كەرى بايلانىس
+7 707 676 6977
adyrnaportal@gmail.com

1 اقش دوللارى 700-800 تەڭگەگە دەيىن جەتۋى مۇمكىن

11233
Adyrna.kz Telegram

ۇلتتىق بانك وكىلدەرى تەڭگەنىڭ قۇلدىراۋىن سىرتقى فاكتورلاردىڭ اسەرىنەن كورەدى. ولار كەزەكتى دەۆالۆاتسياعا دايىندالىپ جاتقان جوق پا؟ تالداپ كورەلىك.

قازاقستان رەسپۋبليكاسىنىڭ ۇلتتىق ۆاليۋتاسى بۇگىنگە دەيىن 6 رەت قاتتى دەۆالۆاتسياعا ۇشىرادى. مۇنىڭ ءبارى قر ۇلتتىق بانكىنىڭ باقىلاۋىمەن جۇرگىزىلدى. ال ۇلتتىق بانك وكىلدەرىنىڭ بەرگەن جاۋاپتارىنا تالداۋ جاسايتىن بولساق، ولار كەزەكتى ۇلكەن قۇلدىراۋ پروتسەسىنە دايىندالىپ جاتقانداي كورىنەدى. بۇعان قانداي فاكتورلار مەڭزەيدى؟

تەڭگەنىڭ كۇرت قۇنسىزدانۋى كىمگە ءتيىمدى؟

ەكونوميكالىق تۇرعىدان ۇلتتىق ۆاليۋتانىڭ قۇلدىراۋى ەشكىمگە دە ءتيىمدى ەمەس. تەك ۇلتتىق بانك تاراپىنان ينتەرۆەنتسياعا جۇمسالىپ جاتقان قارجىنىڭ كولەمىن ازايتۋ ماقساتىندا وسىنداي شەشىم قابىلدانۋى مۇمكىن. بۇل ارگۋمەنتتىڭ سالماعىن ارتتىرۋ ءۇشىن سوڭعى 2 دەۆالۆاتسياعا كوز جۇگىرتسەك.

2014 جىلدىڭ اقپان ايىندا 1 اقش دوللارىنىڭ قۇنى 155,5-تەن 185 تەڭگەگە دەيىن ءوستى. وسى دەۆالۆاتسيادان ءۇش اي بۇرىن ۇلتتىق بانك توراعالىعىنا قايرات كەلىمبەتوۆ سايلانعان بولاتىن. ول كوپ وتپەي جۇرگىزىلىپ جاتقان قارجى-نەسيە ساياساتىنىڭ وزگەرتىلمەيتىنى تۋرالى مالىمدەمە جاسايدى. ال 2014 جىلدىڭ اقپان ايىندا ۇلتتىق بانك ءباسپاسوز قىزمەتى دەۆالۆاتسيا بولمايتىنى تۋرالى تاعى ءبىر رەت اقپارات تاراتادى. بىراق سول جىلدىڭ 11 اقپان كۇنى تەڭگە قۇنى 20 پايىزعا قۇلدىرايدى.

كەلىمبەتوۆ تەڭگەنىڭ دەۆالۆاتسياسى تۋرالى نەبارى ءبىر كۇن بۇرىن بىلگەنىن ايتىپ اقتالدى. ال 12 اقپان كۇنى قايرات كەلىمبەتوۆ تەڭگەنى قۇنسىزداتۋعا ۇلتتىق بانك ءۇش اي دايىندالعانىن مالىمدەدى. وسىدان كەيىن قازاقستاندىقتار قارجى رەتتەۋىشىگە سەنبەي، دەپوزيتتەگى كاپيتالىن اقش دوللارىنا اۋدارا باستادى. ولار دۇرىس شەشىم قابىلداعان ەدى. سەبەبى ءبىر جىلدان كەيىن ۇلتتىق ۆاليۋتا قۇنى تاعى 2 ەسەگە قۇنسىزداندى.

"دەۆالۆاتسيا ەندى بولمايدى" دەگەنگە ەل سەنۋدەن قالدى

2014 جىلدىڭ باسىندا تەڭگە 20 پايىزعا قۇنسىزدانعاننان كەيىن ۇلتتىق بانك وكىلدەرى ەندىگارى مۇنداي دەۆالۆاتسيا بولمايدى دەۋمەن بولدى. بىراق مۇناي نارىعىندا ۇلكەن توقىراۋ باستالدى. 2014 جىلدىڭ باسىنان 2015 جىلدىڭ ەكىنشى جارتىسىنا دەيىن مۇناي باعاسى $140-دان $50-عا دەيىن قۇلادى. بۇل قازاقستان سىندى مۇناي ەكسپورتىنا تاۋەلدى ەلدەر ءۇشىن قارا بۇلت ۇيىرىلگەن كۇندەردىڭ جاقىنداعانىن ءبىلدىردى.

