29 ماۋسىم كۇنى ەلوردادا ديماش قۇدايبەرگەننىڭ «ارناۋ» اتتى جەكە كونتسەرتى ءوتتى. ءان كەشىنە الەمنىڭ تۇكپىر-تۇكپىرىندەگى 64 مەملەكەتتەن 12 مىڭعا جۋىق تىڭدارمان كەلدى. سايت ءتىلشىسى ديماشتىڭ يسپانيادان كەلگەن تىڭدارماندارىمەن اڭگىمەلەسىپ قايتتى. ولاردىڭ ءبىرى ديماشتى كورۋ ءۇشىن اۋرۋحانادان «قاشىپ» شىقسا، تاعى بىرەۋى جولداسىنان «ەسىڭنەن اداسقانسىڭ» دەگەن ءسوز ەستىگەن.
«نۇر-سۇلتان قالاسى دۋبايعا ۇقسايدى»
.jpeg)
قازاقستانعا كەلگەندەرىڭىزگە نەشە كۇن بولدى؟
قازاقستانعا كەلگەنىمىزگە ءبىر اپتا بولىپ قالدى. مەن ەلدەن ءبىرىنشى رەت الىستاپ، ساياحات جاساپ وتىرمىن. الماتى مەن نۇر-سۇلتان قالاسىنىڭ ارالىعى الىس جانە ەكى قالانىڭ اۋا تەمپەراتۋراسى دا ەكى ءتۇرلى ەكەن. الماتىدا كۇن وتە ىستىق بولسا، نۇر-سۇلتان قالاسىندا سالقىنداۋ جانە ءجيى جەل سوعادى ەكەن. قازاق حالقىنىڭ قوناقجايلىلىعى ۇنادى. قاي قالاعا بارساق تا تازالىققا كۋا بولدىق. الماتىنىڭ تاۋلارى، تابيعاتى ۇنادى، ال نۇر-سۇلتان قالاسى ءارتۇرلى عيماراتتارىمەن ەرەكشەلەنەدى. بۇل قالانى دۋبايعا ۇقساتتىق. ەندى تۋىس، دوستارىمىزعا بۇل مەملەكەتكە ساياحاتتاپ كەلۋ تۋرالى ۇسىنىس ايتا جۇرەمىز.
ءبىزدىڭ ەلگە كەلۋلەرىڭىزگە سەبەپشى بولعان ديماش قۇدايبەرگەننىڭ اندەرىن العاش قاشان تىڭدادىڭىز؟
2017 جىلدىڭ قاراشا ايىندا ديماشتىڭ ءانىن العاش رەت تىڭدادىم. ونى لوندوندا وتكەن كونتسەرتىندە كورىپ، تىلدەسۋدىڭ ءساتى ءتۇستى. يسپانياداعى قازاقستان ەلشىلىگىندە ىستەيتىن ماماننىڭ تۋعان اپكەسى ديماشتىڭ مۇعالىمى بولعان ەكەن. ديماشقا قاتىستى وسىنداي كەز كەلگەن جاڭالىقتان حاباردار بولۋعا تىرىسامىز. «اياقتان تىك تۇرىپ كورۋگە تۇرارلىق كونتسەرت بولدى»
ديماشتىڭ جەكە كونتسەرتى قالاي ءوتتى؟ قانداي اسەر الدىڭىزدار؟
ديماشتىڭ كونتسەرتىن وتىرىپ كورگەندەر دە، فان-زونادا تۇرىپ كورگەندەر دە بولدى. مەن تۇرىپ كورگەندەردىڭ قاتارىندا بولدىم. 53 جاستاعى ادامعا 5-6 ساعات اياقتان تىك تۇرىپ كورۋ وڭاي ەمەس، بىراق سولاي تۇرىپ كورۋگە لايىقتى كونتسەرت بولدى.
سىزدەر ءارتۇرلى سالا مامانىسىزدار ما؟
ءيا، ءبىز ءار سالادا جۇمىس ىستەيمىز جانە ءارتۇرلى جاستامىز. مەن ۇيدە وتىرعانىما 20 جىل بولدى، جاسىم – 53-تە. Héctor – باعبان، ول 44 جاستا. Nani – ەدەن جۋشى، ول 71 جاستا بولسا، Luisa – ادمينيستراتور، ول 57 جاستا. ءبىزدى بىرىكتىرەتىن – ديماشتىڭ اندەرى.
