سارسەنبى، 1 مامىر كۇنى گرۋزيا پارلامەنتى ەكىنشى وقىلىمدا «شەتەلدىك ىقپالدىڭ اشىقتىعى تۋرالى» زاڭ جوباسىن قابىلدادى. جوبانى 83 دەپۋتات قولداپ، 23 دەپۋتات قارسى بولدى، - دەپ حابارلايدى “ادىرنا” ۇلتتىق پورتالى Georgia Online سايتىنا سىلتەمە جاساپ.
ەندى بەلگىلەنگەن ءتارتىپ بويىنشا قۇجات كوميتەتتە جانە جالپى وتىرىستا ءۇشىنشى وقىلىمدا قارالۋى ءتيىس.
گرۋزيا پرەزيدەنتى سالومە زۋرابيشۆيلي بۇعان دەيىن پارلامەنت زاڭدى سوڭعى وقىلىمدا ماقۇلداسا، وعان ۆەتو قۇقىعى قويىلاتىنىن مالىمدەگەن.
Georgia Online جازۋىنشا، «شەتەلدىك ىقپالدىڭ اشىقتىعى تۋرالى» زاڭ جوباسىندا گرۋزياداعى كوممەرتسيالىق ەمەس زاڭدى تۇلعالار مەن بۇقارالىق اقپارات قۇرالدارى تابىسىنىڭ 20 پايىزىنان استامى شەتەلدەن كەلەتىن بولسا، شەتەلدىك اگەنت مارتەبەسىن الادى دەپ بولجانۋدا. مۇنداي ۇيىمدار مىندەتتى تىركەۋدەن ءوتۋى كەرەك، ال ەگەر ولار ودان باس تارتسا، ايىپپۇل سالىنادى. ال گرۋزيانىڭ ادىلەت مينيسترلىگى ولارعا قاتىستى تەرگەۋ جۇرگىزۋگە قۇقىلى بولادى.
شەتەلدىك اگەنتتەر تۋرالى زاڭ جوباسى گرۋزيا پارلامەنتىندە 2024 جىلدىڭ 17 ساۋىرىندە ءبىرىنشى وقىلىمدا قابىلداندى. ەلدە زاڭنىڭ تالقىلانۋى جاپپاي نارازىلىقتارمەن، پوليتسيانىڭ قاقتىعىسۋمەن ورشىگەن ەدى.
سايتاعى مالىمەتكە سۇيەنسەك، گرۋزيانىڭ وپپوزيتسيالىق پارتيالارى مەن تاۋەلسىز جۋرناليستەرى اتالمىش زاڭدى رەسەيدىڭ 2012 جىلعى «شەتەل اگەنتتەرى» تۋرالى زاڭناماسىنا ۇقساعانى ءۇشىن «رەسەي زاڭى» دەپ اتايدى. زاڭدى سىناۋشىلار بۇل تەك تاۋەلسىز باق پەن ازاماتتىق سەكتورعا اسەر ەتىپ قانا قويماي، ەلدىڭ ەۋروپالىق وداققا كىرۋ مۇمكىندىگىن دە قۇرتۋى مۇمكىن دەيدى.
اقش مەملەكەتتىك دەپارتامەنتى بۇل زاڭ جوباسى «ەو نورمالارى مەن قۇندىلىقتارىنا سايكەس كەلمەيدى جانە گرۋزيانىڭ ەو-عا قاراي قوسىلۋىنا كەرى اسەر ەتەدى» دەپ مالىمدەدى.
ال امەريكا قۇراما شتاتتارىندا ناتسيستىك ناسيحاتپەن كۇرەسۋ ءۇشىن 1938 جىلى قابىلدانعان «شەتەلدىك اگەنتتەردى تىركەۋ تۋرالى» زاڭدى (FARA) بۇزعاندار بەس جىلعا باس بوستاندىعىنان ايىرىلىپ، 10 مىڭ دوللارعا دەيىن ايىپپۇل تولەيتىن. بۇقارالىق اقپارات قۇرالدارىنىڭ حابارلاۋىنشا، امەريكادا بۇل زاڭ سيرەك قولدانىلادى - 50 جىل ىشىندە سوتقا جەتى عانا زاڭ بۇزۋشىلىق ءىسى جەتكەن، ال سۋديا ولاردىڭ بىرەۋىنە عانا ۇكىم شىعارعان.
