قازاقستاندا كيىكتەردى اتۋ جوسپارلانۋدا. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانباەۆ كيىك سانى قالاي رەتتەلەتىنىن ايتتى، دەپ حابارلايدى “ادىرنا”ۇلتتىق پورتالى.
ءمينيستردىڭ ايتۋىنشا، كيىك سانىن باسقارۋ جونىندەگى بيولوگيالىق نەگىزدەمەدە پوپۋلياتسيانى رەتتەۋدىڭ ەكى ءتاسىلى ۇسىنىلعان. ءبىرىنشىسى – تور قۇرۋ ارقىلى ۇستاپ، ەتىن ەت وڭدەيتىن زاۋىتتارعا جەتكىزۋ. بۇل ءادىس كۇندىز جاسالادى. ەكىنشىسى – تۇندە اتىپ الۋ.
"بۇگىندە ءبىز تورمەن ۇستاۋ ءتاسىلىن باستادىق. بىراق سوڭعى ەكى اپتادا جاڭبىر كوپ جاۋىپ، بۇل ءتاسىلدى جۇزەگە اسىرۋ قيىندىق تۋعىزدى. وسىدان كەيىن ءبىز بيولوگيالىق نەگىزدەمەدە كورسەتىلگەن ەكىنشى ءتاسىلدى قولدانۋعا شەشىم قابىلدادىق. جالپى بيولوگيالىق نەگىزدەمە بويىنشا 337 مىڭ باس كيىك رەتتەلۋى قاجەت. قازىر تور ارقىلى 91 باس كيىك ۇستالسا، ەكىنشى تاسىلمەن بار-جوعى 14 باس كيىك اتىپ الىندى", - دەدى نىسانباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
بيىلعى كوكتەمگى ءتولدى ساناماعاندا كيىك سانى 1 ملن 950 مىڭ باسقا جەتكەن.
"جالپى كيىك – ءوسىمتال مال. كەلەسى كوكتەمدە ساناق وتەدى، بىراق ءبىز قازىر ەڭ تومەن بولجاممەن العاندا، مىسالى 30 پايىزدى العاننىڭ وزىندە تاعى 600 مىڭنان استام كيىك قوسىلىپ وتىر. ياعني بۇگىنگى كۇنى كيىك سانى 2 ملن 600 مىڭنىڭ ۇستىندە بولادى،" - دەيدى ۆەدومستۆو باسشىسى.
سونداي-اق، نىسانباەۆ اقبوكەندەردىڭ اۋىل شارۋاشىلىعىنا 12 ميلليارد تەڭگەدەن استام زيان كەلتىرگەنى تۋرالى دەرەكتەردى كەلتىردى.
ء"بىز بۇرىن كيىكتى نەگە اتقىزباي كەلدىك؟ نەگە كيىك سانىن رەتتەۋ ماسەلەسىن قاراستىرعان جوقپىز؟ سەبەبى ول ۋاقىتتا كيىكتەردىڭ سانى وتە تومەن بولدى. ال قازىر ولاردىڭ سانى تاريحي كورسەتكىشتەن اسىپ كەتتى. بۇگىندە كيىكتەردەن ديقانشىلارعا 12 ملرد تەڭگە زالال كەلگەنىن بىلەسىزدەر. سول سەبەپتى كيىك سانىن رەتتەۋ قاجەت. مىسالى، بۇرىن كيىكتى كىم رەتتەيتىن؟ ونى رەتتەيتىن قاسقىر، جۇت، اۋرۋ بولاتىن. ال قازىر تابيعاتتا ەجەلدەن كەلە جاتقان مۇنداي رەتتەۋ تاسىلدەرى جۇمىس ىستەمەيدى، - دەيدى نىسانباەۆ.
