ەكس-مينيستر ارىستانبەك مۇحامەديۇلى ءوزىنىڭ 3 ميلليون ايلىق الادى دەگەن قاۋەسەتتى جوققا شىعاردى.
"دوستارىم، جالاقىمنىڭ قانشا بولاتىنى ءالى وزىمە دە بەلگىسىز بولىپ تۇرعاندا، ول تۋرالى جالعان اقپارات تاراپ كەتتى. 3 000 000 تەڭگە كولەمىندەگى ەڭبەكاقى – جالعان. مۇنداي شىندىققا جاناسپايتىن اقپارات تاراتۋ كىمگە پايدا اكەلەتىنىن بىلمەيمىن، fake news قولدان جاسالعانىنا كۇمانىم جوق. تىم اسىرە سىلتەپتى، باسقا نە ايتۋعا بولادى", - دەپ جازدى پاراقشاسىندا.
مۇحامەديۇلى مينيستر بولعان تۇستا، مادەنيەت سالاسى قىزمەتكەرلەرىنىڭ جالاقىسىن كوتەرۋ ماسەلەسىن بىرنەشە رەت كوتەرگەنىن اتاپ ءوتتى. وسى ورايدا ول ۇكىمەتتە ىستەگەن جىلدارى قانشا العانىن جانە قازىرگى ەڭبەكاقىسى تۋرالى اشىق ايتتى.
"ەگەر وسىنداي اقپارات شىندىققا جاناسسا، ارينە قۋانار ەدىم، وكىنىشكە قاراي، بۇل ازىرگە مۇمكىن ەمەس. ادەتتەگىدەي سىزدەرگە شىنىمدى ايتايىن: مينيستر قىزمەتىن اتقارعاندا ەڭبەكاقىم 980 000 بولدى... ۇلتتىق مۋزەي ديرەكتورى رەتىندە 172 436 تەڭگە ەسەپتەلىپ، قولىما 139 673 تەڭگە بەرىلەتىن بولادى. بۇل قىزمەتتەگى مەنىڭ ساناتىم "ا1-1", ەڭبەك ءوتىلىم مامىر ايىن قوسا العاندا 31 جىل ءۇش اي بولدى", - دەدى ۇلتتىق مۋزەيدىڭ جاڭا ديرەكتورى.
سونىمەن، ۇلتتىق مۋزەي ديرەكتورلىعىنا 172436 تگ ايلىق جازىلىپ، قولىنا 139673 تەڭگە الاتىن ارىستانبەك مۇحامەديۇلىنا سەنىم بىلدىرگەن دۇرىس شىعار.
ەستەرىڭىزگە سالا كەتەيىك، ارىستانبەك مىرزا مينيستر كەزىندە 980000 تەڭگە العان ەدى.
"ادىرنا" ۇلتتىق پورتالى
