قاراعاندىلىقتار "تازا قازاقستان" رەسپۋبليكالىق ەكواكتسياسىنا بەلسەندى قاتىسىپ جاتىر. وتكەن سەنبىلىكتەردە ولار 5 مىڭ توننادان استام قوقىس جينادى. مەرەكە كۇنى، 7 مامىردا 100-دەن استام ادام بۇقپا وزەنىنىڭ اۋماعىن تازارتۋعا كىرىستى.
قاتىسۋشىلار قاتارىندا ەكولوگيالىق قوزعالىستىڭ ەرىكتىلەرى، قالا جاستارى جانە جەرگىلىكتى اتقارۋشى ورگانداردىڭ وكىلدەرى بار.
ولار بىرلەسىپ وزەن ارناسىنىڭ ءبىر بولىگىن تازالاپ، 300 قاپ قوقىس جينادى.
– بۇگىن بۇقپا وزەنىن تازارتۋ بويىنشا ۇلكەن جۇمىس اتقارىلدى، بولاشاقتا ءبىز ونى جالعاستىرامىز. سونداي-اق، ءبىر اي بويى جالعاساتىن "تازا قازاقستان" اكتسياسى بارىسىندا 5000 توننادان استام قوقىس جينالعانىن اتاپ وتكىم كەلەدى. سەنبىلىككە قالانىڭ 10 مىڭعا جۋىق تۇرعىنى قاتىستى، – دەدى قازىبەك بي اتىنداعى اۋدان اكىمىنىڭ ورىنباسارى رينات قارجاسباەۆ.
ەكولوگيالىق ەرىكتىلەر قوزعالىسىنىڭ جەتەكشىسى راحات رايىمبەكوۆ قاراعاندىلىقتاردى سۋ رەسۋرستارىنا ۇقىپتى قاراۋعا، وزەندەر مەن سۋ ايدىندارىن لاستاماۋعا شاقىردى.
– تازا سۋ – ءبىزدىڭ ورتاق بايلىعىمىز، ونى قورعاۋ قاجەت، – دەيدى راحات رايىمبەكوۆ. – وزەندەر مەن كولدەردى تازا ۇستاي وتىرىپ، ءبىز ادامداردىڭ دەنساۋلىعى مەن ءال-اۋقاتىنا قامقورلىق جاسايمىز. ءبىزدىڭ ارقايسىمىز قالانى وسىنداي اكتسيالارعا قاتىسۋ ارقىلى قوقىسسىز جانە تازا ەتە الامىز. قاراعاندى ءۇشىن تازا تىرشىلىك ءنارى – ء"مولدىر بۇلاق" قۇرايىق!
ەستەرىڭىزگە سالا كەتەيىك، "تازا قازاقستان" ەكواكتسياسىنىڭ بەسىنشى اپتاسى ء"مولدىر بۇلاق" دەپ اتالىپ، بۇلاقتاردى، وزەندەر مەن كولدەردىڭ جاعالاۋ ايماقتارىن تازارتۋعا ارنالعان.
