قازاقستاننىڭ حالىق ءارتىسى روزا رىمباەۆا جاڭاوزەن، قاڭتار وقيعالارىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ول جۋرناليست قانات تىلەۋحانعا بەرگەن سۇقباتىندا حالىقتىڭ ەرىككەننەن الاڭعا شىقپايتىنىن اتاپ ءوتتى.
«ولار ءبىرىنشى ءوزىنىڭ مەكەمەسىندە ايتادى. ول مەكەمە تىڭداماعاننان كەيىن مۇناي باسشىلىعىنا بارادى. ولار تىڭداماعان سوڭ الاڭعا شىعادى. ول بولماعان سوڭ استاناعا كەلىپ ايتادى. سوندا تىڭداۋشى ۇكىمەت قايدا؟ ءبارىن ەستىپ، ءبىلىپ وتىر. مەندە سونداي سۇراق تۋىندايدى. ەرىككەننەن ەشكىم شىقپايدى. حالىق ادىلەتسىزدىك بولعان سوڭ شىعادى. ول جەردە قاراپايىم ەڭبەك ادامدارى شىعىپ جاتىر. سول جەردە جۇمىس ىستەپ جاتقاندار، سىرتتان كەلگەندەر ەمەس»،—دەدى ول.
ەسكە سالايىق، 2022 جىلدىڭ قاڭتارىندا ماڭعىستاۋ وبلىسىندا سۇيىلتىلعان گازدىڭ قىمباتتاۋىنا قارسى نارازىلىق باستالعان بولاتىن. كەيىن ەرەۋىل تۇتاس قازاقستاندى جايلادى. باستاپقىدا بەيبىت باستالعان نارازىلىق شارالارى ارتىنان قارۋلى قاقتىعىستار مەن توناۋشىلىققا توناۋشىلىققا ۇلاستى. 5 قاڭتاردا باستالعان تارتىپسىزدىكتەر رەسمي دەڭگەيدە مەملەكەتتىك توڭكەرىس دەپ اتالدى.
ەلدەگى جاعدايدىڭ شيەلەنىسۋىنە بايلانىستى، 5 قاڭتاردا توتەنشە جاعداي قازاقستاننىڭ بارلىق اۋماعىندا ەنگىزىلدى. شەرۋشىلەر ماڭىزدى نىساندارعا شابۋىل جاساپ، الماتى، تالدىقورعان قالالارىنداعى اكىمدىك عيماراتتارى، الماتى اۋەجايى نارازى حالىقتىڭ قولىنا ءوتتى. ارتىنشا قاسىم-جومارت توقاەۆ ۇجىمدىق قاۋىپسىزدىك تۋرالى شارت ۇيىمى باسشىلارىنان كومەك سۇراعانىن مالىمدەدى. 10 قاڭتاردا ۇقك تارتىپسىزدىكتەر كەزىندە باسىپ الىنعان بارلىق اكىمشىلىك نىسانداردىڭ قايتارىلعانىن، ەلدەگى جاعدايدىڭ تۇراقتالعانىن مالىمدەدى. 11 قاڭتارعا دەيىن تارتىپسىزدىككە قاتىسىپ، قاماۋعا الىنعان ادامداردىڭ سانى 10 مىڭعا جۋىقتادى. توناۋشىلىق پەن بۇزاقىلىقتىڭ سالدارىنان كاسىپكەرلەرگە كەلتىرىلگەن شىعىننىڭ مولشەرى 100 ميلليارد تەڭگەدەن استى.
