Búgin Alashorda qaıratkeri Muhametjan Tynyshbaıulynyń týǵan kúni, dep habarlaıdy "Adyrna" ulttyq portaly.
Qazaqtyń kórnekti saıası jáne qoǵam qaıratkeri, alash qozǵalysynyń negizin salýshylardyń biri, Alashtyń iri qoǵam jáne memleket qaıratkeri, tarıhshy, aǵartýshy, tuńǵysh temir jol ınjeneri Muhamedjan Tynyshbaev 1879 jyly 12 mamyrda Jetisý oblysynda týǵan.
Aýyl moldasynan hat tanyǵan qarapaıym qazaq balasy Reseıde ınstıtýtqa túsip, ony támamdaǵan. Muhamedjan Tynyshbaev 1905 jyly qazaq syndy shet ulttardy bıleýde ókimettiń áskerı tártipten arylyp, azamattyq jolǵa túsýin usynǵan dáleldi hatyn mınıstrler komıtetiniń tóraǵasyna joldaǵan. Sol jyly ınjener «Qazaqtar jásh azattyq qozǵalysy» atty baıandama jasap, qazaqtyń qazirgi jaǵdaıy men ómirge qajetti suranymynyń jalpy sıpattamasyn ataǵan.
Injener Tynyshbaev 1906 jyly elge kelip, biraz ýaqyt Jetisý temirjolyn jobalaý isine qatysqan.
1907 jyly ol Túrkistan general-gýbernatorlyǵy qaramaǵyndaǵy aımaqtyń temirjol qurylysyna ınjener retinde atsalysady. 1907- 1914 jyldar aralyǵynda Ámýdárııa ústine salynǵan kópir qurylysyna, Ursat (Ýrsatevsk) - Ándijan temirjol qurylysyna jetekshi maman, bas ınjener esebinde qatysady. Temirjol salasyna baılanysty eńbegin ǵana paryqtaǵannyń ózinde Muhamedjan Tynyshbaev - Kindik Azııa kóleminde elenýge laıyqty ınjener-temirjolshy atanǵan.
1915 jyly Túrksib jobasynyń avtory, ınjener Muhamedjan Tynyshbaev temirjol basynda júrgende oǵan Tashkent Muǵalimder ınstıtýtyna oqýǵa barmaq bolyp qarjydan qysylyp júrgen Turar Rysqulov ushyrasady. Ol qazaq balasynyń zeıinin ashý maqsatynda qolma-qol aqsha usynyp jáne adaǵy ýaqytta kerekti qarajatyn adresine salyp turatynyn aıtady.
Eki azamattyń osy rııasyz kóńili adal baýyrlastyqqa ulasady.
