رەسەيدىڭ ۋكرايناداعى سوعىسىنا قازاقستاننان بارعان تاعى ءبىر ادام تۋرالى مالىمەت تارادى، دەپ حابارلايدى “ادىرنا” ۇلتتىق پورتالى aif.ru سايتىنا سىلتەپ.
ارگۋمەنتى ي فاكتى سايتىندا “ساناقشى” ەسىمدى قازاق جىگىتتىڭ رەسەيدەگى سوعىس سابىنا قالاي قوسىلعانى تۋرالى ايتىلادى. سوعىس باستالعانعا دەيىن ول الماتى تۇرعىنى بولعان.
“مەن 2022 جىلعى قاڭتار وقيعاسىن ءوز كوزىممەن ءوز ۇيىمدە باقىلاپ، سول كەزدە دە قازاقستانداعى توڭكەرىس قازاقستانعا ەمەس، ەڭ الدىمەن رەسەيگە سىرتتان اسەر ەتۋى مۇمكىن ەكەنىن ويلاعانىمدى مويىندايمىن. رەسەي سوعىس جورىقتارىن باستاعاندا وتباسىمدا پىكىر ەكىگە جارىلدى” دەيدى ول.
“ساناقشىنىڭ” ايتۋىنشا ونىڭ سوعىسقا كەتۋىنە جۇبايى قارسى بولعان:
«ايەلىم سوعىسقا بارۋىما قارسى بولدى، بىراق مەن رەسەيدى قولدادىم. سونىڭ نەگىزىندە ارامىزدا ۇنەمى ۇرىس-كەرىس پايدا بولا باستادى. مەنىڭ ويىمشا، بۇل كوپتەگەن وتباسىلاردا بولدى. الايدا، بۇل مەنىڭ ءومىرىمدى تۇبەگەيلى وزگەرتكەن وقيعاعا اكەلدى»، - دەپ ەسىنە الدى ول.
دەرەككە سۇيەنسەك، “ساناقشى” “احمات” ارنايى جاساعىنىڭ قاتارىنا قوسىلعان.
«قازاقستاندا بولىپ جاتقان وقيعالار مەنى قاتتى قىنجىلتادى. قازىر وندا ۋكرايناداعىداي پروتسەستەر ءجۇرىپ جاتىر. بۇل مەنى قاتتى الاڭداتادى»، - دەيدى “ساناقشى”.
”ساناقشى" ءوزىن قازاقستاندا نە كۇتىپ تۇرعانىن، قانداي ايىپپەن جاۋاپقا تارتىلاتىنىن دا جاقسى بىلەتىنىن ايتقان.
ەسكە سالا كەتەيىك، بۇعان دەيىن ۇلتتىق قاۋىپسىزدىك كوميتەتى قازاقستاندىقتاردىڭ ۋكراينا جەرىندەگى سوعىسقا ارالاسۋىنا قاتىستى 10 قىلمىستىق ءىستى تەرگەپ-تەكسەرۋدى باستاعانىن حابارلاعان بولاتىنبىز.
