Reseıdiń Ýkraınadaǵy soǵysyna Qazaqstannan barǵan taǵy bir adam týraly málimet tarady, dep habarlaıdy “Adyrna” ulttyq portaly aif.ru saıtyna siltep.
Argýmenty ı fakty saıtynda “Sanaqshy” esimdi qazaq jigittiń Reseıdegi soǵys sabyna qalaı qosylǵany týraly aıtylady. Soǵys bastalǵanǵa deıin ol Almaty turǵyny bolǵan.
“Men 2022 jylǵy Qańtar oqıǵasyn óz kózimmen óz úıimde baqylap, sol kezde de Qazaqstandaǵy tóńkeris Qazaqstanǵa emes, eń aldymen Reseıge syrttan áser etýi múmkin ekenin oılaǵanymdy moıyndaımyn. Reseı soǵys joryqtaryn bastaǵanda otbasymda pikir ekige jaryldy” deıdi ol.
“Sanaqshynyń” aıtýynsha onyń soǵysqa ketýine jubaıy qarsy bolǵan:
«Áıelim soǵysqa barýyma qarsy boldy, biraq men Reseıdi qoldadym. Sonyń negizinde aramyzda únemi urys-keris paıda bola bastady. Meniń oıymsha, bul kóptegen otbasylarda boldy. Alaıda, bul meniń ómirimdi túbegeıli ózgertken oqıǵaǵa ákeldi», - dep esine aldy ol.
Derekke súıensek, “Sanaqshy” “Ahmat” arnaıy jasaǵynyń qataryna qosylǵan.
«Qazaqstanda bolyp jatqan oqıǵalar meni qatty qynjyltady. Qazir onda Ýkraınadaǵydaı proester júrip jatyr. Bul meni qatty alańdatady», - deıdi “Sanaqshy”.
”Sanaqshy" ózin Qazaqstanda ne kútip turǵanyn, qandaı aıyppen jaýapqa tartylatynyn da jaqsy biletinin aıtqan.
Eske sala keteıik, buǵan deıin Ulttyq qaýipsizdik komıteti qazaqstandyqtardyń Ýkraına jerindegi soǵysqa aralasýyna qatysty 10 qylmystyq isti tergep-tekserýdi bastaǵanyn habarlaǵan bolatynbyz.
