نازارباەۆتىڭ ەكس-قۇداسى قايرات بورانباەۆتى قولداپ، ءبىر توپ مادەنيەت وكىلدەرى پرەزيدەنتكە حات جازدى. بۇل تۋرالى قازاقستاننىڭ حالىق ءارتىسى روزا رىمباەۆا ينستاگرام پاراقشاسىنا سالدى، دەپ حابارلايدى «ادىرنا» ۇلتتىق پورتالى.
«وسىناۋ قيىن قىستاۋ ساتتەردە، مەملەكەتىمىزدىڭ اياعىنان تىك تۇرىپ كەتۋىنە جانە بولاشاقتىڭ جارقىن بولۋىنا ۇكىمەت تاراپىنان جاسالىنىپ جاتقان ءىس-شارالاردىڭ باستالۋى، سونىمەن قاتار قۇقىق قورعاۋ وكىلدەرىنىڭ كوپتەگەن كەلەڭسىز جاعدايلاردىڭ بەتىن اشىپ جاتۋى دا كوڭىلگە جىلۋ ۇيالاتادى. ءبىراز ەلىمىزدىڭ اتپال ازاماتتارى جاۋاپقا تارتىلىپ، ولاردىڭ جاساعان تىرلىكتەرىنىڭ اق-قاراسى تەرگەلىپ جاتقانىنان دا حاباردارمىز. سولاردىڭ ءبىرى، قر ازاماتى -بورانباەۆ قايرات سوۆەتايۇلى» دەلىنگەن جازبادا.
سونداي-اق، قايرات بورانباەۆتىڭ مادەنيەتتىڭ دامۋىنا كوپ كومەگى تيگەنىن ايتا كەتكەن.
«بىزدەر وسىناۋ ازاماتپەن تۋعان باۋىر-تۋىس بولماساق تا، ءبىزدى جاقىنداستىرعان قازاقتىڭ مادەنيەتى مەن ءان ونەرى ەدى. بورانباەۆ قايرات - بۇگىنگى كۇنگە دەيىن قازاق مادەنيەتى مەن ونەرىنىڭ دامۋىنا، سونىڭ ىشىندە وسى جولدى ارقالاپ جۇرگەن ونەر وكىلدەرىنە اركەز قامقورشى بولىپ قانا قويماي، كەرەك كەزىندە قارجىلاي كومەك بەرگەن قامقورشى-مەتسەنات ەدى. وسى ازاماتتىڭ كومەگىمەن قانشاما جاس تالانت وزدەرىنىڭ بيىگىنە كوتەرىلە ءبىلدى. قانشاما ونەر مايتالماندارى جەكە كونتسەرتتەرىن، جەكە البومدارى مەن بەينە كليپتەرىن جارىققا شىعاردى. جاس بۋىننىڭ جوعارى ءبىلىم الۋىنا، كوپتەگەن اتا-انانىڭ تۇرمىس-تىرشىلىگىنىڭ قالىپقا كەلۋىنە مۇرىندىق بولدى.
قۇرمەتتى پرەزيدەنت!
بىزدەر، تومەندەگى كورسەتىلگەن ونەر وكىلدەرى - قازىرگى كەزدە باسىنا ءىس ءتۇسىپ، تەرگەلىپ جاتقان بورانباەۆ قايرات سوۆەتايۇلىنىڭ ءىسىنىڭ وبەكتيۆتى تۇردە اشىق جانە جەڭىل بولۋىنا قامقورشى بولۋىڭىزدى وتىنە سۇرايمىز»، دەپ جازدى ينستاگرام پاراقشاسىنا.
ايتا كەتەيىك، ناۋرىز ايىندا بەلگىلى كاسىپكەر «قايرات» فۋتبول كلۋبىنىڭ جەتەكشىسى، ۇلتتىق پاراليمپيادا كوميتەتىنىڭ پرەزيدەنتى قايرات بورانباەۆ ۇستالعان ەدى. ول كۆازيمەملەكەتتىك سەكتوردا اسا ءىرى كولەمدە قارجى جىمقىردى دەپ ايىپتالدى. قازىر ول سوت شەشىمىمەن 2 ايعا قاماۋعا الىنعان.
«ادىرنا» ۇلتتىق پورتالى
⠀