2015 جىلى 19 تامىزدا 1 اقش دوللارىنىڭ تەڭگەگە شاققانداعى قۇنى 188-دەن 255-كە دەيىن ءوستى. ۇلتتىق بانك توراعاسى قايرات كەلىمبەتوۆ دەۆالۆاتسيا تۋرالى بارلىق قازاقستاندىقتارداي سول كۇنى بىلگەنىن مالىمدەدى. ساراپشىلار كەلىمبەتوۆتىڭ حالىق اراسىنداعى دۇرلىكپەنىڭ ازايتۋ ماقساتىندا وسىنداي مالىمدەمە جاساعانىن، شىندىعىندا ۇلتتىق بانكتىڭ بۇل دەۆالۆاتسياعا شاراسىزدىقتان بارعانىن ايتادى.

بۇگىندە قايرات كەلىمبەتوۆ "استانا" حالىقارالىق قارجى ورتالىعىن باسقارىپ وتىر

بۇگىندە قايرات كەلىمبەتوۆ "استانا" حالىقارالىق قارجى ورتالىعىن باسقارادى / سۋرەت camonitor.kz سايتىنان الىندى

2015 جىلدىڭ تامىز ايىندا ۇلتتىق ۆاليۋتا ەركىن اينالىمعا ءتۇستى. ناقتىراق ايتار بولساق، تەڭگەنىڭ قۇنى ەندى نارىقتاعى وزگەرىستەرگە وراي وزگەرىپ وتىرادى. سول ساتتەن باستاپ بۇگىنگە دەيىن تەڭگە قۇنى ۇدەمەلى تۇردە ءوسىپ، 1 اقش دوللارىنىڭ باعاسى 345 تەڭگەگە دەيىن جەتتى.

سىرتقى فاكتور؟

ۇلتتىق بانك توراعاسى دانيار اقىشەۆ تەڭگەنىڭ بيىلعى قۇلدىراۋىنا سىرتقى نارىقتىڭ كوبىرەك اسەر ەتكەنىن ايتادى. قازاقستاندىقتاردىڭ وزگە ەلدەرگە دەمالىس ۋاقىتىن جوسپارلاپ، شەتەل ۆاليۋتاسىن جاپپاي ساتىپ الۋىن ىشكى فاكتور دەسەك، اقش دوللارىنىڭ پايىزدىق مولشەرلەمەسىنىڭ ءوسۋى مەن ساۋدا سوعىسى سىرتقى فاكتورعا جاتادى.

– مۇنايدىڭ باعاسى تۇراقتى تۇردە ءوسىپ كەلەدى. سوندىقتان تەڭگەنىڭ كۇرت قۇلدىراۋىنا ەش سەبەپ جوق. ال سوڭعى ەكى ايدا تەڭگە پوزيتسياسىنىڭ جوعالۋىنا كوبىنە سىرتقى فاكتورلار اسەر ەتىپ وتىر، – دەدى اقىشەۆ ۇلتتىق بانكتىڭ باق وكىلدەرىمەن كەزەكتى وتىرىسىندا.

Pro Gente ەكونوميكالىق زەرتتەۋ ورتالىعىنىڭ جەتەكشىسى ماقسات حالىق تا ۇلتتىق بانك توراعاسىنىڭ پىكىرىمەن كەلىسەتىنىن ايتادى.

– جىل باسىنان اقش-تىڭ فەدەرالدى رەزەرۆتەر جۇيەسى (فرج) امەريكالىق ۆاليۋتانىڭ شەتەلدىك قارجى ينستيتۋتتارىنا ارنالعان پايىزدىق مولشەرلەمەسىن ەكى رەت (1,5-تەن 2 پايىزعا) ءوسىردى. سوڭعى ءوسىم 13 ماۋسىم كۇنى بولىپ، قازاقستاندىقتاردىڭ شەتەل ۆاليۋتاسىنا سۇرانىسىنىڭ ارتاتىن ۋاقىتىنا تۋرا كەلدى. بۇل ۇلتتىق ۆاليۋتانىڭ 15-16 تەڭگەگە دەيىن قۇلاۋىنا جەتكىزىپ وتىر، – دەيدى ەكونوميست.

