تاشكەنتتىڭ ياككاساراي قىلمىستىق ىستەرى جونىندەگى سوتى يزرايل ەلشىلىگىنىڭ اۋماعىندا قاساقانا ءورت قويۋعا ارەكەتتەنگەن 19 جاستاعى قالا تۇرعىنىن بەس جىلعا سوتتادى، دەپ حابارلايدى «ادىرنا» ءتىلشىسى «گازەتا.uz»-عا سىلتەمە جاساپ.
19 ساۋىردە وزبەكستان مەملەكەتتىك الەم تىلدەرى ۋنيۆەرسيتەتىنىڭ 2 كۋرس ستۋدەنتى ۆەلوسيپەدپەن يزرايل ەلشىلىگىنىڭ عيماراتىنا بارعان. ونىڭ بۇل ارەكەتى ديپلوماتيالىق وكىلدىكتىڭ جانىندا ورنالاسقان ياككاساراي اۋداندىق ىشكى ىستەر ءبولىمى قىزمەتكەرلەرىنىڭ نازارىن اۋدارعان. ءتارتىپ ساقشىلارىن كورگەن ەر ادام قاشىپ كەتۋگە تىرىسقان. الايدا ونىڭ بۇل ارەكەتى ءساتسىز بولدى.
تاشكەنتتىك جىگىتتىڭ سومكەسىنەن كەروسين قۇيىلعان بوتەلكە، گانتەل، ەكى قوراپ سىرىڭكە مەن ماتا كەسەكتەرى تابىلدى. ءتىنتۋ كەزىندە ەر ادام پوليتسيا قىزمەتكەرلەرىنىڭ نازارىن باسقا جاققا اۋدارىپ، يزرايل ەلشىلىگىنە قاراي جۇگىرگەن. وسى كەزدە كۇدىكتى ازاماتتى ديپلوماتيالىق وكىلدىكتىڭ كۇزەتشىلەرى قولعا تۇسىرگەن.
جاۋاپ الۋ كەزىندە تاشكەنت تۇرعىنى وتكەن جىلدىڭ كۇزىنەن باستاپ گازا سەكتورىنداعى قاقتىعىسقا قىزىعۋشىلىق تانىتا باستاعانىن، كەيىن «ءيزرايلدى جەك كورىپ»، كەك الۋعا شەشىم قابىلداعانىن مالىمدەدى. ستۋدەنت ءوز كىناسىن مويىنداپ، وزبەكستان پرەزيدەنتى مەن حالقىنان، سونداي-اق يزرايل ەلشىلىگىنىڭ قىزمەتكەرلەرىنەن كەشىرىم سۇرادى.
