بۇگىن ءماجىلىس «ماسس-مەديا تۋرالى» تۋرالى زاڭدى جانە كەيبىر زاڭنامالىق اكتىلەرگە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋدى كوزدەيتىن زاڭدى ەكىنشى وقىلىمدا قابىلدادى، - دەپ حابارلايدى “ادىرنا” ۇلتتىق پورتالى.
قۇجاتتى تانىستىرعان ءماجىلىس دەپۋتاتى جاناربەك ءاشىمجان زاڭ جوباسىن ازىرلەپ، پىسىقتاۋعا بەلسەندى قاتىسقان قوعام مۇشەلەرىنە العىس ءبىلدىردى.
– زاڭ جوباسىندا جەكەلەگەن جۋرناليستەرگە وڭايلاتىلعان اككرەديتتەۋ قۇقىعىن بەرەتىن «ءباسپاسوز كارتاسىن» ەنگىزۋ جونىندەگى نورما ۇسىنىلعان. اشىعىن ايتۋ كەرەك، بۇل نورما جۇمىس توبىندا، جالپى قوعام ىشىندە ۇلكەن پىكىرتالاس تۋدىردى. جۇمىس توبىنداعى مۇشەلەردىڭ باسىم بولىگى بۇل نورمانى دەموكراتيالىق پرينتسيپتەرگە قايشى، جۋرناليستەردى الالاۋ، جان-جاقتى اقپارات تاراتۋعا كەدەرگى كەلتىرەتىن نورما دەپ باعالادى.
سوندىقتان بۇل نورما بويىنشا ناقتى شەشىم قابىلداندى – «پرەسس-كارتا» تۋرالى نورما جويىلدى، – دەدى دەپۋتات.
وتكەن جىلدىڭ قازان ايىندا مادەنيەت جانە اقپارات ءمينيسترى ايدا بالاەۆا «بۇقارالىق اقپارات قۇرالدارى تۋرالى» زاڭ جوباسى اياسىندا مەملەكەتتىك تىلدە تەلەراديوارنالاردا حابار تاراتۋ 50 پايىزدان 70 پايىزعا دەيىن ارتتىرۋ ۇسىنىلىپ وتىر دەگەن بولاتىن.
– قازاقستان حالقىنىڭ 80 پايىزدان استامى مەملەكەتتىك ءتىلدى مەڭگەرگەن. وسى فاكتورلاردىڭ ءبارىن ەسكەرە وتىرىپ، مەملەكەتتىك تىلدەگى تەلەراديو حابارلارىن تاراتۋ كولەمىن 70 پايىزعا جەتكىزۋ تۋرالى شەشىم قابىلداندى. ايتا كەتۋ كەرەك، ول بىرتە-بىرتە ىسكە اسىرىلادى. 2025 جىلدان باستاپ جىل سايىن 5 پايىزعا ءوسىرۋ كوزدەلگەن، – دەگەن ەدى مينيستر.
ايتسە دە بۇل نورما جاڭا زاڭ جوباسىندا 60/40 پايىز بويىنشا ەنىپ وتىر. جيىننان كەيىن جۋرناليستەر مادەنيەت جانە اقپارات ۆيتسە-ءمينيسترى قانات ىسقاقوۆقا «ءاۋ باستا قازاق تىلىندە اقپارات 70, ال ورىس تىلىندە 30 پايىز بولسىن دەپ ۇسىنىس ايتىلىپ ەدى. ول نەگە 60 پايىزعا ءتۇسىپ قالدى؟» دەپ سۇراق قويدى.
– ءار ءبىر نورما تالقىلانىپ، داۋىس بەرىلەدى. ءبىر جاعىنان ءبىز كوپۇلتتى مەملەكەت بولعاندىقتان ەلدە وزگە ۇلت وكىلدەرى بار عوي. ولار دا اقپاراتقا مۇقتاج. سوندىقتان دەپۋتاتتار وسى ماسەلەنى زەرتتەپ، زەردەلەپ، ءتيىستى تالداۋ وتكىزىپ شەشىم قابىلدادى. اقپارات تاراتۋدا 60/40 پايىز وتە ءتيىمدى. قازىرگى تاڭدا قازاق ءتىلدى كونتەنت وتە جوعارى، ەندى ونى ودان ارى ىرگەلەتىپ دامىتساق، 70 پايىزعا جەتكىزۋدە ەشقانداي ماسەلە جوق، – دەدى ۆيتسە-مينيستر.
