قازاقستاندىق تەننيسشى ەلەنا رىباكينا الەمنىڭ ءبىرىنشى راكەتكاسىن ۇتىپ، گەرمانياداعى ءتۋرنيردىڭ فينالىنا شىقتى، دەپ حابارلايدى “ادىرنا” ۇلتتىق پورتالى قازاقستان تەننيس فەدەراتسياسىنىڭ ءباسپاسوز قىزمەتىنە سىلتەپ.
«قازاقستان ايەلدەر قۇراماسىنىڭ كوشباسشىسى ەلەنا رىباكينا گەرمانيانىڭ شتۋتگارت قالاسىندا ءوتىپ جاتقان WTA-500 ءتۋرنيرىنىڭ جارتىلاي فينالىندا ءتورت «ۇلكەن دۋلىعا» ءتۋرنيرىنىڭ جەڭىمپازى پولشالىق يگا شۆياتەكتەن باسىم ءتۇستى. ويىن 6:3, 4:6, 6:3 ەسەبىمەن قازاقستاندىق ويىنشىنىڭ پايداسىنا اياقتالدى»، - دەلىنگەن سەنبى كۇنى تاراتقان حابارلامادا.
تەننيسشىلەر كورتتا 2 ساعات 49 مينۋت ويىن ورنەگىن كورسەتتى. ال قارسىلاستارىمەن جەكە كەزدەسۋلەردە ەلەنا 4:2 ەسەبىمەن الدا كەلەدى.
شتۋتگارتتاعى ءتۋرنيردىڭ مانسابىنداعى العاشقى فينالىندا رىباكينا ماركەتا ۆوندروۋسوۆا (چەحيا) - مارتا كوستيۋك (ۋكراينا) اراسىنداعى كەزدەسۋدىڭ جەڭىمپازىمەن وينايدى.
