الەۋمەتتىك جەلىدە سوڭعى كەزدە اق حالاتتىلارعا جۇدىرىق الا جۇگىرگەندىڭ ۆيدەوسى كوپتەپ تاراپ كەتتى. بۇل جولى جاعداي شىمكەنت قالاسىندا بولعان. اۋرۋحاناعا ەم ىزدەپ كەلگەن ناۋقاس دارىگەر مەن سانيتاريالىق قىزمەتكەردى ۇرىپ- سوققان، دەپ حابارلايدى "ادىرنا" ءتىلشىسى.
جاعا ۇستاتارلىق جاعداي تۋرالى بەلگىلى جۋرناليست گۇلميرا ابىقاي:
" تاعى دا دارىگەرمەن توبەلەس😱 ادامداردىڭ بارىنە نە بولعان؟ بۇل جولى دارىگەر مەن مەيىربيكەگە قارسى ۇمتىلعان پاتسيەنتتى قوسىمشا توپ كەلىپ، جابىلىپ تىنىشتاندىردى. كۇيەۋىنە اراشا تۇسكەن بالالى ايەلگە نە جورىق؟ وقيعا بۇگىن شىمكەنتتەگى تاكسيكولوگيا ورتالىعىنىڭ بىرىندە بولدى دەيدى",-دەپ جازبا قالدىرعان.
كادرلاردا ەر دارىگەرلەردىڭ ناۋقاستى تىنىشتاندىرۋعا تىرىسقانى كورىنەدى. وقيعاعا قاتىستى شىمكەنت قالاسى دەنساۋلىق ساقتاۋ باسقارماسى تۇسىنىكتەمە بەردى. 20 قىركۇيەك كۇنى ساعات 19.50-دە 1995 جىلى تۋعان ەر ادامنىڭ جەدەل جاردەم كولىگىمەن گيپەرباريالىق وكسيگەناتسيا ورتالىعىنا جەتكىزىلگەنىن ءتۇسىندىردى.
"تۋىستارىنىڭ ايتۋىنشا، ناۋقاس ۋلى سۇيىقتىق ىشكەن. دارىگەرلەرگە قارالدى. پسيحيكالىق قوزۋ جاعدايىنا بايلانىستى، تىنىشتاندىرۋ جانە ەمدەۋ شارالارىن جۇرگىزۋ ماقساتىندا جانساقتاۋ بولىمىنە جاتقىزىلدى. الايدا ناۋقاس مەديتسينالىق كومەككە قارسىلىق تانىتىپ، مەديتسينا قىزمەتكەرلەرىنە فيزيكالىق كۇش قولدانعان. وقيعاعا بايلانىستى 102 قىزمەتىنە اقپارات بەرىلدى", - دەلىنگەن حابارلامادا.
بۇعان دەيىن الماتى وبلىسى تالعار ورتالىق اۋداندىق اۋرۋحاناسىندا دارىگەر مەن مەيىرگەردىڭ سوققىعا جىعىلۋى قوعامدا نارازىلىق تۋدىرعانىن ەسكە سالامىز.
ۇقساس جاڭالىقتار
