اقتاۋ قالاسىندا كونستيتۋتسيالىق رەفورمانى قولداۋ جونىندەگى وبلىستىق كواليتسيا مۇشەلەرى مەديتسينا قىزمەتكەرلەرىمەن كەزدەستى. №2 قالالىق ەمحانا بازاسىندا وتكەن جيىندا اق حالاتتى ابزال جاندار ەل بولاشاعى ءۇشىن ماڭىزدى ناۋقانعا ءبىراۋىزدان قاتىساتىندارىن مالىمدەدى.
otpannews.kz cايتىنىڭ حابارلاۋىنشا، كەزدەسۋ بارىسىندا كواليتسيا مۇشەسى كيىكباي ەشمانوۆ كونستيتۋتسياعا ەنگىزىلەتىن وزگەرىستەردىڭ ءمان-ماڭىزىنا توقتالدى. ونىڭ ايتۋىنشا، ساياسي جاڭعىرۋ جولىندا ۇستازدار مەن دارىگەرلەردىڭ ءرولى ەرەكشە.
ء«بىزدىڭ مىندەتىمىز – حالىققا، سونىڭ ىشىندە قوعامنىڭ قوزعاۋشى كۇشى سانالاتىن سالا ماماندارىنا جاڭا كونستيتۋتسيا نەگىزدەرىن ءتۇسىندىرۋ. مەملەكەت باسشىسى ءاردايىم مەديتسينا مەن ءبىلىم بەرۋ سالاسىن دامىتۋدى باستى نازاردا ۇستاپ كەلەدى. جاڭا جوبادا بۇل باعىتتارعا باسىمدىق بەرىلگەن. سوندىقتان ءاربىر ماماننىڭ تاڭداۋى ەل ەرتەڭى ءۇشىن ماڭىزدى»، – دەدى كيىكباي ەشمانوۆ.
كواليتسيا مۇشەسى گۇلميرا ابىشەۆا زاڭنامالىق وزگەرىستەردى مەديتسينالىق ەۆوليۋتسيامەن بايلانىستىرا وتىرىپ، ماڭىزدى تەڭەۋ كەلتىردى. ول پاندەميا كەزىندەگى قيىندىقتاردى مىسالعا الا وتىرىپ، كەز كەلگەن جۇيەنىڭ جاڭارىپ وتىرۋى قاجەتتىلىك ەكەنىن العا تارتتى.
“وزدەرىڭىز جاقسى بىلەسىزدەر، كوروناۆيرۋس ىندەتى العاش باستالعان كەزدە ونى قالاي ەمدەۋ كەرەكتىگىن ناقتى ەشكىم بىلگەن جوق. العاشقى كەزەڭدە ەمدەۋ حاتتامالارى بولمادى، تاجىريبە جەتىسپەدى. سالدارىنان كوپ ادام قايتىس بولدى. ۋاقىت وتە كەلە ۆيرۋس زەرتتەلدى، ەمدەۋ ادىستەرى جاڭارتىلدى. مەديتسينا ءبىر ورىندا تۇرمايدى. جاڭا اۋرۋ شىقسا – جاڭا ءتاسىل كەرەك. ءدال سول سياقتى، قازىرگى قولدانىپ جۇرگەن كونستيتۋتسيا – ءوز ۋاقىتىنا قىزمەت ەتكەن قۇجات. بىراق ۋاقىت ءبىر ورىندا تۇرمايدى. زامان وزگەردى. قوعام وزگەردى. سوندىقتان ەسكى زاڭمەن جاڭا قوعامدى باسقارۋ مۇمكىن ەمەس. اتا زاڭىمىزدى جاڭارتۋ – ۋاقىت تالابى، ءومىر قاجەتتىلىگى”،- دەدى گۇلميرا ابىشەۆا.
مەديتسينا قاۋىمداستىعى وكىلدەرى بۇل باستامانى جوعارى دەڭگەيدە قولداپ وتىر. جاستار دەنساۋلىعى ورتالىعىنىڭ ءبولىم مەڭگەرۋشىسى ابزال سىرىم رەفەرەندۋمدى ەل دامۋىنداعى ماڭىزدى بەلەس دەپ باعالادى.
ء«بىز جاڭا كونستيتۋتسيا جوباسىمەن تانىستىق. بۇل – ەرتەڭگى كۇنگە دەگەن نىق قادام. ءوز باسىم رەفەرەندۋمعا مىندەتتى تۇردە قاتىسامىن جانە بارشا ارىپتەستەرىم مەن وتانداستارىمدى بۇل تاريحي ساتتە بەلسەندىلىك تانىتۋعا شاقىرامىن»،– دەدى ول.
جيىن سوڭىندا قاتىسۋشىلار رەفەرەندۋمعا قاتىستى كوكەيكەستى ساۋالدارىن قويىپ، جاۋاپ الدى. اقتاۋلىق دارىگەرلەر ساياسي ناۋقان كۇنى سايلاۋ ۋچاسكەلەرىنە بارىپ، ءوز داۋىستارىن بەرۋگە نيەتتى.
