دىنمۇحامەد قوناەۆتىڭ تۋعان كۇنى قارساڭىندا قوناەۆ قالاسىنداعى 80 وتباسى باسپانالى بولدى.
الدىمەن بارشا جۇرت د.قوناەۆتىڭ تۋعانىنا 113 جىل تولۋىنا وراي، ەسكەرتكىشىنە گۇل شوقتارىن قويدى. كەيىننەن مادەنيەت ۇيىندە مەملەكەت جانە قوعام قايراتكەرىن ەسكە الۋ كەشى ءوتتى.
شاراعا قالا اكىمى اسحات بەردىحانوۆ قاتىسىپ، د.قوناەۆتىڭ ءور تۇلعالى ازامات بولعانى جايىندا ماڭىزدى دەرەكتەرگە توقتالدى.
«بۇگىن ءبىز ءۇشىن ەرەكشە كۇن. سەبەبى، ءدال وسى كۇنى، 1912 جىلدىڭ 12 قاڭتارىندا قالامىزعا ەسىمى بەرىلگەن ەلىمىزدىڭ داڭقتى پەرزەنتى، مەملەكەت جانە قوعام قايراتكەرى دىنمۇحامەد احمەتۇلى قوناەۆ دۇنيە ەسىگىن اشتى. قوناەۆ اتامىز ەل باسقارعان جىلدارى كەڭ بايتاق قازاق جەرىندە 68 جۇمىسشىلار كەنتى مەن 43 قالا سالىندى. ول ىلە وزەنىنىڭ بويىنا بوگەن سالدىرىپ، جاڭا سۋ ەلەكتر ستانساسىنىڭ بوي كوتەرۋىنە، وسى ماڭدا جاڭا قاپشاعاي قالاسىنىڭ ىرگەتاسى قالانۋىنا ەڭبەك ءسىڭىردى»، - دەدى اسحات بەردىحانوۆ.
سودان كەيىن الەۋمەتتىك وسال توپتاعى وتباسىلارعا جانە كەزەكتە تۇرعان ازاماتتارعا 80 پاتەردىڭ كىلتى تابىس ەتىلدى.
شاعىن كونتسەرتتىك باعدارلامادان سوڭ، شاھار باسشىسى بۇگىن باسپانالى بولعان ەكى وتباسىنىڭ ۇيىنە بارىپ، قۇتتىقتاپ شىقتى.
«ءوزىم كوپبالالى انامىن، 7 بالام بار. ءۇي كەزەگىندە 17 جىلدان بەرى تۇرعانمىن. بۇگىن اتامىزدىڭ تۋعان كۇنىندە جاقسى جاڭالىق بولىپ، ۇيگە قولىمىز جەتتى. قۋانىشتىمىن! الەۋمەتتىك وسال توپتاعىلاردى، كوپبالالى انالاردى، جەتىمدەر مەن ارداگەرلەردى قولداپ جۇرگەن مەملەكەتتىك قىزمەتكەرلەرگە العىسىم شەكسىز»، – دەدى ءۇي يەسى نازىم احمەتوۆا.
ايتا كەتەيىك، پاتەرلەر جەكەشەلەندىرۋ قۇقىعىنسىز جالعا بەرىلدى. جالعا الۋ قۇنى - قولجەتىمدى. بىلتىر قوناەۆتا 85 وتباسىعا پاتەر كىلتى تابىستالعان بولاتىن.