.jpeg)
.jpeg)
.jpeg)
.jpeg)
«ديماشتى تىڭداعان كۇننىڭ ەرتەڭىندە قازاقستانعا ۇشىپ كەتتى»
ديماشتىڭ كونتسەرتىنە كەلۋدى قاشاننان بەرى جوسپارلاي باستادىڭىزدار؟
يسپانيانىڭ تاعى ءبىر تۇرعىنى ديماشتىڭ اندەرىن عالامتوردان تىڭداپ كورگەن كۇننىڭ ەرتەڭىندە-اق قازاقستانعا ۇشىپ كەتتى. ول وسىندا ءبىر اي بۇرىن كەلىپ، قازاقستاننىڭ بارلىق قالاسىن ارالاپ شىقتى. ءبىز ديماشتىڭ جەكە كونتسەرتى نۇر-سۇلتاندا وتەتىنىن ەستي سالا وسى جاققا كەلۋ تۋرالى شەشىم قابىلدادىق. بۇل كونەرتكە كوبىرەك ادام كەلۋى كەرەك بولاتىن، بىراق ەڭبەك دەمالىسىن الاتىن ۋاقىتتارى سايكەس كەلمەي، ءبىرازى كەلە الماي قالدى.
قازاقستانعا العاش رەت كەلىپ وتىرعان بولارسىزدار؟
باستاپقىدا ديماشتى فرانتسۋز تىلىندە ءان ايتاتىن قىتاي ۇلتىنىڭ وكىلى دەپ ويلادىم. زەرتتەي كەلە ول قازاقستان ازاماتى ەكەنىن ءبىلدىم. بۇرىن قازاقستان دۇنيەجۇزىلىك كارتادا بار مەملەكەتتەردىڭ ءبىرى رەتىندە عانا بىلەتىنبىز. ال قانداي مەملەكەت ەكەنىن، ول جاقتا قانداي حالىق تۇراتىنىن ديماشتىڭ ونەرىمەن تانىسقاننان كەيىن عانا بىلە باستادىق. بۇل ەلگە ديماشتىڭ كونتسەرتىن عانا كورۋ ءۇشىن ەمەس، ونىڭ تۋعان ەلى قانداي ەكەنىن، سالت-ءداستۇر، مادەنيەتىمەن تانىسۋ ماقساتىندا كەلدىك. كونتسەرت بىتكەننەن كەيىن الماتى قالاسىندا بىرنەشە كۇن بولىپ، نۇر-سۇلتانعا قايتا ۇشىپ كەلدىك. بۇگىن، مىنە، بۋرابايدىڭ تابيعاتىن تاماشالاپ ءجۇرمىز. بۇل جاقتا انا ءتىلىن بىلمەيتىن قازاقتار بار ەكەن، بۇل وتە وكىنىشتى جاعداي. ديماش ارقىلى قازاق اندەرىن جاتتاپ الدىق.