ماقسات حالىقتىڭ ويىنشا، ۇلتتىق بانكتىڭ تەڭگەگە قاتىستى پايىزدىق مولشەرلەمەسىن تۇسىرۋگە باعىتتالعان ينفلياتسيالىق تارگەتتەۋ ساياساتى تا ۇلتتىق ۆاليۋتانىڭ قۇنسىزدانۋىنا الىپ كەلگەن.

– قازىرگى تاڭدا، تەڭگەنىڭ بازالىق مولشەرلەمەسى 9 پايىزدى قۇرايدى. ال ەلباسى ۇسىنعان جاڭا يپوتەكالىق باعدارلاما بويىنشا بەرىلەتىن نەسيە 7 پايىزدىق ۇستەماقىنى كورسەتەدى. دەمەك ەكەۋى ءبىر-بىرىنە ساي كەلۋى ءۇشىن ۇلتتىق بانك پايىزدىق كورسەتكىشتى كەم دەگەندە 2 پايىزعا تومەندەتۋى كەرەك. ال ونىڭ ۇستىنەن ەكىنشى دەڭگەيلى بانكتەر تابىس كورۋى ءۇشىن ۇلتتىق بانكتىڭ كورسەتكىشتى ودان دا تومەندەتۋى ءتيىس. بۇل ينفلياتسيانىڭ كولەمىن ازايتقانىمەن، تەڭگەنىڭ قۋاتتالۋىنا كەدەرگى بولادى، – دەيدى ماقسات حالىق.

ۇلتتىق بانكتىڭ قاتەلىگى نەدە؟

قازاقستاننىڭ قارجى نارىعىنداعى قالىپتاسقان پروتسەسس بويىنشا، ۇلتتىق بانك وكىلدەرى الدىمەن حالىقتىڭ سەنىمىنە كىرىپ، سوڭىرا تەڭگەنىڭ قۇلدىراۋىنا جول بەرەدى. مارچەنكونىڭ دا، كەلىمبەتوۆتىڭ كەزىندە دە بۇل بىرنەشە رەت قايتالاندى. ال اقىشەۆ، ازىرگە، ونداي قاتەلىك جىبەرە قويعان جوق.

قارجى ماماندارى ۇلتتىق بانكتىڭ ۇلتتىق ۆاليۋتا باعامىنا قاتىستى وسىعان دەيىنگى جاسالعان كەيبىر شەشىمدەرى قاراپايىم حالىق ءۇشىن ءتيىمسىز بولعانىن ايتادى. مىسالى، مۇناي باعاسى 2014 جىلدىڭ قاڭتار ايىنان باستاپ تومەندەدى. سايكەسىنشە، تەڭگە دە سول كەزدەن بەرى از مولشەرمەن قۇنسىزدانا باستاۋى ءتيىس ەدى. بىراق ۇلتتىق بانك وكىلدەرى نارىقتاعى ۆاليۋتا ساۋداسىنا جاساندى تۇردە ارالاسىپ، تەڭگەنىڭ قۇنىن ۋاقىتشا ۇستاپ تۇرۋدى ءجون كوردى.

ماۋسىمنىڭ باسىندا ۇلتتىق بانك توراعاسى دانيار اقىشەۆ تەڭگەنىڭ بازالىق مولشەرلەمەسىن 9 پايىزعا ءتۇسىردى

ماۋسىمنىڭ باسىندا ۇلتتىق بانك توراعاسى دانيار اقىشەۆ تەڭگەنىڭ بازالىق مولشەرلەمەسىن 9 پايىزعا ءتۇسىردى .

رەسەي فەدەراتسياسىنىڭ ورتالىق بانكى ءرۋبلدىڭ اقش دوللارىنا قارسى پوزيتسياسىن از مولشەردە ۋاقتىلى جىبەرىپ وتىردى. ينتەرۆەنتسيانىڭ كومەگىمەن تەڭگە تۇراقتىلىعىن ساقتاسا، رۋبل قۇنسىزداندى. ءسويتىپ، كاپيتال اعىمى قازاقستاننان رەسەيگە كوپ مولشەردە كەتتى. بۇل دا قازاقستان ەكونوميكاسىنا بەلگىلى ءبىر دەڭگەيدە كەرى اسەرىن تيگىزدى.

