دەپۋتات ءوز سوزىندە «ادال ادام» قاعيداتىنا ساي تاريحي تۇرعىدان ءادىل باعالانۋى ءتيىس ەكەنىن ايتتى.
«كەشە عانا ۇلتتىق قۇرىلتايدا ەلىمىزگە ارنالعان كەلەلى يدەولوگيالىق، ادامي قۇندىلىقتار، ازاماتتاردىڭ قۇقىقتارى، الەۋمەتتىك جانە ساياسي-ەكونوميكالىق باعىتتاعى ماسەلەلەر ناقتى كوتەرىلدى. مەملەكەت باسشىسى ءبارىمىز كوتەرىپ جۇرگەن ۇلكەن-كىشىلى وزەكتى ويلارعا توقتالىپ، ولاردىڭ ىسكە اسىرۋىن ناقتىلادى. قۇرىلتايدا ءوز تاراپىمنان ناعىز شايقاستا قاسىق قانى قالعانشا ەرلىك كورسەتكەن مايدانگەرلەرىمىزدىڭ، پرەزيدەنت ايتقانداي «ادال ادام» قاعيداتىنا ساي تاريحي تۇرعىدان ءادىل باعالانۋى ءتيىس ەكەنىن كوتەردىم. ويتكەنى، الەمدەگى بارشا ۇلتتاردى جويىپ، وزدەرىنىڭ ناتسيستىك يدەولوگياسىن ورناتقىسى كەلگەن فاشيستەرگە اتالارىمىز قاسقايىپ قارسى تۇردى. بىراق بۇگىن تەك بەيبىت قوعامدا ءومىر ءسۇرىپ، وق-ءدارىنىڭ ءيىسىن سەزبەگەن، وتان ءۇشىن كۇرەستەگى شايقاستارمەن تەرەڭ تانىسپاعان ۇرپاعىمىزدىڭ كەيبىر وكىلدەرى تاريحي وقيعالارىمىز بەن تۇلعالارىمىزدى جوققا شىعارعىسى كەلەدى. بۇل – تاريحىمىزعا جاسالعان قيانات، باتىرلاردىڭ رۋحىنا دەگەن قۇرمەتسىزدىك.
ەل بولامىز دەسەك، ءاربىر تاريحي وقيعانى، سول وقيعالاردىڭ بەل ورتاسىندا جۇرگەن تۇلعالاردىڭ اتىن – جاس ۇرپاقتىڭ جادىندا تاسقا قاشاعانداي ەتىپ تاڭبالاۋىمىز كەرەك. مىسالى، الەمنىڭ انگليا، قىتاي، فرانتسيا، يسپانيا سياقتى كوپتەگەن ەلدەرى ءوز تاريحىن تۇعىرلى تۇلعالارمەن بايلانىستىرادى، ءتىپتى ولاردىڭ ەسىمدەرىمەن ارنايى داۋىرلەردى اتايدى. وعان قوسا، وردەندەرى مەن مەدالدارىنا رۋحاني كوسەمدەرىنىڭ، مەملەكەتىنىڭ ايبىندى قولباسشىلارىنىڭ ەسىمدەرىن بەرگەن. بۇل ۇلتتىڭ ۇلىلىعىن جانە ساياسي مادەنيەتىنىڭ بيىكتىگىن بىلدىرەدى.
وسى رەتتە، كەشەگى ۇلتتىق قۇرىلتايدا قاسىم-جومارت توقاەۆ تاريحي ادىلدىكتى ورناتۋ ءۇشىن ەلىمىزدەگى اتى اڭىزعا اينالعان قاھارماندارىمىز – باۋىرجان مومىشۇلى، راقىمجان قوشقارباەۆ، ساعادات نۇرماعامبەتوۆتىڭ ەسىمدەرىمەن اتالاتىن ارنايى وردەندەردى تاعايىنداۋدى ۇسىندى. پرەزيدەنتتىڭ بۇل ۇسىنىسى – ادامزات وركەنيەتىندە زاردابى جونىنەن بۇرىن-سوڭدى بولماعان، ميلليونداعان ادامداردىڭ ءومىرىن جالماعان، تاعدىرلارىن تالقان ەتكەن ەكىنشى دۇنيەجۇزىلىك سوعىستاعى 600 مىڭ قازاقستاندىق مايدانگەرلەردىڭ رۋحىنا دەگەن ناعىز قۇرمەت»،- دەدى ەدىل جاڭبىرشين.
سونداي-اق، بۇل وتانشىلدىقتى، ۇلتتىق بىرەگەيلىكتى نىعايتۋعا كەلەلى ىقپال ەتەتىنىن دە باسا ايتتى.
«بىراق باتىر بابالارىمىزدىڭ رۋحىنا كورسەتىلگەن قۇرىلتايداعى ماڭىزدى باستاما اقپاراتتىق تۇرعىدان جان-جاقتى تاراتىلماي، قوعامدا لايىقتى دەڭگەيدە ناسيحاتتالمادى. سوندىقتان ءبىرىنشى كەزەكتە، ءبىز ءماجىلىس دەپۋتاتتارى وسى تىڭ يدەياعا ارنايى توقتالۋدى ءجون كوردىك جانە اتالعان ۇسىنىستى زاڭدى تۇردە بەكىتۋىمىز قاجەت. بۇل شەشىمدى تەز ارادا الداعى وتان قورعاۋشىلار كۇنىنە دەيىن قابىلداپ، العاشقى ساربازدارىمىزدى ەلىمىزدىڭ ءبىرتۋار پەرزەنتتەرىنىڭ اتىنداعى مارتەبەلى وردەندەرمەن ماراپاتتاۋىمىز كەرەك. سول سەبەپتى، قۇرىلتايدا كوتەرىلگەن ماسەلەلەردى ۇكىمەتكە رەسمي مىنبەردەن ارنايى جولداپ وتىرمىز»، – دەيدى ول.