.jpeg)
.jpeg)
«تۋعان ۇلىم ءۇشىن مۇنداي تاۋەكەلگە بارماس ەدىم»
ماقساتتارىڭىز ورىندالدى ما؟ ەلىمىزدەن قانداي ەرەكشەلىك، قانداي ايىرماشىلىق بايقادىڭىزدار؟
بۇل جاقتا كەز كەلگەن تاعامعا ەت كوپ قوسادى ەكەن. ءبىز جاقتا جىلقى ەتىن جەمەيدى، سەبەبى جىلقى – ادامنىڭ دوسى سانالادى. بىراق وسى جاققا كەلگەندە ديماشتىڭ قۇرمەتىنە جىلقى ەتىنىڭ ءدامىن تاتىپ كوردىم. شىنىن ايتقاندا، ءوزىمنىڭ تۋعان ۇلىم ءۇشىن وسىنداي تاۋەكەلگە بارماس ەدىم. سونداي-اق، ديماش اپاسى مەن اتاسىنىڭ قولىندا وسكەن بالا ەكەنىن بىلەمىز. ءبىز جاقتا ونداي سالت-ءداستۇر جوق. قازىرگى ۋاقىتتا ءبىز جاقتا جاستاردىڭ اياعىنان نىق تۇرىپ كەتۋى ءۇشىن نەمەرەسىنە ناعاشى اپاسى ۋاقىتشا قاراپ بەرەتىن ءۇردىس قالىپتاسىپ كەلەدى. بۇل – جاقسى ءۇردىس دەپ ويلايمىن. ءبىز ديماشتىڭ ونەرىنە باس يەمىز، ال جەكە ومىرىنە تەرەڭ ۇڭىلمەيمىز، دەگەنمەن ول جاقسى ءانشى عانا ەمەس، جاقسى ادام. ول ىشىمدىك ءىشۋ، تەمەكى شەگۋ سياقتى جامان ادەتتەردەن ادا. ونىڭ سىمباتتى جىگىت، جانى تازا ادام ەكەنى، تىڭدارماندارىمەن قارىم-قاتىناسى ەرەكشە ەكەنى ءسوزسىز. ديماش – بارىمىزگە ورتاق قىمبات قازىنا.
ديماشتىڭ قاي ءانىن ەرەكشە جاقسى كورىپ تىيدايسىز؟
ديماشتىڭ بارلىق ءانى ۇنايدى. حالىق ءانى – دايديداۋدى ەرەكشە اتاپ وتەر ەدىك. فرانتسيادان كەلگەن تىڭدارمان قىز ديماش ءاندى فرانتسۋز تىلىندە اكتسەنتسىز ايتادى دەۋگە بولاتىنىن، ال يتاليانشا تىپتەن اكتسەنتسىز ايتاتىنى تۋرالى ايتتى.
وسى جاقتا ديماشپەن كەزدەسۋدىڭ ءساتى ءتۇستى مە؟
ديماشپەن جۇزبە-ءجۇز كورىسۋدىڭ ءساتى تۇسپەدى. ونىڭ فاناتتارىمەن كەزدەسۋ ۇيىمداستىرىلعان كەزدە ءبىز قالادا ەكسكۋرسيادا جۇردىك. ديماشتىڭ يسپانياعا كەلگەن كەزى بولعان، بىراق الدىن الا ەشكىمگە حابارلاپ، جاريالاپ ايتپاعان ەدى. ءبىز ونىڭ كەلەتىنىن الدىن الا ءبىلىپ الساق تا، ونىمەن كەزدەسۋگە ۇمتىلىپ، مازاسىن المادىق. «كەلەتىنى تۋرالى الدىن الا جاريالاماعان بولسا، دەمەك بىزبەن كەزدەسەتىن ۋاقىتى جوق شىعار» دەپ، ونىڭ شەشىمىنە قۇرمەتپەن قارادىق. يسپانيادا حالىقتىڭ تىلەگى، ءوتىنىشى جازىلاتىن ارنايى سايت بار. سول سايتقا ديماشتى قوناققا شاقىرۋ تۋرالى ءوتىنىپ، ونىمەن ءبارىبىر كەزدەسۋ ۇيىمداستىرامىز دەپ ويلايمىز. وتاندىق راديوارنالاردىڭ بىرىنە ءجيى حابارلاسىپ، ديماشتىڭ اندەرىن قويۋدى سۇراپ، اقىرى 11 مينۋتتىق باعدارلاما جاساۋىنا قول جەتكىزدىك.