ساراپشىلاردىڭ ويىنشا، قر ۇلتتىق بانكى وكىلدەرى ءارى ينتەرۆەنتسياعا قوماقتى قارجى جۇمساپ، ءارى قازاقستاننىڭ ىشكى نارىعىنان رەسەيگە اقشا اعىمىنىڭ كەتۋىنە جول بەردى.

ماقسات حالىقتىڭ ايتۋىنشا، بۇگىندە ۇلتتىق بانك بارىنشا اشىق ساياسات جۇرگىزۋگە تىرىسىپ جاتىر. ينتەرۆەنتسيا تۋرالى ستاتيستيكالىق مالىمەتتەر كەش بولسا دا، اي سايىن جاريالانادى. تەڭگەنىڭ ەركىن اينالىمعا كەتۋى دە سونىڭ ناتيجەسى.

تەك تەڭگە قۇنسىزدانىپ جاتقان جوق

ساراپشىلار ۆاليۋتا نارىعىنداعى قارجى وپەراتسيالارى جىلدام جۇرگىزىلە باستادى دەيدى. سەبەبى نارىقتاعى تۇراقسىزدىق بەلگىلى ءبىر دەڭگەيدە تابىسقا جەتۋگە سەپتىگىن تيگىزەدى. دەسە دە، كاپيتالدان ايىرىلۋ مۇمكىندىگى دە جوق ەمەس.

– اقش دوللارىنىڭ پايىزدىق مولشەرلەمەسى وزگەرگەن كەزدە، الەمدەگى بارلىق ۆاليۋتالار قۇنسىزداندى. قازاقستاندىقتار تاعى دا ۇلتتىق بانك قارجى ساياساتىن جامانداپ، بەلگىلى ءبىر كۇشتىڭ تەڭگە قۇنىنىڭ قۇلدىراۋىنا جاساندى تۇردە ارالاسىپ جاتقانىن ايتۋدان جالىقپادى. ال شىندىعىندا، بۇل نارىقتاعى تابيعي پروتسەسس بولاتىن، – دەيدى ماقسات حالىق.

ەكونوميستىڭ ايتۋىنشا، ءتىپتى جاپون يەنى دە ءوز پوزيتسياسىن جوعالتقان. ادەتتە دامىعان ەلدەردىڭ ۇلتتىق ۆاليۋتالارى اقش دوللارىنىڭ كۇشەيۋىنە قارسى توتەپ بەرەتىن. بىراق بۇل كەزدەگى قارسى ۇدەرىسكە ەشبىر ۆاليۋتانىڭ قاۋقارى جەتپەگەن.

تەڭگە قۇنسىزدانسا، ەكسپورتپەن اينالىساتىن كاسىپكەرلەردىڭ تابىسى ارتادى

ەكىنشى دۇنيەجۇزىلىك سوعىسىنان كەيىن برەتتون-ۆۋدس كەلىسىمى بويىنشا حالىقارالىق ساۋدا ۆاليۋتاسى رەتىندە اقش دوللارى تاڭداپ الىنعان. وعان اعىلشىنداردىڭ فۋنت ستەرلينگى دە ۇمىتكەر ەدى. سودان بەرى كەز كەلگەن ەل ۇكىمەتى نەمەسە جەكە كاسىپكەر ەكسپورت جانە يمپورت جاساۋ كەزىندە امەريكالىق ۆاليۋتانى قولدانادى..

حالىقارالىق ساۋداعا شىعارىلاتىن تاۋاردىڭ قۇنى الدىمەن اقش دوللارىمەن، سوسىن ۇلتتىق ۆاليۋتامەن ەسەپتەلەدى. بۇل تاۋار مەن اقشا تەپە-تەڭدىگىن ساقتاۋ ءۇشىن جاسالادى. مىسالى، قازاقستاندىق كاسىپكەر 100 مىڭ باررەل مۇناي ءوندىرىپ، ونى اۋسترياعا ەكسپورتتاۋدى جوسپارلاسا، نارىققا شىعارىلعالى جاتقان شيكىزات تۋرالى الدىمەن ۇلتتىق بانك وكىلدەرىنە اقپارات بەرۋى ءتيىس. ال قارجى رەتتەۋىشى شيكىزات كولەمى مەن ونىڭ دوللارداعى ەكۆيۆالەنتىن ءوز كەزەگىندە انىقتاپ، اقش-تىڭ فەدەرالدى رەزەرۆتەر جۇيەسىن (فرج) اقپاراتتاندىرادى.

