بۇگىن نۇرسۇلتان نازارباەۆتىڭ العاش پرەزيدەنت اتانعان كۇنى، دەپ حابارلايدى "ادىرنا" ۇلتتىق پورتالى.
34 جىل بۇرىن (1990) قازاق كسر-ءىنىڭ «قازاق كسر پرەزيدەنتى قىزمەتىن بەكىتۋ جانە كونستيتۋتسياعا (نەگىزگى زاڭ) وزگەرتۋلەر مەن تولىقتىرۋلار ەنگىزۋ تۋرالى» زاڭى، قازاق كسر جوعارعى كەڭەسىنىڭ «قازاق كەڭەس سوتسياليستىك رەسپۋبليكاسىنىڭ پرەزيدەنتى تۋرالى» جارلىعى قابىلداندى.
1990 جىلى 24 ساۋىردە جوعارعى كەڭەستە زاڭ قابىلداعاننان كەيىن، پرەزيدەنتتى سايلاۋدا جاسىرىن داۋىس بەرۋگە قاتىسقان 335 دەپۋتاتتىڭ 317-ءسى ن.ءا. نازارباەۆتى قولداپ، 18-ءى قارسى داۋىس بەردى. ءناتيجەسىندە ن.ءا. نازارباەۆ قازاقستاننىڭ تۇڭعىش پرەزيدەنتى بولىپ سايلاندى. ن.ءا. نازارباەۆتى بۇل جوعارعى لاۋازىمدىق قىزمەتكە قازاقستان كومپارتياسى ورتالىق كوميتەتىنىڭ 21-پلەنۋمى ءبىراۋىزدان ۇسىنعان بولاتىن.
1990 ج. 20 قاراشادا قابىلدانعان "قازاق كسر-ندا مەملەكەتتىك بيلىك پەن باسقارۋ قۇرىلىمدارىن جەتىلدىرۋ جانە قازاق كسر كونستيتۋتسياسىنا وزگەرتۋلەر مەن تولىقتىرۋلار ەنگىزۋ تۋرالى" زاڭعا سايكەس قازاق كسر پرەزيدەنتى قازاق كسر جوعارى اتقارۋشى جانە وكىمشى بيلىك باسشىسى بولىپ تاعايىندالدى.
1991 جىلى وتكەن پرەزيدەنت سايلاۋىنا كانديدات رەتىندە نۇرسۇلتان نازارباەۆ تىركەلدى. سايلاۋ كەزىندە ول 98,8% داۋىس جينادى.
رەسمي پرەزيدەنتتىك تاعايىنداۋدان 28 جىلدان سوڭ 2019 جىلى 19 ناۋرىزدا نۇرسۇلتان نازارباەۆ رەسپۋبليكالىق تەلەارنالاردان حالىققا ۇندەۋ جاساپ، پرەزيدەنتتىك وكىلەتىن توقتاتقانىن مالىمدەدى.
