الماتى وبلىسىندا 13 جاستاعى بالانى ويناپ جۇرگەن كەزىندە اتىپ كەتكەن، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
وقيعا 16 ساۋىردە بولعان. قۇزىرلى ورگاننىڭ دەرەگىنشە، 13 جاسار بالا وق تيگەن ۋاقىتتا ءۇيىنىڭ جانىنداعى كول جاعاسىندا ويناپ جۇرگەن.
الماتى وبلىستىق اۋرۋحاناسىنا وق جاراقاتىمەن تۇسكەن جەتكىنشەكتىڭ ءومىرىن دارىگەرلەر اراشالاپ قالدى.
"دارىگەرلەر بالاعا وپەراتسيا جاساپ، دەنەدەن وقتى الىپ تاستادى. وق وڭ جاقتاعى كەۋدە قۋىسى ارقىلى ءوتىپ، وكپەنىڭ تىندەرىن زاقىمداپ، يىق پىشاعىنىڭ تومەنگى ءپوليۋسىنىڭ پروەكتسياسىندا قابىرعا ارالىققا جابىسىپ قالعان. ناقتى جانە جەدەل ارەكەت ەتكەن دارىگەرلەردىڭ ارقاسىندا كىشكەنتاي بالانىڭ ءومىرىن ساقتاپ قالۋعا مۇمكىندىك تۋدى", - دەلىنگەن حابارلامادا.
پوليتسيا وقيعانىڭ ىلە اۋدانىندا بولعانىن حابارلادى.
"وقتىڭ پنەۆماتيكالىق قارۋدان اتىلعانى انىقتالدى. بارلىق قاجەتتى ساراپتامالىق زەرتتەۋلەر تاعايىندالدى. تەرگەۋ جالعاسۋدا", – دەلىنگەن حابارلامادا.
