اقش-تىڭ يرانمەن سوعىسقا جۇمساعان وپەراتسيالىق شىعىندارى 47 ميلليارد دوللاردان استى. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
اتالعان سوما اقش اسكەري كۇشتەرىنىڭ شىلدە ايىندا ۇسىنعان باعالاۋىنان 25 پايىزدان استامعا جوعارى. جاڭا دەرەكتەر رەسمي تۇردە جاريالانباعان.
اقش قورعانىس مينيسترلىگىنىڭ بولجامىنشا، جۇمسالعان وق-دارىلەر قورىن تولىقتىرۋعا 29 ميلليارد دوللاردان استام قاراجات قاجەت. ال جوعالعان اسكەري تەحنيكانى، سونىڭ ىشىندە ۇشاقتار مەن ۇشقىشسىز ۇشۋ اپپاراتتارىن الماستىرۋعا تاعى 6 ميلليارد دوللاردان استام قارجى كەرەك. سونىمەن قاتار ەسەپكە يراننىڭ زىمىراندارى مەن دروندارىنان زاقىمدانعان امەريكالىق اسكەري بازالاردى جوندەۋگە جۇمسالاتىن قوماقتى شىعىندار ەنگىزىلمەگەن.
شىلدە ايىندا اقش قورعانىس ءمينيسترى پيت حەگسەت سوعىستىڭ قۇنىن 37,5 ميلليارد دوللار دەپ باعالاعان ەدى.
پرەزيدەنت دونالد ترامپ اقپان ايىندا يزرايلمەن بىرلەسىپ، اسكەري وپەراتسيانى باستاعان كەزدە قاقتىعىس ۇزاققا سوزىلمايدى دەپ كۇتكەن. باستاپقى جوسپار بويىنشا، الدىمەن يراننىڭ قورعانىس جۇيەسىن باسۋ ءۇشىن قىمبات ءارى جوعارى دالدىكتى زىمىراندار قولدانىلىپ، كەيىن ارزانىراق وق-دارىلەرگە كوشۋ كوزدەلگەن. الايدا Reuters ماتەريالىندا ايتىلعانداي، ساۋىردەگى بىتىمنەن كەيىن يران اۋە شابۋىلىنا قارسى قورعانىس جۇيەلەرىنىڭ، زىمىراندىق قارۋ-جاراعى مەن ۇشقىشسىز ۇشۋ اپپاراتتارىنىڭ ءبىر بولىگىن قالپىنا كەلتىرە العان.
سونىمەن قاتار The Wall Street Journal باسىلىمى دەرەككوزدەرىنە سىلتەمە جاساپ، اقش ديپلوماتيالىق جانە اسكەري ارنالار ارقىلى پارسى شىعاناعىنداعى اراب ەلدەرىن 3 قاراشاعا بەلگىلەنگەن كونگرەسكە ارالىق سايلاۋدان كەيىن «قىسقا، بىراق قارقىندى اسكەري ناۋقانعا» دايىندالۋعا شاقىرعانىن حابارلاعاە. باسىلىم دەرەككوزدەرىنىڭ مالىمەتىنشە، امەريكالىق اسكەريلەر تەحاس شتاتىنان «پەتريوت» زەنيتتىك-زىمىران كەشەنىن تاسىمالداپ، ايماقتاعى وق-ءدارى قورىن تولىقتىرىپ جاتىر. سونداي-اق بومبالاۋشى ۇشاقتار مەن جويعىشتاردى ىقتيمال سوققىلارعا دايىنداۋدا.
ترامپتىڭ اينالاسىنداعى دەرەككوزدەردىڭ ايتۋىنشا، اسكەري وپەراتسيانى قايتا باستاۋ تۋرالى تۇپكىلىكتى شەشىم ءالى قابىلدانباعان. دەگەنمەن، پرەزيدەنت يرانعا اۋقىمدى شابۋىل جاساۋعا نيەتتى. ونىڭ نىساناسىنا ەلدىڭ ينفراقۇرىلىمدىق نىساندارى مەن يادرولىق باعدارلاماسىنا قاتىستى وبەكتىلەر ىلىگۋى مۇمكىن.
ىقتيمال جاڭا اسكەري ناۋقانعا دايىندىق اقش-تاعى ارالىق سايلاۋ قارساڭىندا ءجۇرىپ جاتىر.
رەسپۋبليكالىق پارتيا كونگرەستىڭ قوس پالاتاسىندا دا از عانا باسىمدىققا يە. Reuters اتاپ وتكەندەي، سوعىس سالدارىنان ەنەرگيا تاسىمالداۋشىلار باعاسىنىڭ ءوسۋى ترامپتىڭ رەيتينگىنە جانە رەسپۋبليكالىق كانديداتتاردى قولداۋ دەڭگەيىنە كەرى اسەر ەتكەن.
قازان ايىنىڭ باسىندا ترامپ تاراپتار اراسىندا «ناتيجەلى كەلىسسوزدەر» ءجۇرىپ جاتقانىن ايتىپ، اقش سايلاۋعا دەيىن يرانعا سوققى جاسامايتىنىن مالىمدەگەن. الايدا بىرنەشە كۇننەن كەيىن ول تەگەرانمەن كەلىسسوزدەردى جالعاستىرۋ مۇمكىندىگىنە كۇمان كەلتىرىپ، ۆاشينگتوننىڭ كىممەن كەلىسسوز جۇرگىزىپ جاتقانىن ەندى تۇسىنبەيتىنىن ايتقان.
اقش شەنەۋنىكتەرىنىڭ سوزىنشە، ءتيىستى بۇيرىق بەرىلگەن جاعدايدا پەنتاگون اۋقىمدى اسكەري قيمىلداردى قايتا باستاۋعا دايىن.
