قاراعاندىدا ەكى ەر ادام جەدەل جاردەم جۇرگىزۋشىسىنە شابۋىل جاسادى، دەپ حابارلايدى "ادىرنا" ءتىلشىسى Stan.kz-كە سىلتەپ.
جۇرگىزۋشىگە شابۋىلداعان ازاماتتار جەدەل جاردەم كولىگىنەن زات ۇرلاپ تا ۇلگەرگەن.
تەمىرتاۋ قالاسىندا ەكى بۇزاقى جەدەل جاردەم جۇرگىزۋشىسىنىڭ كەۋدە تۇسىنان تەۋىپ، مەملەكەتتىك كولىككە زاقىم كەلتىرىپ، ىشىندەگى كەي زاتتارىن قولدى ەتكەن.
قاراعاندى وبلىسىنىڭ پوليتسيا دەپارتامەنتىنىڭ حابارلاۋىنشا، وقيعا 26 اقپانعا قاراعان تۇنىبولعان. كۇدىكتىلەر قازىر قاماۋعا الىنعان.
"26 اقپاندا تۇنگى ساعات 01.00-دە تەمىرتاۋ قالاسىندا كوپقاباتتى ءۇيدىڭ اۋلاسىندا بەلگىسىز بىرەۋلەر 45 جاستاعى جەدەل جاردەم جۇرگىزۋشىسىن سوققىعا جىققان. ناتيجەسىندە جابىرلەنۋشى مەديتسينالىق مەكەمەگە جۇگىنگەن. پوليتسەيلەر ءىزىن سۋىتپاي، 25 جاستاعى جانە 29 جاستاعى ەكى كۇدىكتىنى ۇستادى. ولار ۋاقىتشا ۇستاۋ يزولياتورىنا قامالدى", — دەلىنگەن پوليتسيا حابارلاماسىندا.
