وسى اپتادا «تازا قازاقستان» رەسپۋبليكالىق ەكولوگيالىق اكتسياسى «ونەگەلى ۇرپاق» اپتالىعىمەن جالعاسۋدا . اپتالىق بارىسىندا ءار اۋدان تازالىق جۇمىستارىن ۇيىمداستىرىپ كەلەدى. وسى ورايدا ەڭبەكشى اۋدانى اكىمدىگىنىڭ ۇيىمداستىرۋىمەن «ونەگەلى ۇرپاق» اكتسياسى اياسىندا قالا جاستارى مەن بەلسەندى ازاماتتار قارتتار ۇيىنە باردى. قارتتار ءۇيىنىڭ اۋلاسىندا بەلسەندىلەر تازالىق جۇمىستارىن جۇرگىزىپ، تالداردىڭ تۇپتەرىن اكتەپ، ءوسىپ كەتكەن شوپتەردى قىرقىپ، قوقىستاردى شىعاردى.
—«تازا قازاقستان» اكتسياسى اياسىندا تازالىق جۇمىستارىن قارتتار ۇيىندە جالعاستىرۋدامىز. ءىس-شاراعا ەڭبەكشى اۋدانى اكىمدىگى، جاستار، ستۋدەنتتەر اتسالىسۋدا. ءدال قازىر 50-گە جۋىق بەلسەندى جاس اۋلاداعى تالداردىڭ ءتۇبىن اكتەپ، قورشاۋلاردى سىرلاپ شىقتى. مۇنداي تازالىق ءىس-شاراسىن كورگەن قاريالارىمىز دا ءوز ريزاشىلىقتارىن ءبىلدىرىپ، جاستارمەن اڭگىمەلەسىپ ءبىر جاساپ قالدى، - دەدى ەڭبەكشى اۋدانىنىڭ جاستارمەن جۇمىس جۇرگىزۋ ءبولىمىنىڭ باسشىسى قۋانىش سەرىكباي.
«قازىنالى قاريا – اقىلى تەڭىز داريا» اتاۋىمەن ۇيىمداستىرىلعان ءىس-شارادا تازالاۋ جۇمىستارىن جۇرگىزۋ جانە دەمەۋشىلەردىڭ ەسەبىنەن قايىرىمدىلىق كومەكتەر كورسەتۋ جۇمىستارى دا ۇيىمداستىرىلىپ، قالالىق مادەنيەت ءبولىمىنىڭ انشىلەرى ءان شىرقاپ، كوپشىلىككە مەرەكەلىك كوڭىل-كۇي سىيلادى.
«ونەگەلى ۇرپاق» اپتالىعى اياسىندا مۇمكىندىگىنشە قالاداعى كومەككە مۇقتاج قارتتاردىڭ بارلىعىن قامتۋ قاراستىرىلعان. اپتالىق بارىسىندا قاريالار مەن ارداگەرلەردىڭ ۇيلەرىنە بارىپ، تازالىق جۇمىستارىن جۇرگىزۋ ءارى قاراي دا جالعاسپاق.
