18 ماۋسىمدا ۋكراينا پرەزيدەنتى ۆلاديمير زەلەنسكي كانادادا ءوتىپ جاتقان G7 ("ۇلكەن جەتىلىك") سامميتىنەن مەرزىمىنەن بۇرىن شىعىپ، ۋكرايناعا قايتاتىنى بەلگىلى بولدى، دەپ حابارلايدى "ادىرنا" ۇلتتىق پورتالى.
بۇل تۋرالى ۋكراينالىق "سۋسپىلنە" تەلەارناسى مەن كانادالىق CBC ارناسى دەلەگاتسياداعى دەرەككوزدەرگە سىلتەمە جاساپ حابارلادى.
CBC ارناسىنىڭ مالىمەتىنشە، زەلەنسكيدىڭ ساپارىن قىسقارتۋ شەشىمى رەسەيدىڭ كيەۆكە جاساعان سوققىلارىنا جانە اقش پرەزيدەنتى دونالد ترامپتىڭ كانادادان ەرتە كەتۋىنە بايلانىستى قابىلدانعان.
اتاپ ايتقاندا، رەسەي 17 ماۋسىمعا قاراعان ءتۇنى كيەۆتىڭ ءارتۇرلى اۋداندارىنا جاپپاي زىمىرانمەن شابۋىل جاساعان. شابۋىل كەزىندە تۇرعىن ۇيلەر، ءبىلىم بەرۋ نىساندارى مەن ماڭىزدى ينفراقۇرىلىمدارعا زاقىم كەلدى. سولومەن اۋدانىنداعى توعىز قاباتتى ءۇيدىڭ ءبىر پودەزى تولىعىمەن قۇلاپ، 21 ادامنىڭ ءمايىتى ءۇيىندى استىنان تابىلدى. جاپا شەككەندەر سانى – 134 ادام. قۇرباندار سانى ارتۋى مۇمكىن، سەبەبى ىزدەستىرۋ-قۇتقارۋ جۇمىستارى جالعاسۋدا.
اق ءۇيدىڭ حابارلاۋىنشا، اقش پرەزيدەنتى دونالد ترامپ 16 ماۋسىم كۇنى كەشكە كانانادا وتكەن ءسامميتتىڭ ءبىرىنشى كۇنىنەن كەيىن ەلگە شۇعىل تۇردە ورالدى. بۇل شەشىم تاياۋ شىعىستاعى احۋالعا بايلانىستى قابىلدانعان. ايتا كەتەيىك، 17 ماۋسىمدا ترامپ پەن زەلەنسكي اراسىندا كەزدەسۋ جوسپارلانعان بولاتىن.
كيەۆ قالالىق اكىمدىگى 18 ماۋسىمدى ازا كۇنى دەپ جاريالادى. رەسەيدىڭ بۇل شابۋىلى بەيبىت تۇرعىندار اراسىندا كوپ شىعىنعا الىپ كەلگەن ەڭ ءىرى سوققىلاردىڭ ءبىرى بولىپ وتىر.
