پرەمەر-مينيستر ورتتەن قورعاۋ جۇمىستارىن سىنادى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
ەلىمىزدە وتكەن جىلى 116 مىڭ گەكتاردان استام ورمان قورى ورتەنىپ كەتتى. قر پرەمەر-ءمينيسترى ولجاس بەكتەنوۆ بيىل دا اپتاپ ىستىق پەن قۇرعاقشىلىق بولجانىپ وتىرعانىن ايتتى.
«جىل سايىن ەلىمىزدە مىڭعا جۋىق تابيعي ءورت بولادى. ءتىلسىز جاۋ ادام ومىرىنە، سول سياقتى قورشاعان ورتاعا دا وراسان قاۋىپ توندىرەدى. وتكەن جىلى 116 مىڭ گەكتاردان استام ورمان قورى ورتەنىپ كەتتى. ەلىمىزدەگى ورمان القاپتارى ونسىز دا وتە از، ولاردىڭ اۋماعى ءورت سالدارىنان جىل سايىن سيرەپ بارادى»، - دەدى و.بەكتەنوۆ ۇكىمەت وتىرىسىندا.
پرەمەردىڭ سوزىنشە ءتىلسىز جاۋدان كەلگەن ماتەريالدىق شىعىن 160 ملرد تەڭگەدەن اسىپ تۇسكەن.
«قازگيدرومەتتىڭ بولجامىنا سايكەس، بيىل جاز ايلارى ىستىق ءارى قۇرعاقشىلىق بولادى دەپ كۇتىلۋدە. اسىرەسە، ەلىمىزدىڭ باتىسى مەن شىعىسىندا جانە وڭتۇستىگىندە اپتاپ ىستىق ۇزاق ساقتالۋى مۇمكىن. دەمەك، ءورت قاۋپى كۇشەيە تۇسەدى. بيىلدىڭ وزىندە 30-عا جۋىق ورمان ءورتى تىركەلدى. ماسەلەن، وتكەن جىلى ورتتەن قاتتى زارداپ شەككەن «سەمەي ورمانى» اۋماعى بيىل تاعى دا وتقا وراندى. اباي وبلىسىنىڭ اكىمدىگى باقىلاۋدى كۇشەيتۋى كەرەك»، - دەدى ۇكىمەت باسشىسى.
بىرنەشە وبلىستاردا قىزىل جالىننىڭ پايدا بولۋ سەبەبى قۋراعان ءشوپ پەن قوقىستار. ولجاس بەكتەنوۆ اقتوبە، اتىراۋ، قاراعاندى، جامبىل جانە قىزىلوردا وبلىستارىندا قامىس پەن قۋراعان ءشوپ جانىپ، ورتكە ۇلاسقانىن دا باسا ايتتى.
«قازىر مۇددەلى مەملەكەتتىك ورگاندار تابيعي ورتتەردىڭ الدىن الۋ جانە ولاردى جويۋ جونىندەگى ءىس-شارالار جوسپارىن ىسكە اسىرىپ جاتىر. الايدا كەيبىر سالالاردا بۇل جۇمىستار ءتيىستى دەڭگەيدە جۇرگىزىلمەي وتىر. اقمولا، الماتى، شىعىس قازاقستان، جامبىل، اباي جانە ۇلىتاۋ وبلىستارىندا مينەرالدانعان جولاقتاردى جاساۋ ەندى عانا باستالعان، قاجەتتى كولەمنىڭ ۇشتەن بىرىنە ارەڭ جەتەدى. اقتوبە، پاۆلودار، قاراعاندى، سولتۇستىك قازاقستان وبلىستارىنىڭ اۋىلدارىنداعى اۋماقتار ءالى كۇنگە دەيىن قۋراعان ءشوپ پەن قوقىستاردان تازارتىلماعان»، - دەيدى پرەمەر-مينيستر.
