان بيلىكتى قۇلاتۋعا شاقىرۋ بويىنشا جاڭا ءىس قوزعاعانىن حابارلادى. سونىمەن قاتار بيلىك سااكاشۆيلي نەگىزىن قالاعان ء«بىرتۇتاس ۇلتتىق قوزعالىس» پارتياسىن كونستيتۋتسياعا قايشى دەپ تانۋدى جوسپارلاپ وتىر.
