كەشە، 17 ءساۋىر ءماجىلىس كۋلۋارىندا دەپۋتات اسحات ايماعامبەتوۆ قازاقستاندىقتاردىڭ احاج-دا زاڭدى تۇردە نەكەسىن قيماي تۇرىپ، نەكەگە تۇراتىنىنا قاتىستى پىكىر ءبىلدىردى. ونىڭ ايتۋىنشا، بۇل – زاڭسىز، دەپ حابارلايدى “ادىرنا” ۇلتتىق پورتالى.
ماجىلىسمەننىڭ ايتۋىنشا، قازاقستاندىقتار نەكەلەرىن رەسمي تۇردە تىركەمەي، يمامنىڭ نەكە قيۋ راسىمىمەن شەكتەلىپ جاتىر.
«ءسىز ايتىپ تۇرعان ارەكەتتەردى قۇپتامايمىن، ءتىپتى زاڭسىز دەپ ەسەپتەيمىن. بىزدە ءتيىستى ءتارتىپ بويىنشا رەسمي تىركەلگەن نەكە عانا زاڭدى بولىپ ەسەپتەلەدى. رەسمي تىركەۋسىز قيىلعاننىڭ ءبارى نەكە بولىپ ەسەپتەلمەيدى. دەمەك، مەشىتتە نەمەسە شىركەۋدە عانا قيىلعان نەكە زاڭدى نەكە بولا المايدى»، - دەدى ول.
سونداي-اق، اسحات ايماعامبەتوۆ زاڭدا بۇل ماسەلە ايقىن رەتتەلگەنىمەن، مەشىتتە عانا نەكە قيا سالۋ ترەندكە اينالىپ بارا جاتىر دەپ ەسەپتەيدى.
«شىن مانىندە بۇل زاڭعا قايشى. ءبىز – زايىرلى مەملەكەتپىز. نەكە قيۋدىڭ زاڭمەن بەلگىلەنگەن ءتارتىبى بار. رەسمي تىركەۋسىز نەكە قياتىن ءدىني قىزمەتكەرلەردىڭ جاۋاپكەرشىلىگىن تالقىلاپ، تالداۋ كەرەك. مەن بۇل ماسەلەمەن اينالىسامىن»، - دەدى اسحات ايماعامبەتوۆ.
