قاراعاندى وبلىسىندا پوليتسيا ەسىرتكى وندىرۋمەن اينالىسقان قىلمىستىق توپتىڭ زاڭسىز ارەكەتىن اشكەرەلەدى، دەپ حابارلايدى «ادىرنا» ءتىلشىسى.
«5 قاراشادا سورتيروۆكا كەنتىندە كەڭ اۋقىمدى ارنايى وپەراتسيا ءوتتى. وپەراتسيا بارىسىندا جاسى 28 بەن 30 ارالىعىنداعى ەكى وبلىس تۇرعىنى سينتەتيكالىق ەسىرتكى وندىرۋگە ارنالعان جاسىرىن زەرتحانا ۇيىمداستىردى دەگەن كۇدىكپەن ۇستالدى»،–دەپ ءتۇسىندىردى وبلىستىق پد ءباسپاسوز قىزمەتى.
ءتىنتۋ كەزىندە ءتارتىپ ساقشىلارى جالدامالى ۇيدەن ءبىر توننادان استام پرەكۋرسور مەن 52 كەلىدەن استام دايىن ەسىرتكى زاتى — الفا-PVP زاتىن تاركىلەكەن. سونىمەن قاتار ەسىرتكى وندىرۋگە ارنالعان قۇرال-جابدىقتار انىقتالىپ، ايعاق زات رەتىندە الىنعان.
«وپەراتسيا ناتيجەسىندە شامامەن 173 مىڭ دوزا سينتەتيكالىق ەسىرتكىنىڭ قارا نارىققا ءتۇسۋىنىڭ جولى كەسىلدى. سونداي-اق ازاماتتار اراسىنان جاڭا “كۋرەرلەر” مەن جاسىرىن تاراتۋشىلاردىڭ قىلمىستىق ىسكە تارتىلۋىنا جول بەرىلمەدى»،–دەدى قاراعاندى وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى عالىمجان بەكبولاتوۆ.
الدىن الا تەرگەۋ مالىمەتتەرىنە سايكەس، كۇدىكتىلەر ءۇيدى زەرتحانا اشۋ ماقساتىندا جالداپ، پسيحوتروپتىق زاتتاردى كۋراتوردىڭ نۇسقاۋىمەن دايىنداعان. ال ەڭبەكاقىلارى كريپتوۆاليۋتا تۇرىندە تولەنىپ وتىرعان. اتالعان دەرەك بويىنشا قىلمىستىق ءىس قوزعالىپ، ەكى كۇدىكتى ۋاقىتشا ۇستاۋ يزولياتورىنا قامالدى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە.
