وزبەكستان، قازاقستان جانە قىرعىزستان بيلىگى قىرعىز جەرىندە قامبار-اتا سۋ ەلەكتر ستانتسياسىن (گەس-1) بىرلەسىپ سالۋعا كەلىستى، دەپ حابارلايدى “ادىرنا” ۇلتتىق پورتالى.
“نىسان نارىن وزەنىنىڭ بويىندا سالىنادى”، دەلىنگەن قازاقستاندىق اشىق نورماتيۆتىك قۇقىقتىق اكتىلەر سايتىندا جاريالانعان ۇكىمەتارالىق كەلىسىمنىڭ جوباسىندا.
قۇجاتقا سايكەس، جوبانى جۇزەگە اسىرۋ ءۇشىن تاراپتار قىرعىزستاننىڭ ۇلەسى 34 پايىزدى، وزبەكستان مەن قازاقستاننىڭ ارقايسىسىنىڭ ۇلەسى 33 پايىزدى قۇرايتىن اكتسيونەرلىك قوعام قۇرادى. شارتتىڭ قۇرىلتايشىلارى دەربەس تۇردە انىقتالادى. بۇل رەتتە باعالى قاعازداردى بەرۋگە نەمەسە ساتۋعا تىيىم سالىنعاندىقتان، اكتيۆتەردى ءبولۋ وزگەرىسسىز قالادى. الايدا قۇرىلىس اياقتالعاننان كەيىن قامبار-اتا گەس-1 قىرعىزستاننىڭ مەنشىگىنە وتەدى.
سونداي-اق كەلىسىمدە ورتالىق ازيانىڭ ءۇش ەلى انىقتاعان ۇيىمدارعا سۋ ەلەكتر ستانتسياسىندا وندىرىلەتىن ەنەرگيانىڭ بارلىق كولەمىن ساتىپ الۋعا كەپىلدىك بەرىلەتىنى اتاپ وتىلگەن. مەملەكەتتەر ستانتسيانىڭ جۇمىس رەجيمى مەن سۋ اعىنىنىڭ شكالاسىنا بىرلەسكەن باقىلاۋ الادى.
سۋ ەلەكتر ستانساسىنىڭ قۇرىلىسىنا اقشانى كەلىسىم تاراپتارى بەرەدى، ال شىعىستار ءىشىنارا بانكتەردىڭ، حالىقارالىق قارجى ينستيتۋتتارىنىڭ نەسيەلەرى مەن گرانتتارىن تارتۋ ەسەبىنەن جابىلادى.
جوبانىڭ قۇنى، سونداي-اق ونى جۇزەگە اسىرۋ مەرزىمى تەحنيكالىق-ەكونوميكالىق نەگىزدەمە بەكىتىلگەننەن كەيىن انىقتالادى.
