بۇگىن قىرعىزستان پرەزيدەنتى سادىر جاپاروۆتىڭ قازاقستانعا رەسمي ساپارى اياسىندا قازاقستاننىڭ مادەنيەت قايراتكەرلەرىنە مەملەكەتتىك ناگرادالار تابىستاۋ ءراسىمى ءوتتى، دەپ حابارلايدى «ادىرنا» ءتىلشىسى مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
سالتاناتتى ءىس-شارا بارىسىندا قىرعىزستاننىڭ مەملەكەتتىك حاتشىسى سۇيىنبەك قاسمامبەتوۆ مادەنيەت جانە ونەر وكىلدەرىن مەملەكەتتىك ناگرادالارمەن ماراپاتتاۋ عاسىرلارعا ۇلاسقان دوستىقتىڭ، ورتاق مادەنيەتتىڭ، دامىپ كەلە جاتقان ىنتىماقتاستىقتىڭ بەلگىسى ەكەنىن اتاپ ءوتتى. سونىمەن قاتار مادەني-گۋمانيتارلىق بايلانىستاردىڭ قارقىندى دامۋىنا باعىتتالعان قادام رەتىندە قاراستىرىلۋى كەرەك ەكەنىن ءسوز ەتتى.
قىرعىز رەسپۋبليكاسى مەن قازاقستان رەسپۋبليكاسى اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن قىرعىزستان پرەزيدەنتىنىڭ جارلىعىمەن قازاقستان رەسپۋبليكاسىنىڭ قوعام قايراتكەرى، مادەنيەتتانۋشى مۇرات اۋەزوۆ، كورنەكتى اقىن، ديپلومات، قازاقستان رەسپۋبليكاسىنىڭ قىرعىز رەسپۋبليكاسىنداعى بۇرىنعى ەلشىسى مۇحتار شاحانوۆ «داناكەر» وردەنىمەن ماراپاتتالدى. ال «دوستۋك» وردەنى پۋبليتسيست، ادەبيەتتانۋشى، جۋرناليست، كينوسىنشى، پارلامەنت ءماجىلىسىنىڭ بۇرىنعى دەپۋتاتى ساۋىتبەك ابدىراحمانوۆقا، مەملەكەت جانە قوعام قايراتكەرى، تۇركىتانۋشى عالىم مىرزاتاي جولداسبەكوۆكە جانە ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى، رەكتور جانسەيت تۇيمەباەۆقا تابىستالدى.
«داڭك» وردەنىن حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا يەلەندى.
سونداي-اق «قىرعىز رەسپۋبليكاسىنىڭ حالىق ءارتىسى» قۇرمەتتى اتاعى قازاقستاندىق بەلگىلى كومپوزيتور التىنبەك قورازباەۆقا، تانىمال ەسترادا ءانشىسى روزا رىمباەۆاعا بەرىلدى.
روزا رىمباەۆا مادەنيەتتىڭ شەكاراسى جوق ەكەنىن اتاپ ءوتتى.
«1996 جىلى ماعان قىرعىزستاننىڭ ەڭبەك سىڭىرگەن مادەنيەت قايراتكەرى اتاعى بەرىلدى. 28 جىلدان كەيىن «قىرعىز رەسپۋبليكاسىنىڭ حالىق ءارتىسى» قۇرمەتتى اتاعىن الىپ وتىرمىن. بۇل مەن ءۇشىن ۇلكەن جەتىستىك»، - دەدى ول.
