ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا ءوز جۇمىسىن اياقتادى. 2020 جىلدىڭ قاراشاسىنان بەرى 2,6 ميلليوننان استام قۇجات پەن ماتەريالدى قۇپياسىزداندىردى، 311 مىڭنان استام ساياسي قۋعىن-سۇرگىن قۇرباندارىن تولىق اقتالدى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
«قازىردىڭ وزىندە 2,6 ميلليوننان استام قۇجات پەن ماتەريالدان قۇپيا بەلگىسى الىنىپ تاستالدى. مەملەكەتتىك كوميسسيا جۇمىسىنىڭ ناتيجەسىندە قولدانىستاعى زاڭناما اياسىندا 311 مىڭنان استام ساياسي قۋعىن-سۇرگىن قۇرباندارى اقتالدى. عىلىمي-زەرتتەۋ جۇمىستارىنىڭ ناتيجەلەرىن ءبىر سەريا اياسىندا عىلىمي قۇجاتتاۋ ماقساتىندا مەملەكەتتىك كوميسسيانىڭ 72 تومدىق ماتەريالدار جيناعى باسپاعا دايىندالدى»، - دەلىنگەن اقوردانىڭ سايتىندا.
كوميسسيا مەملەكەت باسشىسىنىڭ 2020 جىلعى 24 قاراشاداعى جارلىعىمەن قۇرىلعان. حح عاسىردىڭ 20-50 جىلدارىنداعى ساياسي قۋعىن-سۇرگىن قۇرباندارىن اقتاۋ جۇمىستارىنا 425 عالىمدار، زەرتتەۋشىلەر مەن ساراپشىلار قاتىستى. ولاردىڭ 260-تان استامى وڭىرلىك كوميسسيالارعا تارتىلدى. ولار رەسپۋبليكا بويىنشا 60 مەملەكەتتىك جانە ۆەدومستۆولىق مۇراعاتتاردا جۇمىس ىستەدى.
الداعى ۋاقىتتا ساياسي قۋعىن-سۇرگىن ماسەلەلەرى بويىنشا عىلىمي-زەرتتەۋ جۇمىستارىن 2021 جىلى قۇرىلعان 20 عاسىرداعى ساياسي قۋعىن-سۇرگىن ماتەريالدارىن زەرتتەۋ ورتالىعى جۇرگىزەتىن بولادى.
ەكى جىل ىشىندە ارناۋلى مەملەكەتتىك مۇراعاتتاردان ورتالىققا 688 مىڭعا جۋىق ءىس جانە قۋعىن-سۇرگىنگە ۇشىراعان تۇلعالاردىڭ 48 مىڭعا جۋىق تىركەۋ كارتوچكالارى وتكىزىلگەن.
بۇل قاراجات زەرتتەۋشىلەر مەن حالىققا قولجەتىمدى بولادى.