اقش دوللارىنىڭ پايىزدىق مولشەرلەمەسىنىڭ ارتۋى امەريكالىق ۆاليۋتا يندەكسىنىڭ كۇرت وسۋىنە تۇرتكى بولدى

اقش دوللارىنىڭ پايىزدىق مولشەرلەمەسىنىڭ ارتۋى امەريكالىق ۆاليۋتا يندەكسىنىڭ كۇرت وسۋىنە تۇرتكى بولدى.

ال فرج قىزمەتكەرلەرى نارىقتاعى تەڭدىكتى ساقتاۋ ءۇشىن ساتىلىمعا شىعاتىن قازاق مۇنايىنىڭ قۇنىنا تەڭ اقش دوللارىن باسىپ شىعارادى. قازاقستاندىق كاسىپكەر مۇنايدى اقش دوللارىمەن ساتىپ، كاپيتالدى قازاقستان نارىعىنا الىپ كەلەدى. سوسىن ول قارجىسىن ىشكى نارىقتا پايدالانۋ ءۇشىن ۇلتتىق ۆاليۋتاعا ايىرباستايدى. سايكەسىنشە، دوللار قۇنى وسكەن سايىن، ونىڭ تەڭگەدەگى ەكۆيۆالەنتى دە ارتا بەرەدى. بۇل كاسىپكەر ءۇشىن ءتيىمدى.

شىلدە جانە تامىز ايلارىندا تەڭگە تۇراقتانادى

تەڭگەنىڭ سوڭعى ەكى ايداعى كۇرت قۇلدىراۋىنا اقش ۆاليۋتاسىنا قاتىستى پايىزدىق مولشەرلەمەنىڭ كوتەرىلگەندىگى تۇرتكى بولعانى جايلى جوعارىدا جازدىق. ەكونوميست ماقسات حالىق تەڭگەنىڭ تۇراقتالۋىنا نەگىز بولاتىن بىرنەشە فاكتورلاردى اتاپ ءوتتى.

– تەڭگە شىلدەنىڭ سوڭىنا قاراي تۇراقتالۋى مۇمكىن. وعان قازاقستانداعى كاسىپكەرلەردىڭ 2018 جىلدىڭ ءبىرىنشى جارتىسىنا قاتىستى سالىق ەسەپتەرىن جاساۋى نەگىز بولادى. ىشكى نارىقتا سالىق تولەۋ پروتسەسى ۇلتتىق ۆاليۋتادا جۇرگىزىلەتىندىكتەن، تەڭگەگە سۇرانىس ارتادى. ال سۇرانىس ارتقان كەزدە، ۆاليۋتانىڭ قۇنى دا ارتا تۇسەدى، – دەيدى ماقسات حالىق.

ەكونوميستىك ويىنشا، تامىز ايىندا دەمالۋ ءۇشىن شەتەل اساتىن وتانداستارىمىز ازايادى. بۇل حالىق اراسىندا اقش دوللارىنا سۇرانىستىڭ تومەندەۋىنە الىپ كەلىپ، تەڭگەنىڭ تۇراقتانۋىن قامتاماسىز ەتەدى.

گوللاند اۋرۋىنان ايىعا الماي ءجۇرمىز

ەكونوميست ماقسات حالىقتىڭ ويىنشا، مۇناي باعاسىنىڭ كۇرت تومەندەۋى قازاقستان ەكونوميكاسىنىڭ ديۆەرسيفيكاتسيالانۋى پروتسەسىنە جاڭا سەرپىن بەرگەن.

– قازاقستاندا 2003 جىلى ەكونوميكانىڭ جان-جاقتى دامۋىنا قاتىستى ارنايى زاڭ قابىلدانىپ، باسقا سەكتورلارعا باسا نازار اۋدارىلا باستادى. ال مۇناي باعاسى باررەلىنە 100 اقش دوللارىنان اسقان كەزدە، ۇكىمەتتەگى شەنەۋنىكتەردىڭ ەكونوميكانىڭ وزگە سەكتورلارىن قولداۋى باسەڭدەدى. ءبىر سوزبەن ايتقاندا، ەكونوميكانىڭ باسقا سەكتورلارىنداعى يننوۆاتسيالىق باستامالار گوللاند اۋرۋىنىڭ كولەڭكەسىندە قالىپ قويدى، – دەيدى ماقسات حالىق.