.jpeg)
«ەكى ۇلىم بار: ءبىرى – تۋعان ۇلىم، ەكىنشىسى – ديماش»
ديماشتىڭ كونتسەرتىنە كەلەتىندەرىڭىز تۋرالى ايتقان كەزدە تۋىس، دوستارىڭىز قولداۋ ءبىلدىردى مە؟
مەنىڭ 27 جاستاعى ۇلىم بار. ول دا ديماشتىڭ اندەرىن جاقسى كورەدى. بۇرىن مەن سۇراعان ادامعا جالعىز ۇلىم بار ەكەنىن ايتسام، قازىرگى ۋاقىتتا ەكى ۇلىم بار ەكەنىن ايتامىن، ونىڭ ءبىرى – تۋعان ۇلىم بولسا، ەكىنشىسى – ديماش بالام. ديماشتىڭ كونتسەرتىنە كەلەتىنىمىز تۋرالى ايتقان كەزدە تۋىس، جاقىندارىمىز ءارتۇرلى قابىلدادى. كۇيەۋلەرىمىز «ەستەرىڭنەن اداستىڭدار ما؟!» دەسە، «ءبىر كونتسەرت ءۇشىن سونشالىقتى ۇزاق جول جۇرەسىڭدەر مە؟» دەگەندەرى دە بولدى. 72 جاستاعى Nani قازاقستانعا كەلەر كەزدە اۋرۋحانادا جاتقان. ول اۋرۋحانادان سۇرانىپ شىعۋ ءۇشىن 7 دارىگەرگە ديماشتىڭ اندەرىن تىڭداتىپ، نە ءۇشىن اۋرۋحانادان شىعۋعا قۇشتار بولىپ تۇرعانىن تۇسىندىرگەن. دارىگەرلەر «بۇل كەرەمەت ءانشىنىڭ كونتسەرتىن كورۋ ءۇشىن ءسىزدى اۋرۋحانادان شىعارۋىمىزعا بولادى» دەگەن ەكەن.
ديماش تۋرالى تاعى قانداي قىزىقتى اقپارات بىلەسىزدەر؟
«ديماش – الەمنىڭ ەلشىسى»
«ەلىمىزدەگى ءار تاس ءبىلۋى كەرەك» دەيتىندەي، ديماش سىزدەر ءۇشىن نەسىمەن ەرەكشە؟
ونىڭ ءان ايتۋ ءستيلى كۇردەلى جانە ءاندى جەتكىزۋ جولى ەرەكشە. كاسىبي تۇرعىدا وتە مىقتى ءانشى. ونىڭ داۋىسى – دەرتكە داۋا. گەرمانيادا ۇيدەن شىعۋعا قورقاتىن قىز بولعان. ۇيدەن شىققان كەزدە ونىڭ بويىن ۇرەي بيلەپ، جانى جاي تاپپايتىن. ول ديماشتىڭ ءانىن تىڭداعالى بويىنداعى قورقىنىشتى جەڭىپ، ديماشتىڭ كونتسەرتىنە باردى. ديماش ءان ايتقاندا كوزىڭە جاس كەلەدى، بۇل جايدان-جاي بولاتىن قۇبىلىس ەمەس. ونىڭ باسقا ەمەس، ءدال وسى زاماندا دۇنيەگە كەلگەنى قانداي جاقسى. ونى «الەمنىڭ ەلشىسى» دەپ اتاۋعا بولادى، سەبەبى ونىڭ اندەرىن تىڭداعان ادام جامان ويدان ارىلىپ، بويىن تەك ماحاببات، جاقسى سەزىمدەر بيلەيدى. سوعىسقۇمار ادامدارعا ديماشتىڭ اندەرىن تىڭداتىپ، بەيبىت ومىرگە شاقىرۋعا بولادى. ونىڭ اندەرىن ءتۇسىنۋ ءۇشىن ءتىل ءبىلۋدىڭ دە قاجەتى جوق، جۇرەكپەن سەزىنسەڭ بولعانى.
الداعى ۋاقىتتا العا قانداي ماقسات قويىپ وتىرسىزدار؟
ەندىگى ماقسات – وسى جاققا باسقا دا تۋىس، دوستارىمىزبەن بىرگە كەلۋ. مادريدتە ءبىزدىڭ كوورديناتور تۇرادى. ول ديماشقا قاتىستى جاڭالىقتارمەن ءبولىسىپ، ونىڭ كونتسەرتىنە باراتىنداردىڭ باسىن بىرىكتىرىپ، ۇيىمداستىرادى. الداعى ۋاقىتتا يسپانيانىڭ ءار تۇكپىرىندە ديماشتىڭ فاناتتارىنان قۇرالعان توپتار بولادى. وسى جاقتاعى ساپارىمىزدىڭ ءساتتى بولۋىنا ىقپال ەتكەن «تريۋمف Travel» تۋريستىك اگەنتتىگىنە، Sin Fronteras يسپان ورتالىعىنا العىس ايتامىز.
