قازاقستاندا ورمان قورىن قورعاۋ جانە كۇزەت قىزمەتى قۇرىلدى، دەپ حابارلايدى "ادىرنا” ۇلتتىق پورتالى ۇكىمەتتىڭ ءباسپاسوز قىزمەتىنە سىلتەپ.
«پرەمەر-مينيستر ولجاس بەكتەنوۆ ورمان شارۋاشىلىعىن قورعاۋ قىزمەتىن قۇرۋ تۋرالى ۇكىمگە قول قويدى»، - دەلىنگەن حابارلامادا.
ەكولوگيا جانە تابيعي رەسۋرستار مينيسترلىگى جانىنداعى جاڭا رەسپۋبليكالىق ازاماتتىق قورعاۋ قىزمەتى تج كەزىندە، ونىڭ ىشىندە ورمانداعى ءورتتى ءسوندىرۋ بارىسىندا ورمان شارۋاشىلىعى مەكەمەلەرىنىڭ تيىمدىلىگىن ارتتىرۋعا مۇمكىندىك بەرەدى.
ورمانداعى ورتكە قارسى ءىس-قيمىل ورمانداردى كوبەيتۋگە جانە اعاشتاردى كەسۋگە عىلىمي ءتاسىلدى، سونداي-اق كەشەندى الدىن الۋ شارالارىن قابىلداۋ مەن ءتيىستى قۇزىرەتتەردى دامىتۋدى قاجەت ەتەدى. بولەك قىزمەت قۇرۋ قاجەتتىلىگى وسىنداي تالاپتاردان تۋىنداپ وتىر.
ورمان قورىن كۇزەتۋ جانە قورعاۋ قىزمەتىنىڭ قۇرىلۋى مەملەكەتتىك ورگانداردىڭ الاپات ورمان ورتتەرىنە قارسى كۇرەس شارالارىن ۇيلەستىرۋىن جاقسارتۋعا، ءتيىستى مەكەمەلەردى تەحنيكامەن جانە قۇرال-جابدىقتارمەن قامتاماسىز ەتۋدى ارتتىرۋعا، سونداي-اق تابيعي ورتتەردىڭ الدىن الۋ جانە ولاردى ءسوندىرۋ ءۇشىن بىلىكتى كادرلار قۇرامىن جاساقتاۋعا مۇمكىندىك بەرەدى دەپ كۇتىلىپ وتىر.
قازاقستاندا 15 رەسپۋبليكالىق ازاماتتىق قورعاۋ قىزمەتى بار. ولارعا: ورتكە قارسى قىزمەت، مەديتسينالىق قىزمەت، حيميالىق قورعاۋ قىزمەتى، ينجەنەرلىك قىزمەت، رادياتسيادان قورعاۋ قىزمەتى، ۇلتتىق گيدرومەتەورولوگيالىق قىزمەت جانە ت.ب. كىرەدى.