ەكونوميستىڭ ايتۋىنشا، مۇناي ەكسپورتىنان ەل بيۋدجەتىنە قىرۋار قارجى قۇيىلۋى شەنەۋنىكتەردىڭ بوساڭسۋىنا جەتكىزدى. ال مۇناي باعاسى باررەلىنە 30 اقش دوللارىنا شەيىن تومەندەۋى، قازاقستان بىلاي تۇرسىن، ساۋد ارابياسىن دا قيىن جاعدايدا قالدىردى.

– سول كەزدە قازاق ۇكىمەتى ەلدىڭ سىرتقى قارىزىن وتەۋگە قينالىپ قالدى. ماقتانىش بولىپ جۇرگەن ۇلتتىق كومپانيالاردىڭ شىعىنى تابىسىنان ارتىپ كەتتى. "سامۇرىق-قازىنا" قورى ەسەبىنەن كۇن كورىپ كەلگەن كومپانيالار سانى دا قىسقارتىلدى. ۇكىمەت شەتتە قالىپ قويعان يننوۆاتسيالىق جوبالارىن قايتا قاراۋعا بەت بۇردى، – دەيدى ەكونوميست.

نيدەرلاندى ۇكىمەتى گوللاند اۋرۋىنىڭ كەسىرىنەن 15-20 جىل ەكونوميكالىق ستاگناتسياعا تاپ بولدى

نيدەرلاند ۇكىمەتى گوللاند اۋرۋىنىڭ كەسىرىنەن 15-20 جىلدىق ەكونوميكالىق ستاگناتسياعا تاپ بولدى / سۋرەت gabrielegalimberti.com سايتىنان الىندى

Pro Gente ەكونوميكالىق زەرتتەۋ ورتالىعىنىڭ جەتەكشىسى مۇناي باعاسىنىڭ تىم قىمباتتاپ كەتپەۋى قازاقستان ۇكىمەتىنە ءتيىمدى ەكەنىن ايتادى. ءبىر جاعىنان مۇنايدىڭ باعاسى قىمباتتاپ، ەكسپورتتان تۇسەتىن تابىستىڭ ارتقانى دۇرىس. بىراق ەكونوميكانى ديۆەرسيفيكاتسيالاۋ بارىنەن ماڭىزدى.

جىل سوڭىنا دەيىن تەڭگە تاعى دا قۇلدىراۋى مۇمكىن

2014 جىلى مۇناي داعدارىسى باستالعان كەزدە The Wall Street Journal باسىلىمىندا Financial Experts of America قاۋىمداستىعىنىڭ ۆاليۋتا نارىعىنا قاتىستى كوپ جىلدىق بولجامى جاريالاندى. ساراپشىلاردىڭ ويىنشا، فەدەرالدى رەزەرۆتەر جۇيەسى اقش دوللارىنىڭ تۇراقتىلىعىن ساقتاۋ ءۇشىن ونىڭ پايىزدىق مولشەرلەمەسىن ۇدەمەلى تۇردە كوتەرۋگە مۇددەلى. ناتيجەدە 2020 جىلعا دەيىن اقش دوللارىنىڭ پايىزدىق مولشەرلەمەسى 3-3,5-كە دەيىن ءوسۋ مۇمكىندىگى ايتىلادى.

Teletrade ساراپشىسى امەريكالىق ارىپتەستەرىنىڭ بولجامىمەن كەلىسەتىنىن ءبىلدىرىپ، ەڭ ناشار ستسەناريگە ساي 1 اقش دوللارى 700-800 تەڭگەگە دەيىن جەتۋى مۇمكىن ەكەنىن جاسىرمادى.

Pro Gente زەرتتەۋ ورتالىعىنىڭ مالىمەتىنە وراي، تەڭگە جىل سوڭىنا دەيىن پوزيتسياسىن ءبىرشاما جوعالتادى.

– ەگەر ۇلتتىق بانك وكىلدەرى ينتەرۆەنتسيا جاساماسا، وندا امەريكالىق ۆاليۋتانىڭ قۇنى 350-355 تەڭگەگە دەيىن كوتەرىلۋى مۇمكىن. ال ەڭ ناشار ستسەناري بويىنشا،دا بولجام ايتۋ قيىن. مەنىڭشە، ونداي جاعدايدا ۇلتتىق بانك قول قۋسىرىپ وتىرمايدى، – دەيدى ماقسات حالىق.

 

"ادىرنا" ۇلتتىق پورتالى

پىكىرلەر