بۇگىن - الاش قوزعالىسىنىڭ قايراتكەرى، تۇركىستان ولكەسى حالىقتارىنىڭ ازاتتىق كۇرەسى جەتەكشىلەرىنىڭ ءبىرى، پۋبليتسيست مۇستافا شوقايدىڭ تۋعان كۇنى.
مۇستافا شوقاي – بۇكىل تۇركى الەمىنىڭ تاريحي تۇلعاسىنا اينالعان ءبىرتۋار ازامات. الاش پارتياسىندا بولدى، تۇركىستان اۆتونومياسىنىڭ باسىندا تۇردى. 21 جىل ەۋروپادا ەميگراتسيادا ءجۇرىپ، قازاقتىڭ بوستاندىعى ءۇشىن كۇرەسكەن تۇلعا.
مۇستافا شوقاي ءتىل مەن ءدىلدى، ۇلت پەن ءداستۇردى سوتسياليزم جۇيەسى جوققا شىعاراتىنىن كۇنى بۇرىن ءبىلدى. ۇرانشىل كوممۋنيزمنىڭ «ۇر دا، جىق» ۇستانىمىن مويىندامادى. تۇركيادا جۇرگەندە كەڭەس ۇكىمەتى بىرنەشە قىزمەت ۇسىنىپ، ەلگە شاقىرعان. بىراق، ەشقايسىسىنا كەلىسىم بەرمەدى. كەرىسىنشە ءوزى بەرلين مەن ءپاريجدىڭ اراسىندا ءجۇرىپ، «ياش تۇركىستان» جۋرنالىن شىعاردى. باسىلىم ساياسي-الەۋمەتتىك تاقىرىپتارعا ارنالدى. پەتەربۋرگ ۋنيۆەرسيتەتىندە وقىپ ءجۇرىپ ساياساتقا ارالاسقان الاش ارداقتىسىنىڭ ءاربىر ءساتى تىنىمسىز ەڭبەكپەن ءوتتى. 24 جاسىندا مۇسىلمان فراكتسياسىنىڭ حاتشىسى اتاندى.
«مۇستافا وزىنە ءاليحان بوكەيحان، مىرجاقىپ دۋلات، احمەت بايتۇرسىن سىندى قازاق زيالىلارىن ۇستاز تۇتتى. قايدا جۇرسە دە، ەلىنىڭ مۇددەسىن ۇمىتقان جوق. ءبىز ونى سونىسىمەن-اق قادىرلەۋگە ءتيىسپىز»، دەيدى جازۋشى، تاريحشى بەيبىت قويشىباەۆ.
