Өзбекстан, Қазақстан және Қырғызстан билігі қырғыз жерінде Қамбар-Ата су электр станциясын (ГЭС-1) бірлесіп салуға келісті, деп хабарлайды “Адырна” ұлттық порталы.
“Нысан Нарын өзенінің бойында салынады”, делінген Қазақстандық ашық нормативтік құқықтық актілер сайтында жарияланған үкіметаралық келісімнің жобасында.
Құжатқа сәйкес, жобаны жүзеге асыру үшін тараптар Қырғызстанның үлесі 34 пайызды, Өзбекстан мен Қазақстанның әрқайсысының үлесі 33 пайызды құрайтын акционерлік қоғам құрады. Шарттың құрылтайшылары дербес түрде анықталады. Бұл ретте бағалы қағаздарды беруге немесе сатуға тыйым салынғандықтан, активтерді бөлу өзгеріссіз қалады. Алайда құрылыс аяқталғаннан кейін Қамбар-Ата ГЭС-1 Қырғызстанның меншігіне өтеді.
Сондай-ақ келісімде Орталық Азияның үш елі анықтаған ұйымдарға су электр станциясында өндірілетін энергияның барлық көлемін сатып алуға кепілдік берілетіні атап өтілген. Мемлекеттер станцияның жұмыс режимі мен су ағынының шкаласына бірлескен бақылау алады.
Су электр стансасының құрылысына ақшаны келісім тараптары береді, ал шығыстар ішінара банктердің, халықаралық қаржы институттарының несиелері мен гранттарын тарту есебінен жабылады.
Жобаның құны, сондай-ақ оны жүзеге асыру мерзімі техникалық-экономикалық негіздеме бекітілгеннен кейін анықталады.
