«تازا قالادان جاسىل پلانەتاعا دەيىن». كۋرچاتوۆ قالاسىندا وسىنداي اتاۋمەن رەسپۋبليكالىق «تازا قازاقستان» ەكولوگيالىق اكتسياسىنىڭ «جاسىل ايماق» اپتالىعى ءوتتى.
جاستار رەسۋرستىق ورتالىعىنىڭ ديرەكتورى ايجان مۇساتاەۆا «جاسىل ايماق» اپتالىعىنىڭ ءبىرىنشى كۇنىندە جاستار مەن مەكەمەلەر ۇجىمدارى عانا ەمەس، زەينەت جاسىنداعى ارداگەرلەر دە سەنبىلىككە كەلگەنىن ايتتى. كۋرچاتوۆتىقتار كوشەلەردى، سكۆەرلەردى، ساياباقتاردى جانە باسقا دا قوعامدىق ورىنداردى اباتتاندىرۋ بارىسىندا اعاش تۇپتەرىن اكتەۋ جۇمىستارىن جۇرگىزدى. 42 ۇيىم مەن كاسىپورىن وكىلدەرى تەحنيكانىڭ كۇشىمەن قالانى 40 توننا قوقىستان تازارتتى.
اكتسيا باستالعالى تابيعات جاناشىرلارى تاريحي-مادەني ەسكەرتكىشتەردىڭ اۋماعىن تازارتتى. ءبىر كۇندە 1000-نان استام بەلسەندى تۇرعىندار كۋرچاتوۆ قالاسىن تازالاۋعا قاتىستى.
— جاستارىمىز ءوز ەلىنىڭ پاتريوتتارى رەتىندە وسى اكتسياعا بەلسەندى قاتىسىپ جاتىر. اپتا سايىن وتەتىن سەنبىلىكتەرگە قاتىسۋ ارقىلى قالامىزدىڭ عانا ەمەس، بۇكىل ەلىمىزدىڭ ەكولوگياسىن جاقسارتۋعا اتسالىسا الاتىنىمىزعا سەنىمدىمىن، - دەيدى ايجان مۇساتاەۆا.
- قالامىزداعى سەنبىلىك شارالارىنا جاستاردىڭ بەلسەندى قاتىسىپ جاتقانى قۋانتادى. ارينە، ءبىز، ارداگەرلەر دە، قالىسپاۋعا تىرىسامىز. ويتكەنى قورشاعان ورتاعا قامقورلىق — بۇل ءبىزدىڭ بولاشاق ومىرىمىزگە قامقورلىق. كۇش-جىگەرىمىزدى بىرىكتىرە وتىرىپ، قورشاعان ورتانى قوقىستان تازارتىپ، كوگالداندىرىپ، جەر شارىن تازا ءارى جاسىل پلانەتاعا اينالدىرۋعا اتسالىسامىز، - دەيدى ارداگەرلەر كەڭەسىنىڭ توراعاسى عالىمجان ءجۇمادىلوۆ.
